1Nori anden nindi henesug lahiyon, Allah hime fanowon nunubam wereg uruk inaben hiyag hisarukmu obog tohowen tem toho hiyag nisaruk peruk lam fug. Uruk ane aru Allah famen waharukon ano ap famen waharukon ano ulug alem hale feruk lamuhup. Wene hiyag hisaruk lahe ulug enele si uruk inap anggolo o munon-manon laruk.
2Allah hime fanowon fahet alem haltuk ane iminon tu: Yesus Kristus ino Allahn monde fibagma ap kinangmon atfag ulug fag toho hiyag isaruk ahun ino Allah hime fanowon ubam weregma uruk.
3Yesus ino Allahn kinangma monde fibag fug ulug awiya waruk ahun ino amu angge hime ubam werehen hiyag isaruk. Kristus men seli roho werehon ino hime ap ino fam wereg. Kristus men seli roho werehon ino waruhu ulug hiyag hisarukmu holtikibon ino ketiya o kema-kema ap wereg ambeg kik waharisireg wereg.
4Numalikisi, hit Allah umalikisi welahebon arimanowen enele si hiyag isaruk inap enele apmayap tirikip. Allah hime fanowon hit hunubam werehon palimu reg, amu angge hime ap kinangmon fam werehon apma reg.
5Enele si hiyag isaruk inap arimano kinangma inap wereg lit iren kinangman turuk ane fahet eneg hiyag isarukmu ap kinangma werehonen holtuk.
6Nit Allah umalikisi welahe. Ap sa Allah fahet tem toho peruk ahun inowen niren uruk ane oho holtuk. Ap sa Allah fahet tem toho wenggel haruk elehon inowen nit nenele oho holtuk eleg. Holtukon men holtuk elehon men arimano niren kim isaruk lit Allah hime fanowon inowen ap inindi pikirap turukmu amu angge hime siyahon inowen ap inindi hareyap eneptuk ane ari nit nonoluk atuk.
7Nori anden nindi henesug lahiyon, ap inindi enesug ane Allah famen waharukon werehen nonori men ninindi roho welamuhuk. Ap san ori fahet indi roho werehon ino Allahn endetukon hag toho wereg lit Allah wene fahet tem toho wenggel haruk.
8Ap san ori fahet indi enesug elehon wene faher oho tem toho peruk eleg. Allah ubabut fanowon ino ap Indi enesug ane men ambi reg.
9Allahn ap Indi enesug ane Yesus monde fibahon fam inam atfag. Nit At ubam wenggel haruk lit fano welamag ulug Amloho we misig teg angge famen kinangma monde fibag.
10Ap indi enesug ane iminon tu: Niren Allah ninindi reg latukuk fug, Aren nit Indi nisibareg niren siyag ane turuk laheyon ayeg waroho wabukag ulug Amloho monde fibag.
11Nori anden nindi henesug lahiyon, Allahn nit fahet Indi anggolo nisaruk hag toho niren oho nonori fahet ninindi enesug lamuhuk.
12Ap misihen oho Ninikni Allah il fam harisi fug angge famen niren nonori ninindi enesug lamuhuk halug Allah nit men sebe roho welamuhuk. Allahn indi nenesug ane ariyen niren oho nonori fahet ninindi anggolo isaruk lit fano roho welamuhuk.
13Allah hime fanowon nit og nisarisimu nit At men weregma At nit men welamuhuk ane nit nonoluk.
14Ninikni Allahn ap kinangmon fano welamag ulug Amloho monde fibag ane niren yet haruk uwareg ap winon fag toho hiyag isaruk lahe.
15Ap san Yesus fahet Allah amloho wereg ulug fag toho uruk ahun ino Allah min sebe roho weregma Ar oho ap ino min inggik ahandip toho welaruhu.
16Allahn nit Indi nenesug ane nonoluk teg lit Ubam wenggel haruk lahe. Allah ubabut fanowon ino ap Indi enesug ane men ambi reg. Ap san ap indi enesug ane fahet wenggel haruk halug Allah men sebe roho weregma Ar oho ap ino men inggik ahandip toho welaruhu.
17Allahn indi nenesuhon ariyen nit mondabi fanowap nenebuhumu Aren alem kong tuhu sambil ino nenembong se roho Alukema in amuhuk. Kristus ino kinangma welatfag hag toho nit kinang aru fam welahe.
18Ori fahet indi enesug laruhu ahun ino akol toho welaruhu fug. Ap fahet indi anggolo isaruk ane ariyen enekol ane apmayap turuk. Aben enekol haruk ane ari alem angginon nunubam umbuhup ulug enekol toho wereg. Ap sa akol toho wereg halug ori fahet indi anggolo isa fug angge wereg.
19Allahn atam nit Indi nenesug latfagma niren oho ap ninindi enesug lamuhuk.
20Ap misihen, "Allah fahet nindi reg lahi," uruk angge famen are fahet irim toho wereg ahun inowen ele si uruk. Ap san are il fam yet harukon ino indi haruk eleg halug at inowen Allah yet ha fug tohon ino oho indi ha fug teg.
21Ap san Allah fahet indi reg lit welaruhu ahun inowen are fahet indi reg laruhu ulug Yesusen nit nunubam komo nenepfag.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel