Alkitab Mobile SABDA
[VER] : [ABUN]     [PL]  [PB] 
 <<  Efesus 5 >> 

1Men anato Yefun Allah bi pa-i gato An jimnotku ne. Sane men werwa men ben suk tepsu An ben ne et.

2Men kem mo bur ré, men bi sukjimnut sye kas subot ye yi sor, tepsu Kristus bi sukjimnut sye kas subot men, ete An bi An nggwa wa men. An bi An nggwa tepsu suksom gato An som Yefun Allah su, ete mone An tot men bi suktot. Yefun Allah iwa suk gato Kristus ben ne, tepsu ye iwa ni suk gato grik. Sane men waii bi men nggwa wa men ós ye yi su ne sor.

3Men sok mo Yefun Allah bi rus-i it, sane men mewa men nggwa kadit men ben siri su yu nde. Sane dom, men mewa men nggwa subere men da bro wa ben sukdaret su yu nde. Men gro sye wa men nai suk mwa wa men dakai nde. Men ben sukdaret yo, bere siri kadit Yefun Allah bi os-i. Sane men ben sukibit sane wokgan yo dom nde, subere ye yi ku os wa ki men gum ibit mone nde.

4Sane dom, men njak ye yi nde, men ki sukdaret nde, men ki sukdu gato ibit nde. Men tepsu Yefun Allah bi rus-i, sane men do ki suk sane, bere siri re, wo ndo sa, men ki ndo mo Yefun Allah mo suk mwa gato An ben ne sor.

5Men jam rer do, yebris si nggon gato ben siri su yu daret e, ye gato da bro wa nggon e, nggon gato da bro wa yebris e, ye gato gro sye wa nai suk mwa wa an dakai (ye gato ben suk gare yo, ye ne bes sukdaret sye wai kadit Yefun Allah o re). Ye gato ben bi suk-i sane, bere an yo sok mo rus gato Yefun Allah si Yesus Kristus jom ne nde.

6Ye yi do ma werwa kidar nin subere nin misyar sukdu gato ji ki ré subot Yefun bi sukdu-i ne yo, nin jambot nde, we ye gato ben bi suk-i siri kadit Yefun Allah bi sukdu-i ne, bere an ku sukmaskwa kadit Yefun Allah.

7Sane nin si ye gato ben bi suk-i daret ne ben suk sino dom nde.

8Kam nyim tuya nin dakai kem mo ndendu, wo su ré nin sok mo Yefun Allah bi rus-i, sane anato nin kem mo pe gato nden rer it. Sane nin ben nin bi suk-i tepsu yé gato kem mo pe gato nden rer ne sor.

9Nin kem mo pe gato nden rer it yo, bere nin ben nin bi suk-i ne ndo bor wa nje me, tepsu kwe syesyar i-bo, bere nin ben suk sato ré: nin ben sukndo su nje, nin ben nin bi suk-i ndo tepsu Yefun Allah mit, nin ben nin bi suk-i ri-roi sor.

10Nin werwa nin jam suk gato Yefun Allah iwa nin ben ne et.

11Suk gato tepsu ndendu bi suk-i gato yo ós nin nde, nin karowa dom nde, wo nin ki ndendu bi suk-i ne rek subere bor wa yé mwa jam do, suk ne ibit re.

12(Nin do ki sukibit gato ye ben gurik ne rek mó yo, bergan nin damen teker wa nin ki kom mone.)

13Sarewo sukndo gato nin ben ne tepsu sukru gato rer ete bere kadum sukibit ne bor wa yé mwa jam, ye yo ku os wa gurik sukibit ne o nde,

14we sukru rer ku suk mwa ne sino yo, bere ben sukibit ne rer wa men jam kom mo mit re. Sane ye ki do, "Nin yé gato sem ne, nin sun tom! Tepsu nin sun satu kadit sukkwop, bere Kristus tepsu sukru rer ku nin."

15Sane nin mewa nin nggwa subere nin ben sukndo mo bur ré sor. Nin ben suk tepsu ye gato jimgon nde, wo nin ben suk tepsu ye gato jam suk mwa ko et.

16Su ré, yé ben sukibit mwa, wo nin ku os wa nin ben suk gato ndo yo, nin werwa nin ben sor.

17Sane, nin jimgon nde, nin jammo yetu bi sukdu-i nde, wo nin werwa nin jammo suk gato men bi Yekwesu Yesus Kristus iwa nin ben ne et.

18Nin da nau, nin yenau nde, we bere nau ben nin ibit. Nin bi nin nggwa wa nau jom nin nde, wo nin bi nin nggwa wa Yefun Allah Gen bok nggwa mo nin ete jom nin anato ndo.

19Nin ki suk su yu yo, nin nai sukdu kadit Mazmur e, nin nai sukdu kadit sukos gato yé un Yefun su e, nin nai sukdu kadit sukos subot Yefun e ne sino, ete nin ki sukdu sane nai yu et. Nin kos nin un men bi Yekwesu su nin mit dik si nin onyar dik et.

20Men bi Yekwesu mo Yesus Kristus, sane anato nin ki ndo mo nin bi Ai Yefun Allah mo suk mwa gato An ben mo bur ré petok sor.

21Nin jammo Kristus, sane yo nin waii jammo yu dom et.

22Nggon kra, nin jammo nin bi ya tepsu nin jammo men bi Yekwesu Yesus Kristus et,

23we yebris anato yekwesu wa bi nggon saga Kristus anato Yekwesu wa mewa men sino gato onyar kem mo An. An dakai anato Yekwesu gato kak os wa men kem ndo to kapyo mato kapyo.

24Sane, tepsu men sino gato onyar kem mo Kristus jammo Kristus, sane dom nggon jammo bi ya mo suk mwa ne sino sor.

25Nin, yebris gato kra, nin bi sukjimnut sye kas subot nin bi nggon sor, tepsu Kristus bi sukjimnut sye kas subot men sino gato onyar kem mo An ne. Nin, yekra, nin bi nin nggwa wa nin bi nggon tepsu Kristus bi An nggwa wa men sino gato onyar kem mo An ne.

26Kristus bi An nggwa wa nai sukibit wé kadit men. An bi sukduno tepsu syur gato An de mo men wa rus sukibit wé kadit men re. Sane An fro men wa men sok mo Yefun Allah bi rus-i.

27Sane anato Kristus fro men sino gato onyar kem mo An ne kwo ndo mo An dakai gwem. An fro men subere men da ibit nde, men dini bor mo nde, men brot bor mo nde, men wip no mo nde, suk yo gato ibit mo men kaim ne yo mo nde, wo suk mwa mo men kaim ne ndo sino. Yesus Kristus bi sukjimnut sye kas subot men digane.

28Sane dom, yekra bi sukjimnut sye kas subot an bi nggon tepsu an bi sukjimnut sye kas subot an dakai kaim-i ne et. Ye gato bi sukjimnut sye kas subot an bi nggon it yo, tepsu an bi sukjimnut sye kas subot an dakai it anane.

29(Ye gato bariwa an mewa an kaim-i ne, ye gato ben bi suk-i sane yo mo nde, wo yé mwa ne sino mewa án kaim re. Yé mwa ne sino meret sugit wa án git, yé mwa ne sino mewa án kaim tepsu Kristus mewa ye gato onyar kem mo An.

30Men jam it, Kristus mewa men yé gato onyar kem mo An, we men anato tepsu An gwes e, An syim e, An tunap e ne mo An kaim-i ne.)

31Ye krom mo Yefun Allah bi sukdu do, "Sane yebris bere mu kadit an bi ai si an bi im, ete an si an bi nggon kem tepsu yetu ge dik sor, we ye we gato kra ne, an we tepsu dik it."

32Yefun bi sukdu kwa gane bi sukjimnut-i ne kru yé. Sukdu ne bi sukjimnut subot Kristus si men sino gato onyar kem mo An.

33Suk ne sor nde, wo sukdu ne bi sukjimnut wa nin yekra si nin bi nggon dom. Sane nin yekra ne sino bi sukjimnut sye kas subot nin bi nggon tepsu nin bi sukjimnut sye kas subot nin dakai et. Sane dom, nggon ne sino werwa jammo bi ya sor.


  Share Facebook  |  Share Twitter

 <<  Efesus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran