PenggauranNa PUANG lako tu mai to sibala lembang Israel
1Inde sia tu kada Napa’petanggungan Puang Matua, iamotu kadanNa PUANG. Iatu Puang diomo tondok Hadrakh, sia Damsyik tu inan Nanii torro, belanna PUANG, umpata’pai mata tu mintu’ to senga’, susi dukato tu mintu’ suku Israel;
2ondongpi ia duka tu Hamat, tu nasikandean sia iatu Tirus sola Sidon, moi nasangtumba madaona tu kapaissananna,
3sia moi nabangunan kalena benteng tu Tirus sia moi napopa’toppo’-toppo’ tu salaka susi barra’-barra’ sia bulaan butung pullan dio lu batatta.
4Manassa, la Natalo Puang sia la Natuan tu rinding tembo’ bentengna tama tasik, sia iatu kota la pura diballa api.
5La natiro Askelon anna mataku’, susi duka tu Gaza anna ma’parondo sia Ekron, belanna iatu apa narannuan la dipakasiri’; attu iato iatu datu la pa’de dio mai Gaza sia iatu Askelon tae’mo tau la untorroi.
6Lan Asdod la nanii torro tu to disese, sia la Kusabu’i tu mintu’ apa napokapua penaanna to Filistin.
7La Kupatoyang tu rara lan mai sadangna sia iatu apa megi’giran lan mai alla’ isinna sia ia duka tu torronapa la Napotau Kapenombanta, naurunganni butung to misa’ pangulu suku lan Yehuda, na iatu to Ekron la susito Yebus.
8La torroNa’ ungkampai banuangKu tiku lao unnea tuntunan surodadu tu male sule, sia tae’mo nala ullaoi tu to ma’pakario-rio, belanna totemo matangKu kalenamo untiroi.
Diona datu Sion
9Sila’tekangko, e anak dara Sion, unnarrak-arrakko, e anak dara Yerusalem! Manassa iatu datummu saemo lako kalemu, malambu’ sia pasau’, umpamadiongan penaanna, sia ussakei keledai, iamotu keledai laki, anakna keledai birang.
10Attu iato la Kuputtai tu mintu’ kareta dio mai Efraim sia darang dio mai Yerusalem, sia ia duka tu pana dipake parari; sia la umpakalelean kamarampasan lako mintu’ bangsa, sia iatu kaparentanna la randuk dio mai tasik sae lako tasik sia dio mai Salu sae lako randan langi’.
Diona kadirampananan sia kapataloan
11La Kurampanan duka tu to dirampa dio lu kalemu lan mai bubun tu tae’ uainna tu belanna umpotoding rara kasibasseammu.
12La sulekomi tama kota benteng, e to ditarungku, tu den siapa rannunna; allo ia duka te Kupa’peissananni, kumua la Kupakkanniko melo manglokkon penduan.
13Belanna la Kue’teran Kaleku tu Yehuda susito pana, la Kupatorro dao pana tu Efraim, sia la Kusarrang tu anakmu, e Sion, sirari anakmu, e Yunani, sia la Kupadadiko misa’ padangna to lalong.
14La sombo tu PUANG lako tau iato mai sia iatu anak panaNa la tassu’ susito kila’ sia Puangta PUANG la umpannoni napiri tanduk sia la ke’de’ naturu’ angin bara’ rampe lo’na lu.
15PUANGna mintu’ ma’dandan maritik la urrerungi tu tau iato mai, naurunganni mangampello’, ondongpi nalullu’ tu batu pelobang; la mangiru’ tu tau iato mai, namareko napobua’ uai anggoro’, sia la ponno rara tu tau iato mai susi pindan pa’pi’pikan sia susi tetuk inan pemalaran.
16Allo iato, PUANG, Kapenombanna, la urrampananni tu tau iato mai susi domba ma’baanan; iatu taunNa susi tuntunan dombaNa, ondongpi sangtinti parimata dio makotaNa, tu la pandillak-dillak lan tondokNa.
17Manassa, lendu’ tongan ia kapuana kasalamaranna tu tondok iato, ondongpi lendu’ tongan ia kapuanna kamaballoanna! Iatu gandung umpamaloboran pia muane sia iatu uai anggoro’ ba’ru umpamarumbo pia baine.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel