Alkitab Mobile SABDA
[VER] : [ABUN]     [PL]  [PB] 
 <<  1 Korintus 9 >> 

1Ji ré, suk yo jowa ji mo nde. Ji ré yerasul, ye gato Yefun Yesus bes ete syogat mu wa ben An bi suk-i mo bur ré. Ji ré, ye gato me men bi Yekwesu Yefun Yesus su ji gro mó re. Ji anato duno nin su sukdu subot An anato nin onyar kem mo An re.

2Kapre ye yi neya ki do, ji yerasul nde, sarewo nin sa, jam do, ji anato yerasul, we ji duno nin sor nin onyar kem mo Yefun Yesus re. Ji duno nin sane anato kadum do, sangge, ji ré anato yerasul gato men bi Yekwesu Yesus Kristus bes ne.

3Yé ki ji gum ibit ket kwayo-kwayo mo suk gato ji ben ne yo, bere ji ki sare do:

4men ben suk, men duno nin, sane sugit si syur gato yé syo nai men yerasul, bere men nai sor, we men bi kamba mó re.

5Yerasul yi sato Petrus si Yefun Yesus bi nji do mubot os yo, án bi nggon gato onyar kem mo Yefun Yesus si án mu sino. Suk gato Petrus si yerasul yi ben ne anato ndo. Wo, ji do bi nggon gato si ji mubot os yo, bere yé ki ji gum ibit mone wa suma ne?

6Ji si Barnabas, men ka we sor, ete ben suk, men ka we wergat nggwa wa meret suk gato men yewa ne mo men dakai, wo yé syo suk nai yerasul yi ne. Yé syo suk nai yerasul yi neya, wo yé yo syo nai men ka we nde wa suma ne?

7Sane yesukmise u anato futmu gu yesukmise yi yo, orete bere an dakai meret sugit wa an git ne? Sane dom, je u anato ben nggwe, ete bere an yo git sugit gato an jan mo nggwe ne nde ne? Sane dom, je u anato mewa suksi, ete bere an yo gu deyo wa an git nde ne?

8Sukdu gato ji ki ré, yetu bi sukdu-i nde, wo Yefun Allah bi sukdu-i anane.

9Musa krom Yefun Allah bi sukdu-i mo bi buku sare do, "Sapi yakos gandum gro syesyar kadit i-dar yo, men far sapi syokwet mone nde, " Mo sukdu ne, Yefun bi sukjimnut mo sapi bado,

10mo men yerasul, e? An ki bi sukdu ne wa men dom re, we ye gato ben nggwe si ye gato mewa nggwe ne sane sor sugit ne kri yo, án ben suk mone, án sino nut do, sangge, bere án ku napyo.

11Men ós nin, men duno nin su Yefun bi sukdu tepsu yé jan suk mo nggwe. Men ós nin mo Yefun bi suk-i sane, ndo sa, nin waii ós men su suk gato men yewa, nin syo sugit wa men git e, syur wa men da e ne et.

12Ye yi gato duno nin ndek suk mo nin sa, nin iwa nin ós ye ne su suk gato an ndekwa ne. Sane dom, men do yewa suk yo, ndo sa, nin waii ós men dom et. Sa ndo sa, nin iwa ós men wai kadit ye yi ne o re, we men ós nin su ketke. Sarewo men yo ndek suk yo mo nin nde tó. Kapre men yewa suk, men misyar sor, men yo ndek suk mo nin nde, sawe men ndek suk mo nin, bere nin bariwa jammo sukdu subot os ndo gato Yesus Kristus kak wa men yetu, gato men duno nin su ne.

13Nin jam do, ye gato ben suk mo Yefun Allah bi nu, bere án ku sugit mone. Sane dom, ye gato fro suge wa yé gre mo bot wa yé som Yefun Allah su mo bi bot kot ne, bere án ku suge ku ne napyo wa án git mone.

14Sane dom, men bi Yekwesu ki do, yé gato duno nje subot os ndo gato Yesus Kristus kak ne, bere yé ne ku suk gato án yewa ne kadit nje gato án duno ne sor.

15Kapre Yefun syogat ji nai suk mo nin, ji yo ben sane mo nde. Surat gato ji krom ré, ji yo krom wa ji ndek suk yo mo nin dom nde. Ji kwop anato ndo wai kadit ji ndek suk mo nin, we ji do ndek suk mo nin yo, bere ji yo ku os wa ji mit at mone o nde.

16Sarewo ji ki sukdu subot os ndo gato Yesus Kristus kak wa men yetu ne yo, ji yo ku os wa ji mit at mone nde, we Yefun dakai syogat ji duno nje sane it. Ji yo duno nje sane nde yo, bere ji ku sukye.

17Sato ji dakai sor anato iwa duno nje subot Yefun Yesus yo, bere ji mit wa nje syo suk mo ji bi kamba mone. Sarewo ji duno nje subot os ndo gato Yefun Yesus kak ne, we Yefun Allah syogat ji ben ne sor re. Sane ji ben sor, ji yo bi sukjimnut wa ji ndek mo nje wa án syo suk yo nai ji nde.

18Sane bere ji ku suma mo suk gato ji ben ne? Suk gato ji ku anare: Ji duno nje su sukdu subot os ndo ne dakai yi sor. Ji da bi os wa ji ndek suk mo nje gato ji duno ne, sarewo ji misyar re. Ji dakai mit iwa ji duno nje, wo ji yo ndek suk mo án nde.

19Ji ré, suk yo jom ji mo nde, yetu yo jom ji dom nde, sarewo ji ben ji nggwa tepsu pakwerut wa yé mwa, subere ji kar yé mwa ma mo Yefun Yesus.

20Ji duno ye Yahudi ne yo, ji ben ji nggwa tepsu ye Yahudi, subere ji kar ye Yahudi ma mo Yefun Yesus. Sane dom, ji duno ye gato jom Musa bi sukduno-i ne yo, kapre ji yo jom Musa bi sukduno-i o nde, ji dakai ben ji nggwa tepsu ji benbot Musa bi sukduno-i ne sor, subere ji kar ye gato jom Musa bi sukduno-i ne ma mo Yefun Yesus.

21Sane dom, ji duno yewis yi gato ye Yahudi nde ne yo, ji ben ji nggwa tepsu án mone dom, ji si án yo, ji ben sato misyar Musa bi sukduno-i or re. Ji ben sane subere ji kar yewis yi ne ma mo Yefun Yesus. Kapre ji ben sane, ji yo misyar Yefun Allah bi sukduno-i nde, wo ji benbot Yefun Allah bi sukduno-i gato Yesus Kristus duno men su ne petok sor.

22Sane dom, ji duno ye gato bi sukjimnut mo án mit yo nggi nde yo, ji ben ji nggwa tepsu án mone, subere ji ós ye gane brek kadit os ibit ete jammo Yefun Yesus dom et. Sane, ji duno nje yo, ji meret os sare do, ji ben ji nggwa tepsu nje mo nat ne, subere ji kar ye ne napyo ma mo Yefun Yesus.

23Ji ben suk mwa ré subere yé mwa sibot os ndo gato Yesus Kristus kak ne, subere ji si ye gato jammo sukdu ne, men sino ku suk gato ndo kadit Yefun mone.

24Men sino jam do, yé mwa do kas bitanding yu it yo, ye gato kas nggi wai kadit ye yi neya sor ete juara dik, bere ye ne ku hadiah mone. Sane men wergat men nggwa wa men ben suk tepsu Yefun Allah mit, tepsu ye gato kas ne wergat nggwa wa kas nggi subere an ku suk.

25Ye gato fro nggwa wa simo sukkamo bitanding ye yi mone, kamdik-kamdik an wergat an nggwa subere an nggi wai kadit ye yi neya. An ben sane subere an ku hadiah gato, yo nam nde ge, ibit re. Sarewo men wergat men nggwa wa men ben Yefun bi suk-i sane sor, bere men ku suk gato kem to kapyo mato kapyo.

26Sane anato ji kas subot os yo, ji kas subot os sisu ji bi sukjimnut dik wa ji mu kom mo nat gato ji iwa ji mu mone sor. Sane dom ji tepsu ye gato tut ye yi it yo, ji wergat ji nggwa subere ji tut siri wam dik yo dom nde.

27Ji duno ye yi sisu ji mit dik si ji onyar dik subere án jammo Yefun Yesus bi sukduno-i. Sane kamdik-kamdik ji mewa ji nggwa petok sor, subere ji benbot sukduno ne dom. Ben sato ji gwa ji dakai subere ji tepsu pakwerut wa benbot sukduno gato ji duno ye yi su ne. Sane bere ji waii ku suk gato Yefun Allah tom su ye gato ben Yefun Allah bi suk-i ne dom, wo ji duno nje, orete ji dakai yo benbot nde, bere ji yo ku suk gato Yefun fro wa men dom nde.


  Share Facebook  |  Share Twitter

 <<  1 Korintus 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran