Alkitab Mobile SABDA
[VER] : [ABUN]     [PL]  [PB] 
 <<  Kisah Para Rasul 16 >> 

1Paulus mu kom mo kota Derbe, orge an mu mo kota Listra. Yetu ge dik yo gato gum do Timotius kem mone. An onyar kem mo Yefun Yesus. Timotius bi im, ye Yahudi. Timotius bi im onyar kem mo Yefun Yesus dom, wo Timotius bi ai, an ye Yunani.

2Ye gato onyar kem mo Yefun Yesus gato kem mo kota Listra si kota Ikonium un Timotius, yé ki do, Timotius sa, an ye gato ben sukndo.

3Paulus iwa Timotius simo an mubot os sino, sane an bisunat Timotius, sawe ye Yahudi mone bere bariwa Paulus si an bi sukdu-i ne. Ye Yahudi mone jam do, ye yo bisunat Timotius nde tó, we Timotius bi ai ye Yunani (gato ye yo bisunat mo nde).

4Paulus, Silas si Timotius mubot kota bok ne sa, an ka gri ki subot sukdu gato yerasul si yekwesu mo nu ari mo Yerusalem krom mo surat ne. An ka gri ki sukdu subot yepasye ne bi sukdu-i ne rer nai ye gato onyar kem mo Yefun Yesus jam subere án sino benbot sukdu ne.

5Sane ye gato onyar kem mo Yefun Yesus ne, án onyar kem mo Yefun nggi wai kadit nyim ne o re. Kamdik-kamdik, ye gato onyar kem mo Yefun Yesus dobe yo o waii sok tó án dom.

6Yefun Allah Gen duyawa Paulus si Silas do, an we mu ki sukdu subot Yefun Yesus nai nje mo bur Asia nde. Sane an we yo mubot bur Asia nde, wo an we mubot bur Frigia si bur Galatia.

7An we mu kom mo bur Misia sa, an we iwa an we mubot bur Bitinia, sarewo Yefun Yesus Gen duyawa an we ware, an we mu mone nde.

8Sane an we wai kadit bur Misia, orete an we mu mo kota Troas.

9Mone, noru, Paulus me suk tepsu an semda, wo an yo sem nde. Paulus me yetu ge dik yo mo bur Makedonia. Ye Makedonia ne ti mo Paulus gwem, an ndek gat do, "Nan ma mo bur Makedonia, nan ós men more et."

10Paulus me suk tepsu an semda ne or sa, an ki suk gato an me ne nai men yé gato simo Paulus ne jam. Sane men fro men bi suk wa men mu mo Makedonia it anane. Men nut do, Yefun Allah kendo men mu ki sukdu subot os ndo gato Yesus Kristus kak wa men yetu ne nai nje mo bur Makedonia ne jam et.

11Sane men sino it mo kwem dik yo. Men mu kadit kota Troas. Men mu mo ef Samotrake, or, bi ik-i o, men mu mo kota Neapolis.

12Kadit ne o, men mu mo kota Filipi. Ye Roma jowa nje gato kem mo kota ne. Filipi anato kota sye dik yo mo bur Makedonia. Men kem mone kam bok yo.

13Kam Sabat, ye Yahudi bi kam sye, ete men mu mo syur mo kota de nden. Men nut do, mone ye Yahudi sum wa ki suk su Yefun Allah mó. Men kem mo syur de ne, men nuk sukdu su nggon bok yo gato sum mone.

14Nggon ge dik yo gato si men nuk sukdu ne gum do Lidia. Mom ma kadit kota Tiatira. Mom so san gato sugum sye. Kamdik-kamdik Lidia jammo Yefun Allah petok sor. Sane Yefun Allah kak mom bi sukjimnut mo sukdu gato Paulus ki ne anato mom onyar kem mo sukdu ne.

15Sane Lidia ndekwa ye ras mom si mom bi rus-i ne sino mo syur, orge mom kendo men ma kem mo mom bi nu, mom ki do, "Nin nut do ji onyar kem mo Yefun Yesus sisu sangge it yo, nin ma nin sem mo ji bi nu sor." Lidia ki bi sukdu-i ne nai men sane sor, kom mo rut sa, men simo mom, men sem mo mom bi nu-i.

16Kam dik yo men mu mo pe gato yé sum wa yé ki suk su Yefun Allah sa, men ku nggon kwerut ge dik yo. Pa donggon ne, kwis mok gwi pet mó, ete kwis mok frot suk gato bere bor su kam sari ne ma nai nggon ne jam. Nggon ne jam suk gato bere bor, ete mom ki nai nje jam anato mom ku sugum mwa wa mom bi yenggras mone.

17Nggon ne boribot Paulus si men, mom saiye bot os do, "Yé ré anato Yefun Allah gato nggi wai ne bi pakwerut anare. Yefun Allah syogat yé bok ré ma wa ki sukdu subot os ndo gato An fro wa men yetu subere men kem ndo to kapyo mato kapyo."

18Kam bok yo, nggon ne saiye bot men gat sor, Paulus maskwa. Paulus maskwa, an brek, ete an ndantom kwis mok gwi gato pet mo nggon ne do, "Yesus Kristus syo An bi suktinggi nai ji, sane ji syaugat nan, kwis mok gwi, nan mu kadit nggon ré se!" Paulus do ki suk, or kwis mok gwi ne mu kadit nggon ne it anane.

19Nggon ne bi yenggras jam do, bere an yo ku os wa ku sugum kadit nggon ne o nde sa, yenggras ne maskwa, yenggras ne mu but Paulus si Silas. Yenggras ne tik an we bot os mu mo yekwesu mo kota mit ne.

20Yenggras gwat an we mu mo ye Roma bi yepasye mone or, yenggras ki do, "Ye we gare, ye Yahudi. An we ben sukibit mo men bi kota, an we ben nje mo kota maskwa yu daret.

21An we werwa men benbot án ye Yahudi bi sukduno-i gato siri kadit men ye Roma bi sukduno-i. Men bariwa suk gato an we ki ne. Men bariwa benbot suk gato an we ki ne."

22Yé mwa gato sum mone waii kabor Paulus si Silas, orete ye Roma bi yepasye syaugat ye jogru an we bi san, ete ye kwam an we su bus.

23Ye kwam an we su bus wam mwa yé re, sane sor an we ndo nde. Orete yé bok an we mo penjara. Yepasye syogat yekwesu mo penjara ne do, "Nan mewa ye we ré sisu ndo sor."

24Yekwesu mo penjara ne jam sukdu ne sa, an grem ye we mo gumwak mo penjara mit kai, orete an rai ye we gwes dom kwemuk mone.

25Noru miten, Paulus si Silas ki suk su Yefun, an we kos sukos un Yefun Allah dom. Ye yi gato yé bok mo penjara ne dom jam ye we ne kos.

26Sugane yé bok mo penjara mit ne gensu bur ram nggi, sui juwai bur sane sor pondasi mo penjara dus re. Nusyo bok gato mo penjara ne kak or re. Sane dom bus gato ye rai yé bok gato mone gwes su ne sombok or re.

27Yekwesu mo penjara ne sun. An me nusyo bok ne kak saresa, an nai nyom ma wa an dakai gu an nggwa subere an kwop wé, we an nut do, nje mo penjara ne sino titi mu or re.

28Sarewo Paulus saiye do, "Nan gu nan nggwa nde. Men sino more tó."

29Yekwesu mo penjara ne, an syogat ye gwat sukru ma, an kas ngga mo gumwak mit, an kwabom kro, an bare nggwa mo Paulus si Silas gwem.

30Orete an gwat ye we kadit gumwak ne, ete an ndo mo ye we do, "Yenggras we a, ji ben suma subere Yefun Allah nai ji kadit sukye gato ji ku ré ne?"

31An we ki do, "Nan nai sukjimnut do, nan jammo Yefun Yesus tepsu nan bi Yekwesu, nan onyar kem mo An sor, sane bere Yefun Allah nai nan kadit sukye ré, ete ós nan kem ndo to kapyo mato kapyo--bere Yefun ós nan si nan bi rus-i ne sino."

32Orge an we ki sukdu subot men bi Yekwesu Yefun Yesus nai ye ne si ye gato kem mo an bi nu ne sino jam.

33Noru miten ne, yekwesu mo penjara ne gwat an we mu, yekwesu ne mus an we wip ne, orete an we ras yekwesu ne si bi rus-i ne mo syur re.

34Yekwesu mo penjara ne gwat an we mu mo an bi nu, ete syo sugit nai an we git. Yekwesu ne mit iwa, we an si an bi rus-i sino nai sukjimnut dik do, an jammo Yefun Yesus tepsu an bi Yekwesu, an onyar kem mo os be gato Yefun Allah fro ne it.

35Ik nyotkwo sa, ye Roma bi yepasye syogat an bi yesukmise mu mo penjara. Yesukmise ne gwat suktaru ki nai yekwesu mo penjara ne do, "Nan sombok ye we ne wé kadit penjara et."

36Sane yekwesu mo penjara ki nai Paulus do, "Ye Roma bi yepasye syaugat ji do, ji sombok nin ka we wé kadit penjara et. Sane nin ka we mu sor. Yefun ete uttok nin ka we sor."

37Sarewo Paulus ki nai yesukmise ne do, "Men ka we gum sok mo ye Roma bi nje-i, sarewo ye yo ndobot men ka we nde, wo yepasye syogat ye dakai kwam men ka we su bus mo yé mwa gwem or, yé bok men ka we mo penjara. Yepasye ben suk sane nai men yé gato sok mo ye Roma bi nje-i sane, bere siri re. Or o, su ré yepasye ki do, men ka we dakai mu sareya sor re, ye jam nde re. Sane nde! Nan mu ki nai yepasye bok ne do, yenggras bok ne dakai ma et, yenggras dakai jom men ka we syim ete gwat men ka we mu kadit penjara ré sor."

38Yesukmise ne mu ki sukdu ne nai ye Roma bi yepasye ne. Yepasye ne jam do, ye we ne gum sok mo ye Roma bi nje-i ne sa, yepasye ne nyu ndo nde, we an jam do an ben suk nai ye we ne siri kadit ye Roma bi sukduno-i re, bere an ku sukmaskwa kadit ye Roma bi yekwesu gato gum kok ne o.

39Sane yepasye ne ma bidek an we, ete gwat an we kadit penjara ne. Yepasye ne ndekwa ye we mu kadit kota ne sor.

40An we syesyar kadit penjara ne, orge an we mu mo Lidia bi nu. Mone an we ku yé bok yo gato onyar kem mo Yefun Yesus. An we nuk sukdu ós ye gato mone onyar kem mo Yefun nggi wai o, orete an we mu kadit re.


  Share Facebook  |  Share Twitter

 <<  Kisah Para Rasul 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel