Alkitab Mobile SABDA
[VER] : [ABUN]     [PL]  [PB] 
 <<  Kolose 2 >> 

1Ji iwa nin jam do, ji wergat ji nggwa wa ji ben sukndo su nin si ye gato kem mo kota Laodikia, si yé yi neya gato yo ku ji nde tó.

2Suk mwa ré ji ben subere nin si án sino bi sukjimnut nggi, eteyo nin si án bi sukjimnut sye kas subot yu tepsu yedik. Ji ben suk mwa ne subere sukdu gato Yefun Allah gurik kadit men suga nyim tuya ne, nin si án sino jam wa pe kom mo brot marum kai. Sane ji ben suk mwa ne subere án jam do, Kristus gato Yefun Allah yo kadum bor wa men jam suga nyim tuya ne nde, su ré án jam do Kristus bor it.

3Kristus anato kadum suk mwa gato Yefun Allah gurik suga nyim tuya ne, ete An ki bor wa men jam, subere kak men bi sukjimnut ko ete ós men jam suk mwa.

4Ji ki ji bi sukdu-i ré nai nin jam nyim subere ye yi do ma ki bi sukdu-i meret os wa ben kidar nin yo, nin jambot nde. Kapre án ki suk su án syokwet ndo, nin jambot dom nde.

5Ji kaim yo si nin kem mone nde, wo ji gen ne kem sisu nin mone re. Ji mit at, we ji jam do, nin bi sukjimnut dik tepsu yu ete nin onyar kem pe mo Yesus Kristus re.

6Nin nai Yesus Kristus tepsu nin bi Yekwesu it, sane anato nin ben nin bi suk-i tepsu ye gato sok mo Kristus bi nje-i petok sor.

7Nin onyar kem pe mo An sato kwebrot marum kom krat mo bur ré ne et. Mo suk mwa gato nin ben ne, nin jammo An pe. Nin onyar kem mo An nggi o et, tepsu sukduno gato yé duno nin su ne. Nin ki ndo mo Yesus Kristus wam dik sor nde, wo nin ki ndo mo An petok sor.

8Nin mewa nggwa sisu ndo et, sawe ye deyo ma wergat nin subere nin jambot yetu bi sukdu-i gato bere yo ós nin nde. Yetu bi sukdu-i ne bere ben kidar nin ete gwat nin mu ges mo os ibit o re. Yetu bi sukdu-i ne yo ma kadit Kristus nde, wo sukdu ne ma kadit yenggras bi sukdu-i si suk gato nggiwa jom bur ré gato i-mok mone bi sukdu-i. Yé ne yo duno nin subot Kristus nde.

9Nin jambot sukdu sane nde, we sukdu gato sangge bor mo Yesus Kristus gato ma mo bur ré su kaim tepsu men yetu. Yesus Kristus, anato tepsu Yefun Allah dakai mo suk mwa ne sino, kwa yo gwet mo nde. Suk mwa gato An ben si An bi suktinggi ne, suk mwa ne tepsu Yefun Allah dakai.

10Sane dom, nin gum sok mo Kristus bi rus-i anato nin ku suktinggi ne, kwa yo gwet mo nde. Kristus anato Yekwesu gato nggi wai kadit suk mwa ne sino gato i-mok mone. Kristus anato nggi wai kadit yekwesu mwa ne sino gato jom nje mo bur ré re.

11Nin si Kristus tepsu dik it, sane tepsu ye bisunat nin it anane. Sunat gare yo tepsu sunat gato yetu ben mo yetu kaim ne nde, wo sunat ne ma kadit Kristus. Sunat gato ma kadit Kristus ben sato kum nin bi sukjimnut gato tik nin mit iwa nin ben sukibit bu ne toko wé re.

12Sukjimnut gato tik nin mit wa nin ben sukibit bu ne toko or wé kadit nin anato ye ras nin mo syur dom. Yé bok nin mo syur yo, tepsu nin kwop ete ye bi nin mo bur sato Kristus kwop ete ye bi Kristus mo bur anane. Sane o, nin syesyar kadit syur ne yo, tepsu nin sun kadit sukkwop sato Kristus sun kadit sukkwop ne. Nin sun kadit sukkwop, we nin onyar kem mo Yefun Allah bi suktinggi gato An sun Yesus Kristus su ne.

13Suga nyim nin yo onyar kem mo Kristus nde tó, nin ben sukibit ket nin í petok sor. Sukjimnut gato tik nin mit wa nin ben sukibit bu ne, Kristus yo kum toko wé nde tó, ben sato nin kwop mo sukibit ne. Wo su ré, ben sato Yefun Allah sun nin kadit sukkwop, tepsu An sun Kristus ne. Sane Yefun Allah yo maskwa nin mo sukibit mwa gato nin ben ne o nde, An yo nutbot o nde.

14Bit gato Yefun Allah syat mo sukibit mwa gato nin ben ne, An tik wé re. Sukduno gato ben sukye wa nin, An nai wé re. Nin ben suk tepsu An bi sukduno-i ne yé teker wa nin, wo Kristus kwop mo kwesukwin wa An tik bit gato Yefun Allah syat mo sukibit ne wé re.

15Yesus Kristus kwop mo kwesukwin ne anato suk gato i-mok mone yo nggiwa jowa bur ré o nde. Biris si bi suktinggi ne yo nggiwa jowa bur ré o nde. Kristus nai biris bi suk gato i-mok mone bi suktinggi ne wé re. Ben sato Kristus gwat suk gato i-mok mó sato yerom e, aboksye e, suk yi e ne ma kadum nai ye mwa ne sino. Sane tepsu yepasye kadum pakwerut gato an but ne wa ye mwa me do, yepasye ne nggi digane, ye mwa ne sino jam do, suk gato Kristus ben mo kwesukwin ne kadum do, Kristus anato nggi wai kadit suk mwa ne o re.

16Sane nin jambot ye gato ma ki nin gum ibit mo suk gato nin git si suk gato nin da ne nde. Nin jambot ye gato ma ki nin gum ibit mo suk gato nin ben su kam sye gato nin som Yefun Allah su ne nde. Nin jambot sukdu gato ye ki nin gum ibit mo suk gato nin konwa aina be si kam sye kam Sabat ne nde.

17Ye yi bi sukduno-i mone nin jambot nde, we sukdu subot suk bok gare yo sangge kai nde, wo sukdu bok ne anato tepsu sukamno wa kadum sukdu gato sangge, gato men me bor mo Kristus dakai re.

18Ye gato ma ki do, malaikat gato an som ne kadum suk bok yo rer wa an me re, ete an kidar do, an yo bes an nggwa kok mo suk ne nde, sane yo, nin jambot ye ne bi sukdu-i nde, we sukdu ne gwat nin ko kadit sukndo gato bere Yefun Allah syo nai nin ne. Ye gato ki bi sukdu-i sane jam nde Yefun. An dakai bes an nggwa kok mo suk mwa gato an me ne, sarewo sukkidar sye yo ko ré. An ki subot malaikat bi sukdu-i sane sor kom mo mit kai,

19wo an yo jammo Kristus tepsu an bi Yekwesu o nde. An sombok kadit Kristus, tepsu yetu kaim sombok kadit i-su. Kristus anato tepsu yetu su gato jom kaim ne tepsu dik. Men yetu brot si men dini rit ne ós jom men kaim ne krat tok yu ete ut mo men su. Kristus jom An bi rus-i digane, subere men sino tepsu dik, ete tepsu men kaim kom sye o, men ut mo Kristus krat waii o tepsu Yefun Allah dakai imo ne.

20Kristus kwop sa, ben sato nin si An kwop sino. Sane ben sato nin kwop kadit suk gato nggiwa jom bur ré gato i-mok mone si bi sukdu-i ne it. Nin yo jambot sukdu ne o nde. Sane, suma ben anato nin werwa nin jammo sukdu sane tó ne? Sukduno gato ye ki do, "Nin jom suk ré nde! Nin rim suk ne nde! Nin rot suk ne nde!" Nin jambot sukdu gato ye ki sato ré wa suma ne?

21(2:20)

22Sukduno gare yo kem nam nde, bergan sukduno ne ye yo nutbot o nde, we sukduno ne ma kadit yetu bi sukjimnut-i sor re.

23Sangge ye nut do sukduno ne bi sukjimnut ko, sarewo yo mo nde. Ye duno men subere men som malaikat e, men is men nggwa ga tepsu pa wokgan e, men ben sukye nai men dakai e ne. Men nut do, sukduno ne ndo mone, sarewo sukduno bok ne yo tep wa mewa men kadit suk gato men iwa men ben siri kadit Yefun mit bu ne nde.


  Share Facebook  |  Share Twitter

 <<  Kolose 2 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran