Dual Panel1Yefun Yesus ki suk su yé mwa mone, An gwat sukamno yo o, sare do,
2"Yefun Allah nai yetu sok mo An bi rus-i ne yo, bere tepsu yeraja gato konwa sukra wa an bi gan.
3Yeraja ne syogat an bi pakwerut ge bok yo mubot nje wa kendo yé mwa ne ma, sarewo yé mwa ne bariwa re.
4Sane yeraja syogat pakwerut ge bok yo o mu, an ki nai pakwerut bok ne do, 'Nin mu ki nai yé gato ji kendo ma mo sukra gato ji konwa ré do, sugit ne fro it. Ji gu ji bi suge, ji go, ete ji kon jon it. Suk mwa ne fro wa men konwa sukra re, nin ma se!'
5Pakwerut bok ne kom mo ye gato yeraja kendo ma ne, sarewo yé mwa ne misyar pakwerut bi sukdu ne re. Yé deyo dakai mu ben bi suk-i kadit, deyo o mu mo nggwe kadit, deyo o mu ben suk mo bi kantor kadit sukra ne.
6Deyo o but pakwerut ne ete kwam pa ne, ete gu pa bok ne kwop or re.
7Sane yeraja ne maskwa ndo nde, ete an syogat an bi yesukmise mu gu ye gato ben sukibit ne kwop wé ete syo bot git yé mwa ne bi kota ne or re.
8Orete yeraja kendo an bi pakwerut ne, ete an ki do, 'Men fro suk mwa wa men konwa sukra ré it, sarewo yé gato ji kendo ma ne yo tep wa si men more nde.
9Sane nin mubot os sye, nin kar yé gato nin ku mone.'
10Sane pakwerut bok ne mu kar ye gato án ku mo os sye ne ma, yé gato ben sukndo si yé gato ben sukibit ne sino pa kar ma sane sor, nu gato yé konwa sukra mone ses re.
11Wo yeraja ma ku yé mwa gato ma ne sa, an ku yetu ge dik yo gato it san yo tepsu wa ye ne simo sukra nde.
12An ndo mo ye ne do, 'Yesyim, nan it san yo tepsu wa nan simo sukra ré nde, nan ku os wa nan sok more sa u ne?' Ye ne not sor, ye ne yo ki suk wokgan yo dom nde.
13Sane yeraja ki nai bi pakwerut ge bok ne do, 'Nin but ye ré, nin rai an gwes si an syim ne krat, orete nin am an mo nden, mo pe gato ndendu. Mone yé wo ndo nde, mone yé dakai nderku nggwa.' "
14Kom mone sa, Yefun Yesus ki do, "Yefun Allah kendo yé mwa neya sok mo An bi rus-i, sarewo ge bok yo sor re, ete Yefun nai sok mo An bi rus-i ne."
15Ye Farisi bok yo gato sum mone mu ete fro sukdu wa án ndobot Yefun Yesus subere án meret os wa Yefun Yesus mo suk gato Yefun ki ne.
16Ye Farisi syogat án bi pakon ge bok yo si ye gato simo Herodes ge bok yo mu ku Yefun Yesus, ete án ndo mo Yefun Yesus do, "Yeguru, men jam do, Nan sa, Nan anato ye gato ben bi suk-i ri-roi sor. Men jam do, Nan kibot Yefun Allah bi sukdu ne yo, kapre yepasye ke, ye gato gum wok ke, Nan duno men su Yefun Allah bi sukdu-i ne rer sor. Nan duno yé mwa ne sino tepsu yu. Nan yo brek nden we mo sukdu gato Nan ki ne nde.
17Sane, men iwa men jam Nan bi sukjimnut subot sukdu ré et, sare do, pemerintah bi yekwesu gato gum do Kaisar syogat men bi sugum pajak nai an, sane men ye Yahudi bi sukduno-i ki suma ne? Men bi sugum pajak anato ndo tepsu sukduno ne bado, siri kadit e?"
18Yefun Yesus jam yé bok ne meret os wa An, subere yé maskwa An mo sukdu gato An ki satu ne. Sane An ki do, "Nin yé gato kidar do, nin onyar kem mo Yefun, sarewo nin mit tara ne te, suma ben anato nin meret os wa Ji ne?
19Nin gwat sugum gato nin bi pajak su ne det dik yo ma wa Ji me et." Yé gwat ye Roma bi sugum det dik yo ma,
20orete An ndo mo yé ne do, "Yé krom je u ana kaim mo sugum det ré ne? Yé krom je u ana gum mo sugum det ré ne?"
21Yé ki do, "Yé krom Kaisar kaim mone si yé krom Kaisar gum mone." Sane Yefun Yesus ki nai án do, "Sane, Kaisar bi suk-i yo, men syo nai Kaisar, wo Yefun Allah bi suk-i yo, men syo nai Yefun sor."
22Yé jam suk gato Yefun Yesus ki ne sa, yé yeket sukdu ne. Yé Farisi bok ne yo ku os nde, sane yé misyar, ete yé mu kadit An re.
23Su kam ne dom, ye Saduki ge bok yo ma ku Yefun Yesus. Ye Saduki bi sukduno-i kwa yo do, ye gato kwop bere yo sun o nde. Ye Saduki ré ma ndo mo Yefun Yesus do,
24"Yeguru, Musa ki do, ye gato yo ku pa nde do kwop it yo, bere an bi nji waii kra su nggonna ne subere ku pa win an bi nji gato kwop ne.
25Sane pa yedik ge mufit kem more mó re. Pa dofutmo kra su nggon dik yo, orete an kwop, an yo ku pa nde. Sane pa kedowe waii kra su nggonna ne o.
26Pa kedowe saga pa dofutmo ne dom, pa ne kwop, yo ku pa nde. Sane pa kedogri waii kra su nggonna ne o, orete pa ne kwop, yo ku pa nde, sane sane sor pá bok ne sino kom mo kedomufit kra su nggonna ne ware, pá bok ne sino yo ku pa nde, wo pá bok ne sino kwop or.
27Kom mo rut sa, nggonna ne waii kwop wari.
28Sane yo, su kam gato yekwop sun kadit sukkwop it yo, nggon gato kra su pa ge mufit ne te, bere nggon ré tepsu pa u bi nggon ne?"
29Yefun Yesus ki nai ye Saduki ne do, "Nin jam nde Yefun Allah bi sukdu, nin jam nde Yefun Allah bi suktinggi, sane anato nin bi sukjimnut siri.
30We sare, ye gato kem mo bur ré sa, án kra su yu, sarewo su kam gato yekwop sun it yo, yé mwa ne sino bere yo kra su yu o nde, wo yé mwa ne tepsu malaikat mo gu sor re, yé yo kwop o nde.
31Nin watbot sukdu gato Yefun Allah ki subot yé gato sun kadit sukkwop ne mó bado? Yefun Allah ki do,
32'Ji anato Yefun Allah gato jom Abraham, Isak si Yakub.' Yenggras ka gri ne da kwop su nyim neya, sarewo án mbau satu. Sane Yefun Allah yo jom ye gato kwop nde, wo Yefun jom ye gato mbau sor."
33Yé mwa gato sum mone jam sukdu ne sa, án yeket sukdu gato Yefun Yesus duno án su ne.
34Ye Farisi jam do, Yefun Yesus ki bi sukdu gato ben ye Saduki not sa, án sum, orete án mu ku Yefun Yesus.
35Ye Farisi ge dik yo gato owa duno nje su Yefun bi sukdu ne meret os wa Yefun Yesus. An ndo Yefun Yesus subot sukduno kwa yo.
36Ye ne ndo do, "Yeguru, kadit sukdu mwa gato Yefun Allah duno men su ne, sukduno u anato sye wai kadit sukduno yi neya ne?"
37Yefun Yesus ki do, "Men bi sukjimnut sye kas subot Yefun Allah Ye gato gesyos gato jom men ne et. Men bi men nggwa wa men ben An bi suk-i sisu men mit dik, men onyar dik, men bi sukjimnut dik et.
38Sukduno gato sye wai, gato men jammo nyim kadit sukduno yi ne anane.
39Sukduno kwa dowe bergan bi sukjimnut tepsu yu, sare do, 'Men bi sukjimnut sye kas subot ye yi tepsu men bi sukjimnut sye kas subot men dakai et.'
40Sukduno kwa we ré anato tepsu i-ke wa sukduno mwa ne mo Musa bi sukduno-i sisu yenabi bi sukduno-i ne sino."
41Ye Farisi sum mone tó, Yefun Yesus ndo mo án do,
42"Nin nutbot Yekwesu gato Yefun Allah syogat ma mo bur ré wa ós yetu ne sa u ne? Ye ne tepsu je u bi dat ne?" Ye Farisi ki do, "An anato Daud bi Dat."
43Yefun Yesus ki nai án do, "Sane, suma ben anato Yefun Allah Gen pet mo Daud, ete Daud kendo An do, 'Ji bi Yekwesu' ne? We sare, Daud krom do,
44'Yefun Allah, Ye gato gesyos ki nai ji bi Yekwesu do, Nan kem tak Ji de syim ge. Nan si Ji tepsu Yekwesu sino mone sane sor Ji syo yeko gato iwa gu Nan mo Nan syim, subere án jammo Nan et.'
45Sane mo Mazmur ne, Daud kendo Kristus tepsu an bi Yekwesu. Sane men kendo Kristus do, 'Daud bi Dat' sor nde, wo An tepsu 'Daud bi Yekwesu' dom."
46Yetu ge dik yo mone yo nggiwa ki suk satu nai Yefun Yesus nde. Sane kadit kam ne, ye yo ma ndobot Yefun Yesus wa meret os wa An o nde.