Dual Panel1Ji ku Petrus mo Yerusalem, or tahun musyu dik sop at o, ete ji si Barnabas mu mo Yerusalem o. Sugane Titus si dom.
2Yefun Allah kadum rer nai ji do, An syogat ji mu mone anato ji mu ne. Ji si yé bok gato gum yekwesu ne sum dor kadit ye yi neya, ete ji ki rer subot os ndo gato Yesus Kristus kak ne. Ji ki rer subot sukdu gato ji duno yewis yi neya su ne. Ji ki rer wa yekwesu bok ne jam, sawe ji bi sukdu-i napyo siri kadit yekwesu bok ne bi sukjimnut-i, wo sukdu ne tepsu án mit re, yekwesu ne yo duwer ji mo nde.
3Titus gato si ji ré, kapre an ye Yunani gato yo simo sunat nde, yekwesu mone yo wergat Titus wa ye bisunat an dom nde.
4Sarewo ye deyo werwa ye bi sunat Titus. Yé ne ben kidar do, án si men ye gato onyar kem mo Kristus tepsu dik sino, sarewo án mit-i tara kadit men mit-i re. án syeret os wa jam suk gato men ben ne kom mo mit. Men yo jambot sukduno gato rok ne o nde, we men sok mo Yesus Kristus bi rus-i. Sane án syeret os wa jam suk gato ben anato men yo jambot sukduno gato rok ne o nde. Yé ne iwa meret os subere tik men sino brek satu ma tepsu pakwerut wa sukduno rok ne o re.
5Sarewo men yo iwa jammo án bi sukdu-i wokgan yo dom nde. Men wergat men nggwa subere men yo fros sukdu rok si sukdu gato sangge subot os ndo gato Yesus Kristus kak ne nde, subere sukdu gato men duno nin su ne sangge sor, kwa wokgan gato siri yo mo nde.
6Ji mu ku yekwesu bok gane mo Yerusalem sa, ji yo bes yekwesu ne gum kok teker nde, ji yo nutbot án gum teker nde. Yefun Allah dom, An yo bes yekwesu ne gum kok mo suk gato yetu me mo de nden ne dom nde. Yekwesu bok gato sum mone jam ji bi sukdu-i, ete án yo duwer ji mo sukdu kwa dik yo dom nde, wo yekwesu ne imo.
7Yekwesu ne yo duwer ji mo nde, wo mone án jam do, Yefun Allah anato bes ji wa ji mu ki sukdu subot os ndo gato Yesus Kristus kak ne nai yewis yi jam, sato Yefun Allah dakai bes Petrus wa mu ki subot sukdu ne nai ye Yahudi.
8Sane Yefun Allah syo suktinggi nai Petrus, subere Petrus mu ki An bi sukdu nai ye Yahudi. Yefun Allah bes an gum yerasul wa ye Yahudi. Sane dom, Yefun Allah waii syo suktinggi nai ji, subere ji mu ki An bi sukdu nai yewis yi neya. Yefun Allah bes ji gum yerasul wa yewis yi.
9Ye gato ye bes gum yekwesu mo nu ari, an ka gri gato gum do Yakobus, Petrus si Yohanes, an ka gri jam do, Yefun Allah bes ji wa ji ben Yefun bi suk-i sane anato án ka gri jom syim su ji si Barnabas, we an ka gri si men ka we tepsu dik wa men sino ben Yefun bi suk-i. Sukdu gato men kibot ne, men sino imo, sare do, án ka gri ne mu duno ye Yahudi, wo ji si Barnabas mu duno yewis yi.
10Sukdu kwa dik yo o gato án ka gri ki nai men anare, men napawa men ós ye gato yewa suk petok sor. Ji dom mit iwa ji ós ye gato yewa suk wai o re.
11Petrus ma ku ji mo kota Antiokhia sa, ji duwer an mo suk gato an ben mone, we sangge suk gato an ben ne ibit re.
12Tomgato Yakobus bi nje-i yo ma nde tó, Petrus si yewis yi git sugit sino. Petrus si yewis yi kamo sino, wo Yakobus bi nje-i ne ma kom mone sa, Petrus brek nden we o re. An yo karowa yewis yi ne o nde, we an nokwa Yakobus bi nje-i gato ma ne. An nokwa Yakobus bi nje-i gato bi sukjimnut sare do, yewis yi gato simo Kristus it yo, ye bisunat, ondeyo men karowa yé ne nde.
13Ye Yahudi ge bok yo dom brek nden we sato Petrus ben ne, sane sor os ibit ne waii farket Barnabas dom.
14Ji do me suk gato Petrus si ye Yahudi gane ben ne siri kadit Yesus Kristus bi os-i sa, ji ki Petrus mo yé mwa gwem do, "Nan ye Yahudi, sarewo nan misyar ye Yahudi bi sukduno-i, ete nan ben suk tepsu yewis yi o re. Suk gato nan ben ne da ndo, sarewo suma ben anato nan wergat yewis yi brek ma ete jammo ye Yahudi bi sukduno-i gato nan misyar wé ne?"
15Men bi amui, yewis ye Yahudi. Men ye Yahudi nut do, men yo ben sukibit mwa teker sato yewis yi ne nde.
16Men da ben sukibit yo mwa mo nde, sarewo men ben suk tepsu ye Yahudi bi sukduno-i gato Musa krom ne, bere men yo ku os wa Yefun Allah nai men gum sok mo An bi rus-i nde. Wo men onyar kem mo Yesus Kristus sa, bere Yefun Allah nai men gum sok mo An bi rus-i it. Sane su ré, men dakai dom, men onyar kem mo Yesus Kristus ne it, sane Yefun Allah nai men sok mo An bi rus-i re, we men onyar kem mo ye Yahudi bi sukduno-i nde, wo men onyar kem mo Yesus Kristus sor, we sare, ye gato werwa benbot ye Yahudi bi sukduno-i sor re, bere ye ne yo ku os nde, yetu ge dik yo dom nde.
17Men onyar kem mo Yesus Kristus, ete mone Yefun Allah nai men sok mo An bi rus-i. Sane men do ben suk yo gato ibit mó tó yo, Yesus Kristus anato syokom men ben sukibit ne tó, bado? Nde re!
18Ji do bes ye Yahudi bi sukduno-i gato ji misyar ne satu o yo, bere mone yé jam rer do, ji anato ye gato ben suk siri kadit Yefun mit it anane.
19Wo ye Yahudi bi sukduno ré, ji yo jom o nde. Sukduno ne ben sukye wa ji sane sor, su ré ben sato ji kwop kadit sukduno ne re. Su ré sukduno ne yo jom ji o nde, sane ji ku os wa ji ben suk wa Yefun Allah.
20Ben sato ji si Yesus Kristus kwop sino mo kwesukwin it. Sane ji dakai anato kem ré nde, wo Yesus Kristus anato kem mo ji mit. Ji onyar kem mo Yefun Allah bi Gan gato bi sukjimnut sye kas subot ji ete bi An nggwa kwop wa ji anato ji nggiwa ji kem mo bur ré re.
21Ji yo misyar os ndo gato Yefun Allah fro wa men yetu nde. Yefun Allah dakai syogat An bi Gan ma wa men, men yo ben suk yo nyim wa An nde. Sane men nut do, men jammo ye Yahudi bi sukduno-i anato Yefun Allah nut mo men do, men sa, tep wa An nai men sok mo An bi rus-i ne yo, bere siri re. Men do sok mo Yefun Allah bi rus-i mo suk gato men ben tepsu ye Yahudi bi sukduno-i ne yo, Kristus ma kwop wa suma ne? Men yo mitmo An nde fe!