Alkitab Mobile SABDA
[VER] : [ABUN]     [PL]  [PB] 
 <<  1 Korintus 3 >> 

1Ji bi nji, ji bi nyanggon, nin yo jammo Yefun Allah Gen pe nde tó, wo nin ben nin bi suk-i tepsu yetu mo bur ré ben bi suk-i ne tó. Sane ji duno nin tepsu ji duno ye gato onyar kem mo Yesus Kristus sim. Nin tepsu pabom mo Kristus bi sukdu-i tó.

2Tomga nyim ji duno nin su sukdu gato ndaf, tepsu nggon syo sus nai pabom da. An yo syo sugit gato krat nde, we pabom ne er tó. Sane ji yo duno nin su sukduno gato kru nde tó. Su ré dom nin tepsu pabom mo Yefun bi suk-i tó, sane ji duno nin su sukdu gato yo kru nde,

3we nin ben nin bi suk-i tepsu yetu mo bur ré ben bi suk-i tó. Nin ben sukndi e, nin maskwa ket yu mo suk gato nin deyo ku e ne, sane anato men jam do, nin ben suk tepsu ye gato jam nde Yefun tó. Nin jammo sukjimnut gato tik nin mit wa ben sukibit ne tó.

4Nin deyo ki do, "Men simo Paulus." Nin deyo o ki do, "Men simo Apolos." Nin ki nin bi suk-i sane anato men jam do, nin ben nin bi suk-i tepsu yetu mo bur ré ben bi suk-i ne tó.

5Je u anato ji ne? Je u anato Apolos ne? Nin bes men ka we gum kok nde. Men ka we anato Yefun Allah bi pakwerut gato ós nin sor. Men ka we ki sukdu gato ós nin nai sukjimnut subere nin brek kadit os ibit, ete nin onyar brek ma kem mo Yesus Kristus. Men ka we dakai benbot suk gato men bi Yekwesu syogat men kadik-kadik ben ne sor re.

6Nin bes men ka we gum kok nde. Ji anato ben suk tepsu ye gato jan suk mo nggwe, Apolos anato tepsu ye gato sye syur wa, sarewo Yefun Allah anato ben sukjan ne kom. Sane nin bes Yefun Allah gum kok sor.

7Ye gato jan suk si ye gato sye syur wa ne, an we yo nggiwa ben sukjan ne kom nde, wo Yefun Allah dakai sor ete nggiwa ben sukjan ne kom.

8Ye gato jan suk si ye gato sye syur wa ne, an we bi sukjimnut tepsu yu, an we ne iwa sukjan ne kom. Bere Yefun Allah syo suk gato ndo nai án tepsu án bi kamba mone.

9Men ka we si Yefun Allah ben suk sino mo An bi nggwe. Nin anato tepsu Yefun Allah bi nggwe. Nin anato tepsu Yefun Allah bi nu dik yo dom.

10Yefun Allah syo suktinggi nai ji anato ji jam ji nggo nu sisu ndo. Sane ji ben pondasi gato krat. Or o ye yi yo o waii ma ben nu kaim mo pondasi ne. Ye gato ben nu kaim mo pondasi ne it yo, an ben sisu ndo sor.

11Pondasi gato Yefun Allah syogat ji ut ne anato Yesus Kristus ka dik ne sor. Pondasi yi yo tep wa Yefun Allah bi nu yo mo nde.

12Yé deyo ben nu kaim mo pondasi ne su suk gato kem nam sato: emas, perak si jok gato bi sugum sye. Yé deyo o ben nu kaim mo pondasi ne su suk gato yo kem nam nde sato: kwe si es gato gu.

13Nu kaim gato yé ben ne, bere men me rer su kam gato Yesus Kristus satu ma mo bur ré. Bere men me nu gato krat si nu gato yo krat nde. Nu gato bot yo git nde it yo, men jam do, nu ne krat, wo nu gato bot git or yo, men jam do, nu ne yo krat nde.

14Sane nu gato yé ben ne kem krat kadit bot git nde yo, bere ye gato ben nu ne Yefun Allah syo suk gato ndo nai án mo án bi kamba.

15Wo nu gato bot git ne yo, ye gato ben nu ne yo ku suk gato ndo kadit Yefun Allah nde. Yefun Allah nai yé ne wé kadit bot gesyos, subere yé ne kem ndo to kapyo mato kapyo mo Yefun Allah bi nat-i. Sarewo Yefun Allah yo syo suk yo o nai án nde, bere án sok mo Yefun bi nat-i tepsu yé gato titi fro mo nden kadit nu mit gato bot git wairi wa ne.

16Nin dakai anato tepsu Yefun Allah bi nu, nin dakai jam re. Yefun Allah Gen kem mo nin mit it, nin dakai jam re.

17Ye to ben Yefun Allah bi nu ibit su sukduno gato siri kadit Yefun Allah bi sukduno ne it yo, bere Yefun Allah dom ben ye ne ibit, we nu ne Yefun Allah fro dor wa Yefun Allah bi suk-i sor. Nin anato tepsu nu ne.

18Nin dakai kidar nin dakai nde. Ye gato nut do, an sa, jam suk mwa tepsu yetu bi sukjimnut-i mo bur ré, ndo sa, an ben nggwa tepsu ye gato jam nde bur ré bi suk-i, subere an ku os wa an jam suk mwa su sangge tepsu Yefun Allah bi sukjimnut-i ne,

19we ye gato bi sukjimnut ko mo bur ré bi sukdu-i ne, Yefun Allah ki do, sukdu ne yé dakai ki daret kaii. Tepsu ye krom mo Yefun Allah bi sukdu-i sare do, "Yefun Allah ben ye gato bi sukjimnut ko ne ku sukye mo koirut tepsu ye ne ré bus, ete bus ne dakai sip an dakai."

20Ye krom o do, "Yefun Allah jam do, ye gato bi sukjimnut ko ne bi sukjimnut mwa ne yo ós nje ne nde, wokgan yo dom nde."

21Sane men bes yetu gum kok daret mo sukdu gato an jam ne o nde. Suk mwa gato ndo wa men jam ne Yefun Allah fro wa men re.

22Yefun Allah fro yetu wa ós nin jam suk gato ndo sato: ji e, Apolos si Petrus. Bur ré, Yefun Allah fro wa men. Suga men kem mo bur ré sor kom mo kam sari ne ma, men kwop o, men mbau o, suk mwa ne sino, Yefun anato fro wa men, tepsu men bi suk.

23Sane dom men anato Kristus bi nje-i, ete Kristus anato Yefun Allah bi Gan.


  Share Facebook  |  Share Twitter

 <<  1 Korintus 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel