Alkitab Mobile SABDA
[VER] : [ABUN]     [PL]  [PB] 
 <<  Lukas 16 >> 

1Yefun Yesus ki nai An bi pakon do, "Yepasye dik yo gato bi suk mwa, yenggras ne bi pakwerut dik yo gato jom an bi sugum si suk mwa. Sarewo ye yi ndak ye gato jom yenggras ne bi sugum si suk mwa ne do, pakwerut ne kamo su yenggras bi suk mwa anato deyo ges or re.

2Sane yepasye ne kendo pakwerut ne ma ku an. Yepasye ne ki do, 'Sukdu gato ye ndak nan su ne, gato ye ki nai ji jam ne sangge bado? Sane nan krom subot suk mwa gato nan ben su ji bi sugum si ji bi suk mwa ne subere ji jam et. Nan ben suk tepsu ji bi pakwerut gato jom sugum ne o nde it anare.'

3Sane pakwerut ne nut mo an syidem do, 'Ji ben suma su ré ne? Ji bi yenggras syun ji kadit an bi nu it anare. Sane bere ji ku sugum wa ji so sugit su ne sa u ne? Ji yo nggiwa ji ben nggwe nde. Ji damen wa ji ndek suk mo nje dom.

4Ji bi sukjimnut dik yo anare, sa ndo sa, ji bi yenggras yo syogat ji mu nde tó, ji werwa ji ben suk yo subere yé mwa kak yé mit wa ji, bere yé mwa ne tepsu ji bi yesyim subere yenggras syun ji it yo, ji mu si án kem mo án bi nu.'

5Sane pakwerut ne kendo yé bok yo gato bi bon mo an bi yenggras ne ma mone. An kendo kadik-kadik ma, ete an ndo mo ye gato ma su futmo ne do, 'Nan bi bon mo ji bi yenggras ne kom mo ot ne?'

6Ye ne ki do, 'Ji bi bon ne kom mo jeriken sye wotin dik ses su manik zaitun.' Ye gato jom yepasye ne bi suk mwa ne ki do, 'Nan me nan bi bon gato ji krom more wa ji bi yenggras jam ne. Nan ma kekro, nan rus suk gato ji krom ré wé et. Nan krom do, nan bi bon kom mo jeriken sye musyu mek sor re, musyu mek yo, men misyar sor.'

7Or o pakwerut gato jom yepasye bi suk mwa ne ndo mo ye kedowe o do, 'Nan bi bon kom mo ot ne?' Ye ne ki do, 'Ji bi bon ne kom mo fas karung ribu dik.' Pakwerut ne ki do, 'Sane nan rus nan bi bon gato ji krom ré wé, ete nan krom do, nan bi bon kom mo fas karung wotin munggwo sor re, wotin we yo, men misyar sor.'

8Kom mo rut sa yepasye un pakwerut gato kidar an, we yenggras jam do, pakwerut ne bi sukjimnut ko anato pa ne fro os ndo wa an dakai wa kam sari ne ma. Ye gato jam nde Yefun mo bur ré sato pakwerut ne sa, án owa fro bi suk-i su yu, wo ye gato jammo Yefun, gato kem mo pe gato rer ne, án yo owa fro bi suk-i sisu ndo su ye gato jam nde Yefun mo bur ré nde."

9Orge Yefun Yesus ki o do, "Sane Ji ki sare do, nin syo nin bi suk nai nje, subere yé ne kak án mit wa nin, ete nin ku nin bi yesyim ge bok yo mone. Sane nin bi suk mwa mo bur ré do or kadit nin it yo, bere Yefun Allah syo nat gato ndo wa nin kem mó. Bere nin kem ndo mone to kapyo mato kapyo.

10Ye to ben an bi suk-i ri-roi su sukwokgan gato ye syo wa an mewa ne, bere ye ne ben an bi suk-i ri-roi su suk mwa dom. Sarewo ye to ben sukibit su sukwokgan gato ye syo wa an mewa ne, bere ye ne ben sukibit su suk mwa dom.

11Sane nin yo mewa sugum si suk mwa mo bur ré sisu ri-roi nde yo, bere Yefun Allah syo sukndo kadit gu wa nin mewa ne wa suma ne?

12Nin yo mewa ye yi bi suk-i sisu ndo nde yo, bere yé yo syo an bi suk sok mo nin tepsu nin bi suk-i dom nde.

13Sare, pakwerut ge dik yo, an yo nggiwa ben suk wa yenggras ge we nde. Bere ye ne bariket yenggras ge dik yo, ete an jimnotku yenggras ge dik yo sor re. Bere ye ne jammo yenggras ge dik yo ete an misyar yenggras ge dik yo sor re. Sane nin yo nggiwa nin gum pakwerut wa Yefun Allah si sugum sino nde."

14Ye Farisi jam sukdu gato Yefun Yesus ki ne sa, án sa Yefun Yesus, we ye Farisi ne gro sye wa sugum teker.

15Yefun Yesus ki nai án do, "Nin anato ben suk subere yé mwa nut do, nin sa, ben sukndo, ondewo Yefun Allah jam nin mit-i tara re. Suk gato yetu nut do, ndo, Yefun Allah nut do, ibit."

16"Kadit ketke sor kom mo kam gato Yohanes, gato ras nje mo syur ma ne, yé duno nje su Musa si yenabi bi sukduno-i. Wo kadit kam gato Yohanes ma ne, Ji si Ji bi pakon duno nje subot os ndo gato Yefun Allah fro wa Yefun nai nin yetu gum sok mo An bi rus-i, ete An tepsu nin bi Yekwesu mone. Yé mwa jam sukdu ne anato yé mwa wergat nggwa wa án sok mo Yefun Allah bi rus-i.

17Yefun Allah bi sukduno ne kem pe. Kapre bur ré kru e, kapre gu nim ne fres or wé e, sukdu kwa dik yo ges kadit Yefun Allah bi sukduno ne mo nde, wokgan yo dom nde.

18Ye to sombok an bi nggon wé, ete an kra su nggon yi yo o it yo, ye ne ben suk siri ses an bi nggon doketke anane. Ye to kra su nggon gato bi ya sombok ne it yo, ye ne ben suk siri dom anane."

19Yepasye ge dik yo, an ye gato bi suk mwa yé re. Yepasye ne kem ndo, an it san gato ndo. Kamdik-kamdik, an git sugit gato ndo yé re, suk mwa ne ndo sino.

20Yetu ge dik yo o, an gum do Lazarus. Lazarus ré, an yewa suk mwa. An bi suk yo mo nde, an ndek suk daret. Lazarus ré, wip mok mwa git an kaim ndo nde. Lazarus kem mo yepasye ne bi nusyo de nden.

21Lazarus on de ndo nde. Lazarus mit iwa an git sugit napta gato yepasye bare wé mo nden, sarewo sugit ne yo kom an nde. Sane dom, ndar ma rim an wip mone.

22Kom mo rut sa, Lazarus kwop re, ete malaikat ma kar an da gesyos mu mo pe gato Abraham kem mone, an we kem mo pe gato ndo ne. Sane yepasye ne waii kwop o, ete yé bi an mo bur.

23Yepasye da gesyos ngga mo bot gesyos. An kem mone, ete an ku sukye ndo nde. Yepasye sok mu nim, ete an me Abraham si Lazarus kem mo pe gato ndo, sarewo os syu kadit an re.

24Sane, yepasye ne saiye do, "Yenggras Abraham, nan jimnotku ji et! Nan syogat Lazarus ras an sopkwa mo syur, or an gwat ma an ras mo ji brip, we more bot sye kam is ji ndo nde."

25Sarewo Abraham saiye o do, "Nan napawa tomgato nan kem mo bur ne, nan ku suk mwa gato ndo, sarewo Lazarus gare yewa suk mwa. Su ré Lazarus kem mo pe gato ndo, wo nan anato kem mo pe gato yé, ete nan ku sukye mone.

26Sane o, mo men miten kwoye ware, subere men yo ba mo nin nde, nin yo ma mo men nde."

27Orge yepasye ne ki do, "Sane yo, ji ki nai yenggras, nan wa nan syogat Lazarus mu mo ji bi ai bi nu,

28we ji bi nji ge mumek mone. Sane, nan syogat Lazarus mu wa ki suknapa wa án, subere ji bi nji yo sok mo pe gato yé more nde."

29Orge Abraham ki nai yepasye ne do, "Sukduno gato Musa si yenabi bok ne krom ne wai mó re. Nan bi nji jammo sukduno ne sor re."

30Sarewo yepasye ki do, "Yenggras Abraham, sukduno ne yo tep nde re. Wo yekwop dik yo do sun ete mu ki nai ji bi nji yo, bere án kwet kadit sukibit gato án ben ne sino, ete án jammo Yefun."

31Sarewo Abraham ki do, "Yé ne yo jammo suk gato Musa si yenabi krom ne nde yo, kapre yekwop dik yo sun mu ki nai án o, bere yé ne yo jammo yekwop ne bi sukdu-i dom nde."


  Share Facebook  |  Share Twitter

 <<  Lukas 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel