Dual Panel1Yefun Yesus mu kom mo kota Yerikho sa, Yefun Yesus mubot kota mit.
2Yetu ge dik yo gato gum do Zakheus kem mo kota ne. Zakheus ré gum yesu wa ye gato nai sugum kadit nje wa pemerintah. An ye gato ku suk mwa.
3Zakheus nut mo an dakai do, "Je u anato Yefun Yesus ré ne?" Sane Zakheus iwa an sokme Yefun Yesus. Zakheus werwa an ku os wa an sokme Yefun Yesus ware, yé mwa teker yawa os, we Zakheus ré ye gato ti gon.
4Sane, Zakheus kas mu nyim mo os naprut, orge an it kweke dik yo, subere an sokme Yefun Yesus gato bergan mu wai ket os ne.
5Yefun Yesus kom mo kwe ne sa, Yefun Yesus sok mu nim, An ki do, "Zakheus, nan is ma kekro et! Bere kam ré yo, Ji mu sem mo nan bi nu-i."
6Sane Zakheus is it anane, an mit iwa Yefun Yesus ma sem mo an bi nu-i.
7Yé mwa gato mone me Yefun Yesus mu sem mo Zakheus bi nu sa, án maskwa, án ki nai yu do, "Mban! Yefun Yesus mu sem mo ye gato ben sukibit mwa ré bi nu-i anare go!"
8Kom mo Zakheus bi nu sa, Zakheus ti, an ki nai Yefun Yesus do, "Bere ji syo ji bi suk napyo nai ye gato yewa suk. Yé gato ji kidar ne, bere ji win án bi suk ne wam at satu o."
9Sane Yefun Yesus ki nai Zakheus do, "Su kam ré yo, Yefun Allah yo maskwa nan mo sukibit mwa gato nan ben ne o nde, Yefun Allah yo nutbot o nde. Sane bere nan si ye gato kem mo nu ré sino kem ndo to kapyo mato kapyo. Bere nan kem ndo, we nan onyar kem mo Ji, tepsu Abraham onyar kem mo Yefun Allah, nan tepsu Abraham bi pa mone.
10Sane Yetu bi Pa to Ji ré ma mo bur ré wa Ji syeret ye gato jam nde Yefun Allah bi os-i, subere ji ós ye ne jam Yefun Allah bi os-i. Ji kak os wa ye ne subere an kem ndo to kapyo mato kapyo."
11Yé mwa mone syaretwa Yefun Yesus bi sukdu gato An ki ne sa, Yefun Yesus gwat sukamno dik yo. Pe ne karowa Yerusalem, sane yé mwa nut do, Yefun Yesus do sok mo Yerusalem it yo, sugane Yefun Allah ma ete jowa nje mone tepsu án bi Yekwesu.
12Sane Yefun Yesus gwat sukamno sare do, "Yepasye dik yo, an mu mo bur yi gato os syu kadit an bi bur-i. Yepasye mu mo bur ne subere yé bes an gum tepsu yeraja wa an jowa nje mo an bi nat-i. Yé bes an gum yeraja orete yo, an satu ma mo an bi nat-i.
13Yepasye ré yo mu nde tó, an kendo an bi pakwerut ge musyu dik ma, ete yepasye ne syo sugum det dik nai pakwerut ne kadik-kadik. Yepasye syo sugum nai an bi pakwerut, ete an ki do, 'Sugum gato ji syo nai nin ré, nin ben suk su, subere nin ku sugum mwa wai o. Nin ben suk su sugum ré sor kom mo ji satu ma et.'
14Sarewo yé mo bur ne bariket yepasye ne. Sane yé syogat yé bok yo mu boribot an subere yé bok ne ki nai yekwesu mone do, 'Men bariwa nan bes ye ne gum yeraja wa jowa men mo men bi bur-i.'
15Sarewo yekwesu mone bes yepasye ne gum yeraja, orete an satu ma mo an bi bur-i. Yepasye satu ma sa, an syogat yé kendo an bi pakwerut ge musyu dik ne ma, subere an ndo subot sugum gato an bi nai re. An ndobot do, 'Te, kadik-kadik ku sugum kom mo ot it ne?'
16Pakwerut doketke ma ki nai an do, 'Yenggras, sugum det dik gato nan syo nai ji ne, ji ben suk su, sane ji ku det musyu dik yo o tó ré.'
17Yenggras ne ki do, 'Nan sa, pakwerut gato ben sukndo. Nan ben nan bi suk-i ri su sukwokgan gato ji syo nai nan, sane, ré yo, ji bes nan tepsu yesu wa jowa nje mo kota musyu dik.'
18Pakwerut kedowe ma ki nai yepasye ne do, 'Yenggras, sugum det dik gato nan syo nai ji ne, ji ben suk su, sane ji ku det mumek yo o tó ré.'
19Yepasye ne ki nai pakwerut ne do, 'Sane ji bes nan tepsu yesu wa jowa nje mo kota mumek.'
20Pakwerut dik yo ma o ki do, 'Yenggras, sugum det dik gato nan syo nai ji ne, ji nggwot mo ji bi san det, ete ji grem yei.
21Ji nyuwa nan, we ji jam do nan syogat nan bi pakwerut sam sukde. Nan nai suk kadit pe gato nan bi kamba mo nde. Nan nai sugit gato kri mo nggwe gato nan jan nde anato ji nyuwa nan.'
22Yepasye ne ki nai pakwerut ne do, 'Nan yebambrai, nan ben sukibit. Kadit nan bi sukdu, ji kadum do nan anato ye gato ben sukibit. Nan da jam suk gato ji ben ne, sarewo nan dakai bambrai. Nan jam ji syogat ji bi pakwerut sam sukde, nan jam ji nai suk kadit pe gato ji bi kamba mo nde, nan jam ji nai sugit gato kri mo nggwe gato ji jan nde, sarewo nan dakai bambrai.
23Nan jam ji syogat ye yi ben suk wa ji sane, nan yo gwat ji bi sugum mu grem mo bank nde wa suma ne? Nan gwat ji bi sugum grem mo bank sa, bere ji satu ma, ete ji ku sugum ne su bi bunga o tó, ji ku sugum mwa gan yo o.'
24Orge yepasye ne ki nai yé bok yo gato ti mone do, 'Nin nai sugum kadit pa ré, nin syo nai pa gato ku sugum det musyu dik yo o ne.'
25Yé bok yo mone ki nai yepasye ne do, 'Yenggras, men syo sugum ne nai an, sarewo an ku sugum det musyu dik mó re.'
26Yepasye ne ki do, 'Ji ki sare do, ye gato bi suk mó yo, bere an ku suk mwa wai o. Ye gato mewa suk gato ye yi syo nai an sisu ndo yo, bere Yefun Allah bes ye ne jowa suk mwa wai o. Wo ye gato bi suk yo mo nde yo, wokgan gato mó yo, bere yé nai or wé kadit an re.
27Sane yo, nin kar yé gato bariwa jammo ji ne, nin kar yé gato bariwa ji gum yepasye wa jowa án ne. Nin gwat yé bok ne ma mo ji gwem, ete nin gu án kwop wé.' "
28Yefun Yesus do ki sukdu ne or, Yefun Yesus mu mo kota Yerusalem. Yefun Yesus mu saresa, Yefun Yesus mu nyim mo yé mwa gwem.
29Yefun Yesus mu, An karowa kampung we gato gum do Betfage si Betania mo bobuk Zaitun sa, Yefun Yesus syogat An bi pakon ge we mu nyim.
30Yefun Yesus ki do, "Nin ka we mu nyim mo kampung gato karo mone. Nin ka we mu kom mone it yo, bere nin ka we me keledai gan ge dik yo gato yé jik mone. Keledai ne ye yo it mo nde tó. Nin ka we sombok ete nin ka we gwat ma.
31Do ye yo ndo mo nin ka we do, 'Nin ka we sombok keledai ré wa suma ne?' Yo, nin ka we ki do, 'Men bi Yekwesu mitmo keledai ré.' "
32Sane pakon ge we ne mu nyim, ete an we ku suk mwa ne tepsu Yefun Yesus ki nai an we ne.
33Pakon ge we sombok keledai ne saresa, ye gato bi keledai ne ndo mo pakon ge we ne do, "Nin ka we sombok keledai ré wa suma ne?"
34An we ki do, "Men bi Yekwesu mitmo keledai ré."
35Pakon ge we ne gwat keledai ne ma kom mo Yefun Yesus sa, an we sya an we bi sansun mo keledai yu, orete an we ós Yefun Yesus it mo keledai ne.
36Yefun Yesus it or, An gwat keledai mubot os sa, yé mwa mone sya án bi sansun mo os mit wa mbrau os gato Yefun Yesus muket ne.
37Karowa Yerusalem ne, Yefun Yesus mu kom mo pe gato os ne is kadit bobuk Zaitun sa, Yefun Yesus bi pakon mwa ne án wi, án ambre sino, án un Yefun Allah mo suk mwa gato ben án yeket gato án me Yefun Yesus ben ne.
38Pakon mwa ne saiye do, "Yeraja gato Yefun Allah syogat ma ré, Yefun Allah ben sukndo su An et! Yé mwa ne sino mo gu ete kem not. Men yetu ete bes Yefun Allah gum kok sye wai o et."
39Ye Farisi deyo gato simo yé mwa mone ki nai Yefun Yesus do, "Yenggras, yeguru, nan syogat nan bi pakon ne not et."
40Yefun Yesus ki do, "Ji ki sare do, Ji do syogat Ji bi pakon not it yo, bere jok mwa ré waii saiye un Ji."
41Yefun Yesus mu karowa Yerusalem anane. Yefun Yesus sokme kota ne sa, An wo wa nje mone.
42Yefun Yesus wo, An ki do, "Kamapa! Su kam ré nin yé gato kem mo Yerusalem jam nde os gato bere Ji kak subere nin kem not, subere nin si Yefun Allah kem ndo su yu. Nin jam os ne sa, bere nin yo ku sukye nde. Sarewo nin bi sukjimnut yo kak wa nin jam kom mone nde, nin bariwa os ndo gato Yefun Allah fro wa nin re.
43Kam yo tak bere nin ku sukye. Bere yeko futma wairi wa nin sino mo kota ré, ete yeko gu nin kadit deyo-deyo.
44Bere yeko gu nin kwop or sino, ete yeko ne ma ben suk mwa mo kota mit ne ibit sino. Jok mwa gato yé nggo nu su ré, bere yé ma krut jok mwa ne or re, dik yo ut mo dik yo o nde. Nin jam nde Yefun Allah syogat Ji ma wa nai nin kadit sukye ne. Nin bariwa, sane bere nin ku sukye re."
45Orge, Yefun Yesus sok mo ros gato yé nggo wairi wa Yefun Allah bi nu de mit. Yefun Yesus sok mone sa, Yefun Yesus syun yé bok gato so suk mone titi wé kadit pe ne.
46Yefun Yesus syun yé mwa ne wé, Yefun Yesus ki do, "Ye krom mo Yefun Allah bi sukdu do, 'Ji bi nu ré yo, yé kendo do nu gato yé benadi mó,' wo nin gato so suk mo Yefun Allah bi nu mit ré, nin ben nu ré tepsu nu gato ye syimsi ne ma kem mó."
47Kamdik-kamdik Yefun Yesus duno nje mo Yefun Allah bi nu. Yekwesú mo Yefun Allah bi nu, yeguru agama si ye Yahudi bi yepasye meret os wa gu Yefun Yesus kwop wé,
48sarewo án yo ku os wa án gu Yefun Yesus nde, we yé mwa mone sum wairi wa Yefun Yesus. Yé mwa syaretwa Yefun Yesus bi sukdu sane sor, yé mit iwa wai o re, ye syaretwa pe sor.