Alkitab Mobile SABDA
[VER] : [ABUN]     [PL]  [PB] 
 <<  Efesus 4 >> 

1Sane, ji gato gum do Paulus ré, gato yé bok mo sel, we ji ben Yefun bi suk-i, ji ki sare do, Yefun Allah nai nin wa nin sok mo An bi rus-i tepsu An bi pá-i. Sane nin ben suk tepsu Yefun bi pá-i ne et. Nin jammo suk gato ji ki ré et.

2Nin ben nin bi suk-i ne, nin bes nin nggwa kok nde, wo nin ben nin nggwa ga tepsu pa wokgan et. Nin ben nin bi suk-i ne njep petok sor. Suk gato nin ku nde tó, nin eswa sor, nin maskwa kekro subot suk ne nde. Ye yi ben suk yo gato tepsu nin mit nde yo, nin nutbot suk sane o nde, wo nin bi sukjimnut sye kas subot yu, nin ben sukndo su yu sor.

3Yefun Allah Gen ós nin kem ndo anato nin tepsu yedik. Sane nin wergat nin nggwa subere nin si yé mwa ne sino kem ndo su yu, subere nin maskwa ket yu mo kwa dik yo dom nde.

4Men yé gato sok mo Yefun bi rus-i ne sino tepsu rus dik, men sino tepsu kaim dik it. Sane dom Yefun Allah Gen ne dik sor. Sane o, men sino kwabom kam mo Yefun do, os dik gato Yefun fro wa men sok mo An bi rus-i ne anato os gato sangge ne it. Os ne dik sor.

5Men bi Yekwesu ne, dik sor. Yefun bi os-i gato men onyar kem mone dik sor. Men onyar kem mo Yesus Kristus ge dik ne anato ye ras men mo syur wam dik ne sor.

6Men sino bi Ai mo Yefun Allah ka dik ne sor. An anato Yekwesu mo suk mwa ne sino, An nggi wai kadit yesu mwa neya o re. An ben An bi suk-i mo bur ré su men sino. An kem mo men sino mit re.

7Men kadik-kadik ku suktinggi gato Yesus Kristus syo yi nai men tara kadit yu re. Suktinggi bok ré, men ku tepsu pe gato An dakai nai sukjimnut wa syo nai men re.

8Tepsu ye krom mo Yefun bi sukdu-i ne do, "An it mu mo pe gato kok wai sa, An gwat yé gato An but mu mone or, An syo suktinggi bok yo yi nai men yetu mo bur ré re."

9Sane sukdu gato ki do, "An it mu mo pe gato kok wai ne" te, bi sukjimnut sa u ne? Sukdu ne bi sukjimnut do, An it nde tó, An is sor kom mo bur ré desnak nyim wé re.

10Yesus Kristus dakai anato is kom mo bur ré desnak re, ete An waii it satu o. An it sane sor kom mo pe gato kok wai o re. Sane mo bur ré si gu nim ne, mo pe mwa ne sino, An kom mo pe mwa ne or re.

11An anato syo suktinggi bok yo nai men yetu mo bur ré subere men nggiwa ós An bi rus-i sato ré: deyo An bes gum yerasul gato ben Yesus Kristus bi suk-i win An mo bur ré; deyo o An bes gum yenabi gato gwat Yefun bi suktaru ma; deyo o An bes wa mu ki sukdu subot Yesus Kristus; deyo o An bes gum yekwesu wa mewa An bi rus-i; deyo o An bes gum yeguru wa duno An bi rus-i.

12Yesus Kristus syo suktinggi ré nai men, subere ós men fro Yefun bi rus-i wa ben An bi suk-i mo bur ré, subere Kristus bi rus-i bi sukjimnut kem mo Yefun nggi wai o,

13sane sor, men sino onyar kem pe mo An, ete men jam Yefun Allah bi Gan sisu ndo, subere men sino tepsu dik it. Sane dom, bere An bi suktinggi gato An syo nai men ós men, ete ben men bi sukjimnut kak mo Yefun bi suk-i ne mwa wai o re. Or o bere men ben men bi suk-i tepsu Yesus Kristus dakai.

14Sane bere men bi sukjimnut tepsu pa wokgan o nde. Yé gato werwa ben kidar men su bi sukduno gato siri, án syeret os wa men, sarewo bere yé ne yo ku os wa tik men muya-muma saga sem bak si nofuf gwat kwem muya-muma ne o nde.

15Men yo kidar suk sane nde, wo men ki men bi sukdu-i ri-roi sor. Men bi sukjimnut sye kas subot ye yi anato men kidar suk wokgan yo dom nde, wo men ki men bi sukdu-i ri-roi, subere men ben men bi suk-i tepsu Kristus ben An bi suk-i mwa ne sino. Kristus anato tepsu yetu su mo kaim.

