Alkitab Mobile SABDA
[VER] : [ABUN]     [PL]  [PB] 
 <<  1 Timotius 2 >> 

1Nan jambot suk gato ji krom ré et. Ketke, men ndek suk mo Yefun Allah yo, men ki ndo mo Yefun, ete men ki suk su Yefun wa yé mwa mo bur ré or sino.

2Men ki suk su Yefun Allah wa men bi yekwesu si yepasye bok ne sino mo bur ré, subere yekwesu ne jom men sisu ndo, subere men kem not, subere men kem ndo su yu, men ben men bi suk-i tepsu Yefun mit, men ben men bi suk-i ne ndo petok sor.

3Men ki suk su Yefun wa yepasye ne yo, Yefun Allah gato fro os ndo wa men kem ndo to kapyo mato kapyo, Yefun Allah ne mit iwa.

4Yefun Allah iwa men yetu mwa ne sino si An kem ndo to kapyo mato kapyo. An iwa men sino jam An bi sukdu gato sangge.

5Yefun Allah ne ka dik sor. Ye gato tepsu yegweswai wa men si Yefun Allah ne ka dik sor. Yegweswai ne gum do Yesus Kristus.

6An bi An nggwa wa tot suktot mo sukibit gato men yetu sino ben ne wé re. Sane tepsu bi kam gato Yefun Allah fro ne, Yefun Yesus kak os ndo ne wa yé mwa ne sino ku os wa kem ndo to kapyo mato kapyo re.

7Sane anato Yefun Allah bes ji gum yerasul wa ji mu ki sukdu ne frekbot nje. Sangge, ji yo kidar nde, Yefun Allah syogat ji mu wa ji ki subot sukdu ne nai ye Yahudi sor nde, wo An syogat ji mu wa ji ki subot sukdu ne nai yewis yi neya mo bur ré jam.

8Ji mit iwa yebris jammo sukdu ne mo pe mwa ne sino, ete án bes án syim, án ki suk su Yefun Allah su án mit dik án onyar dik, ete án maskwa ket ye yi nde, án duwer ye yi kete dom nde.

9Sane nggón mwa ne sino dom, ji mit iwa nggón ne it san gato tep yi sor. Nggón it san gato bi sugum sye nde. Nggón it san wa ben kidar yebris nde. Nggón mbrau nggwa tep yi sor. Nggón sur sugo ndo teker nde. Nggón mbrau nggwa su emas si mutiara dom nde.

10Nggón werwa án mbrau nggwa teker eta nde, wo nggón werwa ben suk gato ndo sor, tepsu nggón gato onyar kem mo Yefun ne ben re.

11Nggón jammo yé gato duno án su Yefun Allah bi sukduno mo nu ari. Nggón kem not syaretwa sukduno gato yé ki ne sor.

12Ji bariwa ye bes nggón gum kok wa duno yebris su Yefun Allah bi sukduno-i, we yebris yo jammo nggón nde, wo nggón kem not ete jammo sukdu gato yebris duno nggón su ne sor,

13we Yefun Allah ut Adam nyim, orete An ut Hawa wari.

14Sane dom, biris bi yekwesu ben kidar Adam nyim nde, wo biris bi yekwesu ben kidar Hawa nyim, ete Hawa ges mo os ibit re.

15Sarewo ndo sa, nggón kem not, ete nggón pe bi pa-i sor. Nggón pe bi pa-i, ete nggón onyar kem mo Yefun Yesus e, nggón ben Yefun bi suk-i e, nggón bi sukjimnut sye kas subot ye yi e ne yo, bere nggón ne kem ndo to kapyo mato kapyo re.


  Share Facebook  |  Share Twitter

 <<  1 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran