Dual Panel1Yenggras gato bi pakwerut ne, nin ben nin bi suk-i ri-roi su pa ne et. Nin ben nin bi suk-i su pa mwa ne sino tepsu yu et, we nin jam do, nin dom tepsu pakwerut wa nin bi yenggras mo gu.
2Nin ki suk su Yefun Allah petok sor. Nin ki suk su Yefun yo, nin mewa nin nggwa, nin ki suk su nin mit dik si nin onyar dik. Nin ki suk su Yefun yo, nin ki ndo mo Yefun Allah dom et.
3Nin do ki suk su Yefun yo, nin ki suk su Yefun wa men more dom, subere Yefun Allah kak os ndo wa men ki sukdu subot Kristus ne frek subot ye yi neya. Sukdu ne, suga nyim neya Yefun Allah gurik re. Ji kibot sukdu ne anato ye sok ji mo sel.
4Nin ki suk su Yefun wa ji subere ji nggiwa ji ki sukdu ne rer nai nje jam, tepsu Yefun iwa ne.
5Nin ben suk su ye gato yo onyar kem mo Yefun nde tó yo, nin nutbot suk gato nin ben ne sisu ndo et. Nin kamo su án sor nde, wo nin werwa nin ben suk su án subere án waii jammo Yefun et.
6Nin ki suk su yé gato jam nde Yefun yo, nin ki nin bi sukdu-i njep, nin ki sukdu gato ben yé ne mit ndo, nin ki sukdu gato tik án mit sor. Nin fro nin nggwa subere án do ndo nin subot suk yo, nin owa nin ki sukdu gato ndo satu nai án.
7Tikhikus, men bi nji gato men jimnotku, bere an ba ku nin ete an kibot suk mwa gato ji ben ne nai nin jam. An si men sino ben suk wa Kristus, an ben an bi suk-i ne ri-roi tepsu Kristus mit.
8Bere ji syogat an ba ku nin subere nin jam sukdu subot suk gato bor mo men more, ete nin bi sukjimnut yo waiyu subot men nde, wo nin mit ndo sor.
9Onesimus bere si Tikhikus ba ku nin. Onesimus anato nin dakai bi nje-i. An sa, ben an bi suk-i ri-roi tepsu Kristus mit, men jimnotku an. An si Tikhikus bere kibot suk mwa gato men ben more ne nai nin jam.
10Aristarkhus gato si ji kem sino mo sel ré sino, an ki ndo mo nin. Barnabas bi mben, gato gum do Markus dom, an ki ndo mo nin. Suga nyim nin jam sukdu subot an re. An do ba ku nin it yo, nin mewa an sisu ndo et.
11Yetu ge dik yo gato gum do Yesus, an gum yo o do Yustus, an ki ndo mo nin. Ye Yahudi ka gri ré sor ete si ji ben suk sino. An ka gri si ji mu kibot Yesus Kristus subere kar nje sok mo Yefun Allah bi rus-i. An ka gri ré sa, os ji su sangge.
12Epafras ki ndo mo nin. An ré, nin dakai bi ye-i. An ré tepsu Yesus Kristus bi pakwerut. An ki suk su Yefun sisu an mit dik si an onyar dik sisu sangge wa nin petok sor. An ndek mo Yefun Allah wa nin subere nin bi sukjimnut kem pe mo Yefun, tepsu yenggras gato bi sukjimnut kak, subere nin bi sukjimnut brek wokgan kadit Yefun Allah dom nde, ete nin benbot suk mwa ne sino gato Yefun iwa ne.
13Epafras ré, an sa, ben suk, an kamba wa nin si yé gato kem mo Laodikia si Hierapolis, ji dakai me su ji gro re.
14Lukas gato gum dokter gato men jimnotku si Demas, an we ki ndo mo nin dom.
15Nin ku ye gato onyar kem mo Yefun Yesus mo kota Laodikia yo, nin ki do, men ki ndo mo án sino. Nin ku Nimfa si ye gato onyar kem mo Yefun gato sum wa ben ari mo Nimfa bi nu ne yo, nin ki do, men ki ndo mo án.
16Nin do baca surat ré or, eteyo nin meret os yo subere ye yo gwat surat ete yé baca surat ré wa ye gato onyar kem mo Yefun Yesus mo Laodikia ne waii jam dom et. Sane nin do ku surat dik yo kadit Laodikia yo, nin waii baca wa nin sino jam dom et.
17Nin ki nai Arkhipus do, "Nan ben suk gato men bi Yekwesu, Yefun Yesus syogat nan ben ne kom mo pe gato or mó et."
18Ji, gato gum do Paulus ré, ki ndo mo nin sor. Ji dakai krom sukdu kwa gato wari ré su ji syim. Ji kem mo sel tó, nin mbrinket ji nde. Yefun Allah ete mewa nin sino sor. Ndo mo nin sor, kadit Paulus