Dual Panel1Men bi nji, men bi nyanggon, men iwa nin jam sukdu subot sukndo gato Yefun Allah ben su yé gato onyar kem mo Yefun Yesus gato sum mo nu ari bok yo mo bur Makedonia et. Yefun Allah ben sukndo su án dakai yi sor.
2Yé gato onyar kem mo Yefun Yesus mo bur Makedonia ne ku sukye gato yé teker wa án. Án ku sukye, án yewa suk ndo nde, sarewo án mit iwa ye yi ndo nde anato án iwa syo suk dakai yi nai yé gato onyar kem mo Yefun Yesus mo bur Yudea. Án syo sukwokgan nde, wo án syo suk mwa nai nje mone.
3Ji ki rer wa nin jam do, án syo suk nai yé gato onyar kem mo Yefun Yesus mo bur Yudea tepsu suk gato án ku ne sor nde, wo án syo wai kadit ne o re. Ye yo ndek mo án subere án syo suk ne nde,
4wo án ki nai men do, men imo yo, án syo suk wa ós nje mo bur Yudea. Án ndek gat men sane sor men imo.
5Án syo suk ne, án syo suk mwa wai kadit suk gato men nut mone. Ketke án bi án nggwa mo Yesus Kristus, orete án bi án nggwa mo men dom, tepsu pe gato Yefun Allah imo.
6Ye gato onyar kem mo Yefun Yesus mo bur Makedonia syo suk mwa dakai yi anato kadum os wa men. Sane anato men syogat Titus gato ketke werwa nin sum sugum subere Titus ba ku nin mo Korintus o. Men syogat Titus ba ku nin, subere an ós nin sum sugum gato nin iwa nin syo nai nje mo bur Yudea, sane sor nin sum sugum kom mo pe gato or mó.
7Nin sa, nin ben nin bi suk-i mwa ne sino ndo wai o re. Nin onyar kem mo Yefun nggi wai kadit ye yi ne o re, nin ki nin bi sukdu-i ndo wai o re, nin bi sukjimnut-i ko wai o re, nin wergat nin nggwa wa nin ben suk mwa ne sino ndo wai o re, nin bi sukjimnut sye kas subot men dom. Suk mwa ne sino nin ben ndo wai o re, sane men kiwa nin waii syo sugum dakai yi nai nje, subere nin ben suk ne ndo wai dom et.
8Ji yo ki sukdu ré tepsu ji syaugat nin nde, wo ji bes sukndo gato nje mo Makedonia ben su ye yi ne, subere ji jam do, nin bi sukjimnut sye kas subot ye yi digane sisu sangge dom bado, nde e?
9Men jam do men bi Yekwesu Yesus Kristus ben An bi suk-i ne ndo dakai yi su men, men yo ben suk yo nyim wa An nde. An tepsu yepasye gato bi suk mwa. An da bi suk mwa, sarewo An ma mo bur ré sa, An bi sukjimnut sye kas subot men yetu anato An ben An nggwa tepsu ye gato yewa suk, subere An kak os ndo wa men, subere ri ma, men ku os wa men ku suk mwa mo Yefun Allah bi de-i o re.
10Ji bi sukjimnut sare do, ndo sa, sugum gato nin fro nggwa wa nin syo nai Yefun bi rus-i mo bur Yudea su tahun gato nyim ne, nin syo sugum ne sor kom mo pe gato nin tom ne et. Nin anato tepsu ye ketke gato fro nggwa wa syo sugum ne sor nde, wo nin tepsu ye ketke wa syo sugum ne napyo nyim dom re.
11Sane su ré yo, nin sum sugum napta ne sor tepsu suk gato nin ku mone. Nin ku sugum mwa yo, nin syo mwa, wo nin ku sugum wokgan yo, nin syo wokgan. Suga tahun nyim ne, nin mit iwa nin fro nggwa wa sum sugum. Sane su ré nin werwa nin sum sugum napta su nin mit iwa dom et.
12Nin ku sugum mwa yo, nin ku sugum mwa nde yo, suk yo nde, wo suk gato Yefun Allah iwa ne anato nin syo sugum sisu nin mit dik sor, tepsu sugum gato nin ku ne.
13Ji bi sukjimnut sare do, ji bariwa nin syo sugum teker ete nin waii yewa suk ete nje motu ku suk mwa wai. Wo su ré nin ku suk mwa, sane nin ós ye gato yewa suk anato ndo. Kapyo tak, nin do yewa suk it yo, bere ye yi gato ku suk mwa waii ós nin mo suk gato nin yewa ne o re. Sane men sino ós yu su suk gato men ku subere ye yo yewa suk nde.
14(8:13)
15Men ós yu su suk tepsu ye krom mo Yefun Allah bi sukdu sare do, "Ye gato sum suk mwa, bere an bi suk napta ne yo mo nde. Ye gato sum sukwokgan sor, bere an yo yewa suk nde."
16Yefun Allah kak Titus bi sukjimnut subere Titus mit iwa mewa nin, tepsu ji dom mit iwa mewa nin, sane ji un Yefun gum mone.
17Men ndekwa Titus ba ku nin mone sa, Titus yo benbot suk gato men ndekwa an ben ne sor nde, wo an dakai mit iwa ba ku nin mone dom.
18Men syogat yetu ge dik yo simo Titus ba ku nin. Ye ne tepsu men bi nji ge dik yo. An ye gato mu ki subot os ndo gato Yesus Kristus kak wa men yetu, sane anato yé gato onyar kem mo Yefun Yesus mo nu ari bok yo bes an gum kok mone.
19Suk ne sor nde, wo yé mwa mo nu ari ne bes an gum wa an si men gwat sugum gato yé syo ma ne mu mo bur Yudea. Bere an si men mubot os wa men gwat sugum mu kom mo nat gato men mu mone. Men gwat sugum ne mu motu subere yé bes Yefun Allah gum kok. Sane dom, men gwat sugum ne mu subere yé jam do, men iwa ós nje gato yewa suk.
20Men gwat sugum gato yé syo nai men wa men gwat wa nje mo bur Yudea ne yo, men mewa men nggwa sisu ndo, sawe ye yo ku os wa ki men gum ibit mo suk gato men ben su sugum ne.
21Men werwa men ben suk su sugum ne tepsu pe gato Yefun Allah mit iwa sor nde, wo men werwa men ben suk su sugum ne tepsu pe gato yetu iwa ne dom.
22Men syogat men bi yesyim dik yo o si Titus ba ku nin dom. Men watbot ye ne wam bok yo, ete men me do, an sa, mit iwa ós nje petok sor. Su ré an mit iwa an ós nin re, we an mit kam mo nin sare do, bere nin sum sugum gato nin tom suga nyim ne do, bere nin syo nai Yefun bi rus-i mo Yudea. Bere an si yetu ge bok yo ma nai sugum ne, ete án gwat mu mo bur Yudea ne.
23Titus anato ji bi yesyim gato si ji ben suk sino wa ós nin. Ye we gato si an mu ne, yé gato onyar kem mo Yefun Yesus mo nu ari bok yo anato bes ete syogat ye we ne mu. Ye we ne mu wa bes Yesus Kristus gum kok mo suk gato an we ben ne.
24Sane yo, nin mewa an ka gri ne sino, nin ben sukndo su an ka gri subere yé gato onyar kem mo Yefun Yesus mo nu ari mwa ne jam do, nin bi sukjimnut sye kas subot nje tepsu sukdu gato men un nin gum mo yé mwa gwem mó re.