Dual Panel1Men ben sukndo su yu petok sor tepsu men yedik et.
2Men me yemabe gato men jam nde yo, men kendo ye ne ma si men git sugit sino mo men bi nu-i et, men bariwa ye ne nde, we yé bok yo da kendo yemabe ma si án git sane mó re, wo yemabe ge yo, yetu nde, wo yemabe ge bok ne malaikat, sane ye ne da si malaikat git sino, sarewo án jam nde re.
3Men napawa yé gato mo sel mit, men bi sukjimnut kas subot án. Men bi sukjimnut subot yé ne do, ben sato men si án kem mo sel mit ne sino, sane men kwabom dek bot án ndo nde. Sane dom, men nutbot yé gato ye ben sukibit nai ket kwayo-kwayo. Men nutbot yé ne do, ben sato men si yé ne ku sukye sino, sane men kwabom dek bot án ndo nde.
4Yetu ge we kra yu it yo, suk ne ndo wai, sane men sino mewa sukra sisu ndo sor. Yebris si bi nggon bi nggwa nai yu sor re. Yebris si bi nggon ne bi nggwa nai ye yi yo dom nde, we ye ben suk siri sane it yo, bere Yefun Allah syo sukye nai ye ne. Sane dom, bere Yefun Allah syo sukye nai yé mwa ne sino gato ben siri.
5Men gro sye wa sugum nde, sawe bere men gum kwerut wa sugum or re. Suk sane yo ós men nde, wo sa ndo sa, suk gato men ku ne, men nut do, tep mone it, we Yefun Allah dakai sisu men petok sor, tepsu An ki do, "Ji yo misyar nin nde, Ji yo mu kadit nin nde."
6Sane men mit kem pe mo sukdu sare do, "Yefun Allah gato gesyos ne anato sisu ji, sane ji yo nyuwa suk daret nde. Yetu nggiwa ben sukye teker sato suma nai ji ne? Ji yo nyu nde."
7Men napawa men bi yekwesu bok yo gato ki Yefun Allah bi sukdu nai men jam. Suk gato men bi yekwesu ben mo bur ré sor kom mo kam gato án kwop su ne, men nutbot sisu ndo et. Men nutbot suk mwa gato án ben ne, án tepsu ye gato onyar kem mo Yefun. Án nut do, suk gato Yefun Allah ki ne sangge anato án jammo Yefun Allah. Sane men waii benbot suk gato án ben ne dom et.
8Kadit kam nyim, su ré, sor kom mo kapyo mato kapyo, Yesus Kristus ben An bi suk-i ne tepsu yu sor, An ben An bi suk-i tara mo nde.
9Sane men jammo sukdu daret gato tara kadit Yefun Yesus bi sukdu-i ne nde, sawe sukdu ne gwat men mu mo os siri kadit Yefun bi os-i. Sa ndo sa, men nutbot sukndo gato Yefun Allah ben su men dakai yi sor. Sane bere men bi sukjimnut nggi, wo sukduno daret subot sugit e neya bere yo ós men nde. Ye gato simo sukdu ne yo kom mo pe yo dom nde.
10Yesu gato ben suk mo Yefun Allah bi nu suga nyim tuya, án simo sukduno subot sugit mone anato an yo git nde. Sane dom ye gato simo os nyim ne bi sukduno-i bere yo ku os wa an sok mo Yefun Allah bi rus-i tepsu os be gato Yesus Kristus kak wa men ne nde.
11Tahun dik, wam dik yekwesu gato gum kok wai mo Yefun Allah bi nu gwat suge dé mu sok mo gumwak fo mo Yefun Allah bi nu mit wa tot sukibit gato ye Israel ben ne, sarewo suge kaim ne ye gre ko mo nden kadit pe gato yé mwa kem mone.
12Sane anato Yefun Yesus dom kwop mo kota de nden, wo An dakai dé ne, ben sato An gwat sok mo gumwak fo mo Yefun Allah bi nu mo gu nim ne. Mone Kristus dé sye wa tot sukibit gato men yetu ben ne or wé kadit men, subere men tep wa sok mo Yefun Allah bi rus-i re.
13Sane it yo, men mu kadit os nyim ete men ut mo os be gato Kristus kak ne et. Men ut mo An yo, men si An sino ku sukye ket kwayo-kwayo mone.
14Men si An sino, we mo bur ré men yo ku kota gato men kem gesyos to kapyo mato kapyo yo mo nde, wo men sisu An sa, tepsu men werwa men mu kom mo kota gato gesyos ne, men eswa kota ne bor tó.
15Yefun Yesus kak os wa men sane it yo, men un Yefun Allah mone petok sor. Tepsu suga nyim ne, ye gwat suge ma wa som Yefun Allah su ne, su ré men bes Yefun Allah gum kok, men un Yefun gum su sukdu gato men ki nai An ne sor. Sane su ré men yo gwat suge ma wa men som Yefun Allah su o nde, wo men ki sukdu gato ndo wa som An su ne sor.
16Men werwa men ben sukndo su yu et, men mbrinket nde. Men ós yu mo suk gato men ben ne et, men mbrinket nde. Men ben sukndo su yu, men ós yu anato tepsu men gwat suksom wa men som Yefun Allah su it anane, bere Yefun Allah iwa re.
17Men jammo men bi yekwesu mo nu ari et. Yefun bes yekwesu mone, sane suk gato án ki ne men benbot sor. Yekwesu mewa men ete bere Yefun Allah ndo án subot suk gato án ben su men ne, sane men jammo án bi sukdu-i et. Men jammo án bi sukdu-i yo, bere án ben suk su án mit at wa. Wo men yo jammo án bi sukdu-i ne nde yo, bere án nutbot ndo nde. Men bariwa án bi sukdu-i ne yo, yo ós men dom nde.
18Nin ki suk su Yefun wa men yé gato krom surat ré petok sor. Men dakai bi sukjimnut mo men mit ne sa, ndo sor, kwa gato ibit mo nde, we mo suk mwa gato men ben ne, men iwa men ben men bi suk-i ne ri-roi sor.
19Ji dakai ndek mo nin do, nin ki suk su Yefun nggi wai o wa ji, subere yo nam nde ge, Yefun Allah kak os yo wa ji satu ba ku nin mone kekro et.
20Yefun Yesus kwop, An dé sye anato An kak os be gato gesyos, os be ne kem su men kadit kam ne sor to kapyo mato kapyo. Sane Yefun Allah sun men bi Yekwesu Yesus Kristus satu kadit sukkwop, ete An bes Yesus Kristus gum kok wai wa mewa men yé gato sibot os be ne. Kristus mewa men tepsu yetu mewa bi suksi sato domba ne sisu ndo.
21Yefun Allah ós men kem ndo ete fro men su sukndo mwa gato men mitmo ne subere men nggiwa ben suk tepsu An mit. Yesus Kristus kak os wa men it, sane Yefun Allah ete ben suk mo men mit tepsu pe gato An imo ne. Men bes Kristus gum kok sane sor to kapyo mato kapyo. Sangge.
22Ji bi surat ré, ji yo krom syu teker nde, sane ji kiwa nin nutbot ji bi sukduno mwa ré sisu ndo et.
23Su ré, ji iwa nin jam do, men bi nji gato gum do Timotius, ye syesyar an kadit sel it. An do ma ku ji more it yo, bere ji si an, men ka we ba ku nin mone.
24Nin ku nin bi yekwesu si Yefun Allah bi rus-i gato kem mone sino yo, nin ki do, men ki ndo mo án sino. Yefun bi rus-i gato kem mo bur Italia ki ndo mo nin dom.
25Yefun ete mewa nin sino mone sor.