16Men anato tepsu yetu gwes e, syim e, tunap e ne mo kaim ne. Men dini rit ne ós jom men kaim ne tok yu krat ete ut mo men su. Men su anato Kristus. An jom pe mwa mo kaim ne sino subere men tepsu dik wa men ben Yefun bi suk-i. An jom men, sane bere suk gato men ben ne kas sisu ndo, bere men bi sukjimnut sye kas subot yu mwa o mone, gedik-gedik dakai ben bi suk-i tara kadit yu nde, wo men ben suk mwa ne wa men kaim kom sye o, nggi o sor.

17Sane nin jammo sukdu gato ji ki ré et, ji dakai bi sukdu-i anare nde, wo men bi Yekwesu Yefun Yesus anato syogat ji krom sukdu ré wa nin benbot et. Nin ben suk tepsu yé gato jam nde Yefun o nde. Yé gato jam nde Yefun bi sukjimnut yo kom mo pe yo nde.

18Yé ne bi sukjimnut yo kas ri o nde. Án su krat anato án jam nde sukdu subot Yefun Allah, án jam wokgan yo dom nde. Sane án jam nde os gato Yefun Allah kak wa ós án kem ndo ne.

19Án jam nde án damen re, sane án ben sukdaret ket án i sor re. Án werwa án ben siri ket án i sor, án yo mewa án nggwa wokgan yo dom nde. Án da bro wa nggon petok sor, án mit iwa ben siri bu.

20Sarewo nin jam sukdu subot Yesus Kristus sane anato nin jam do, Kristus yo iwa men ben sukdaret sane nde, nin dakai jam re.

21Nin onyar kem mo An, sane nin jam sukdu subot An mó re. Yé duno nin su sukdu gato sangge mó re anato nin jam suk gato An iwa nin ben ne.

22Sane suk gato nin ben nyim neya, nin bare wé et. Su kam nyim nin sibot nin dakai bi sukjimnut daret. Sukjimnut ne gwat nin ges mo os ibit mo koirut, sane nin bare sukjimnut ne wé et.

23Sane nin bare nin bi sukjimnut daret nyim ne wé, ete nin bi nin nggwa wa Yefun Allah Gen win nin bi sukjimnut su dogato be o et,

24subere nin tepsu ye gato be, sukibit gato nin ben suga nyim ne, nin yo iwa ben o nde. Yefun Allah ut nin tepsu ye gato be, subere nin benbot suk gato An dakai ben ne. Sane bere nin ben sukndo tepsu Yefun Allah mit, ete nin ben suk gato ndo petok sor, kwa gato ibit yo mo nde.

25Sane yo, nin sino kidar yu o nde, wo nin ki nin bi sukdu-i ri-roi nai yu sor, we nin sino tepsu yedik mo Kristus bi rus-i it.

26Nin maskwa yo, nin ben sukibit su nde. Tepsu kam bok nde tó, nin kibot sukmaskwa ne or wé kadit nin et. Nin maskwa o nde,

27subere biris bi yekwesu yo ku os wa gwat nin ges mo os ibit nde.

28Nin yé gato syimsi suk, nin ben sane o nde, wo nin ben nin bi suk-i ri-roi sor. Nin ben suk nin kamba mó et, subere nin ku suk gato nin mitmo ne, ete nin ku suk napyo o wa nin ós ye gato yewa suk su dom et.

29Nin ki subot sukdu yo, nin ki subot sukdu gato ibit su nje nde, wo nin ki subot sukdu gato ndo wa ós nje su et. Nin ki suk yo, nin ki sukdu gato ós yé gato ku sukye, subere án mit at mo sukdu gato nin ki ne.

30Nin ki suk yo, nin ki sukibit gato ben Yefun Allah Gen baoku nin mone nde, we Yefun Allah Gen ós nin jam rer do, nin sa, sok mo An bi rus-i. Sane bere nin jam rer do, Yefun Allah Gen mewa nin sor kom mo kam gato An nai nin wé kadit sukye, ete gwat nin sok mo An bi nat-i. Mone bere nin kem ndo to kapyo mato kapyo.

31Nin grem sukmaskwa mo nin mit o nde. Nin on sa ket yé yi o nde. Nin maskwa ket yé yi o nde. Nin saiye ket ye yi nde. Nin ki ye yi gum ket kwayo-kwayo nde. Nin iwa nin ben sukibit wisyo-wisyo nai ye yi o nde, wokgan yo dom nde.

32Nin ben suk sane nde, wo nin ben sukndo su yu, nin dakai jimnotku yu, nin maskwa mo sukibit gato ye yi ben ma nai nin o nde, nin nutbot o nde, tepsu Yefun Allah yo maskwa nin mo sukibit gato nin ben ma nai An nde, An yo nutbot o nde. An syo Kristus ma tepsu suktot subere nin bi sukibit ne or wé kadit nin it.


  Share Facebook  |  Share Twitter

 <<  Efesus 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran