Alkitab Mobile SABDA
[VER] : [ABUN]     [PL]  [PB] 
 <<  2 Timotius 2 >> 

1Timotius, ji bi pa, Yesus Kristus dakai bi sukjimnut sye kas subot men yi, men yo ben suk yo nyim wa An nde, sane nan jom sukdu ne pe subere nan bi sukjimnut nggi mone.

2Sukdu gato nan jam tomgatu ji duno nan mo yé mwa gwem ne, nan waii duno ye gato jam duno ye yi sisu ndo, gato ben bi suk-i ri-roi et, subere án waii duno nje su sukduno ne o.

3Nan dom, bere ku sukye tepsu men. Nan tepsu Yesus Kristus bi yesukmise gato benbot nan bi Yekwesu bi sukdu. Sane nan ku sukye yo, nan misyar Yefun nde, wo nan ben An bi suk-i petok sor.

4Yesukmise gato benbot án bi yekwesu bi sukdu it yo, án yo ben suk yi nde, wo án iwa án ben suk tepsu án bi yekwesu mit sor.

5Sane dom, ye gato simo sukkamo, ete an yo simo tepsu pe gato ye fro ne sisu sangge nde yo, bere ye yo syo suk yo nai an tepsu juara mone nde.

6Ye gato samok wa ben nggwe, ete sukjan mo nggwe ne do kri it yo, an anato mu nai sugit mone nyim kadit ye yi neya.

7Nan nutbot sukdu gato ji krom ne sisu ndo et, bere Yefun Allah kak nan bi sukjimnut subere nan jam sukdu bok ne rer re.

8Nan bi sukjimnut kem mo Yesus Kristus sor. An anato Daud bi dat. An anato sun kadit sukkwop o re. Yesus Kristus ne kak os ndo wa men yetu ne. Ji duno nje subot os ndo ne

9anato ji ku sukye re. Ye rai ji su rantai tepsu ye rai ye gato ben sukibit. Sarewo ye yo bi os wa ye rai Yefun Allah bi sukdu ne su rantai nde.

10Sane sukye bok yo gato ji ku ne, ji misyar, ji duno nje gat sor, we ji bi sukjimnut mo yé gato Yefun Allah fro suga nyim wa An nai sok mo An bi rus-i ne. Ji duno án su sukdu subot Yesus Kristus, subere án kem ndo to kapyo mato kapyo mo os gato Yesus Kristus kak ne. Ji duno án subere án si Yefun Allah kem ndo su yu mo Yefun bi nat-i gato ndo wai o re.

11Sukdu gato ji krom ré sangge, "Men do kwop su Yefun Yesus yo, bere men si An kem ndo to kapyo mato kapyo dom.

12Kapre men ku sukye, men misyar Yefun nde, wo men simo An pe sor, sane yo, bere men si An tepsu yekwesu sino. Men do rewa An yo, bere An rewa men dom.

13Men do misyar An yo, bere An yo misyar men nde, we An mit kem mo men, sane An yo ben suk siri kadit An mit nde."

14Nan ki subot sukdu ré subere yé mwa napawa pe. Nan duyawa nje subere án duwer yu mo sukdu kwa wokgan bok neya nde. Yé duwer yu mo sukdu wokgan sane bere yo ós nje nde, wo yé duwer yu sane bere ben nje ibit mo koirut sor.

15Nan wergat nan dakai subere nan ben Yefun Allah bi suk-i, subere Yefun Allah imo suk gato nan ben ne. Nan wergat nan dakai subere nan damen mo suk gato nan ben nde. Nan wergat nan dakai subere nan duno nje su sukduno gato sangge kadit Yefun Allah sisu ri-roi sor.

16Ye ki subot sukduno gato siri kadit Yefun Allah mit yo, nan si nje kibot sukdu sane nde. Yé gato iwa nukbot sukdu sane yo, bere án ben bi suk-i ibit mwa wai kadit nyim ne o re.

17Sukduno siri gato ye nukbot ne tepsu suki wip mok gato git men ku mbu ete dat sane sor men kwop mone. Ye ka we gato gum do Himeneus si Filetus an we duno nje su sukduno siri sane re.

18An we misyar Yefun Allah bi sukduno-i gato sangge. An we duno nje su sukduno gato siri. An we ki do, yé mwa gato Yefun Allah fro wa sun kadit sukkwop ne, Yefun Allah sun ete gwat mu mo gu or re. Sane an we ki do, bere kam sari ne ma Yefun Allah yo sun ye yi yo o nde. An we duno nje sane anato yé bok yo onyar kem mo Yefun Allah bi sukduno-i ne o nde.

19Sarewo Yefun Allah bi sukduno-i kem pe kadit ketke. Yetu yo nggiwa rus sukduno kwa wokgan yo wé dom nde. Yefun Allah bi sukduno-i tepsu nu bi pondasi gato ye ut mo bur ketke wa ye syut kwedi mó. Mo pondasi mo bur ne ye krom do, "Yefun Allah jam ye gato sok mo An bi rus-i." Ye krom o do, "Ye gato ki rer do, sangge an sok mo Yefun Allah bi rus-i yo, an kwet kadit sukibit mwa gato an ben suga nyim ne wé et."

20Mo nu sye mit sagana ye grem suk mwa sato, mbem e, brek e, ansyok e ne. Suk mwa ne ye ben deyo su perak e, deyo su emas e, deyo su bur ndak e, deyo su kwe e ne. Suk ne deyo ye ben suk su kamdik-kamdik sor. Suk ne deyo ye fro wamdik-wamdik wa yepasye ma git mó.

21Ye gato mewa nggwa kadit an ben sukibit mwa neya, an tepsu mbem gato tep wa yepasye git mone. Ye gato mewa nggwa sane, an tepsu an bi yenggras bi suk-i gato yenggras grem wa ben suk gato ndo su. Yenggras ne grem ye ne kem ndek sane sor yenggras ne iwa ben suk gato ndo, ete yenggras nai ye ne wa ben suk ne.

22Nan ben suk tepsu yemsok gato at wa sukdaret ne nde, nan misyar, nan mu tara kadit re. Nan wergat nan dakai subere nan ben nan bi suk-i ndo tepsu Yefun Allah mit sor. Nan wergat nan dakai subere nan ben suk tepsu ye gato onyar kem mo Yesus Kristus. Nan wergat nan dakai subere nan bi sukjimnut sye kas subot ye yi neya. Nan wergat nan dakai subere nan si ye yi kem ndo su yu. Nan grem sukmaskwa mo nan mit nde. Nan si ye gato onyar kwo gato ndek Yefun Allah wa ós án ne ben suk sane sino sor.

23Nan me ye gato jimgon duwer yu mo sukdu daret it yo, nan si ye ne duwer yu mo sukdu ne nde, we nan jam do, kom mo rut bere ye maskwa ket yu mo sukdu ne or re.

24Men yé gato ben Yefun Allah bi suk-i, men ki men bi sukdu-i it yo, men maskwa su nde, wo men ki men bi sukdu-i ne njep su yé mwa ne sino. Men duno nje sisu ndo, men duno pare, men maskwa kekro nde.

25Men duno nje gato duwer men it yo, men duno sisu njep sor. Men duno sisu njep, we men iwa kapyo tak Yefun Allah kak ye ne bi sukjimnut subere an kwet kadit os ibit, ete an jammo sukdu gato sangge.

26Men duno an sisu njep subere an jam nggwa, ete an simo sukduno gato sangge, subere an titi fro wé kadit biris bi yekwesu gato but an wa ben biris bi suk-i ne.


  Share Facebook  |  Share Twitter

 <<  2 Timotius 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran