Alkitab Mobile SABDA
[VER] : [ABUN]     [PL]  [PB] 
 <<  Matius 23 >> 

1Orete Yefun Yesus ki nai yé mwa gato sum mone sisu An bi pakon do,

2"Yeguru agama si ye Farisi duno men su Musa bi sukduno.

3Sane suk mwa gato án duno men su ne, men jammo, ete men benbot. Wo án dakai yo benbot suk gato án duno men su nde. Sane men benbot suk gato án dakai ben ne nde.

4Án bes sukde ne mo yé kwake, ete án far krat mone, wo án yo ós wa sam sukde ne nde, án yo ós wokgan yo dom nde.

5Suk mwa gato án ben ne, án ben subere yé me suk gato án ben ne sor re, wo án mit tara re. Án it kotak wokgan mo án git si án syim yo, án ben kotak ne sye wai kadit yé yi ne, subere yé nut do, án sa, yepasye mo Yefun bi de-i. Sane dom, san yar gato yé bit mo án bi san nap ne, án ben án bi ne syu wai, subere yé nut do, án sa, yekwesu mo Yefun bi de-i.

6Án iwa án kem mo pe gato yé fro wa yepasye ma kem mó, sato mo nu ari e, mo pesta e ne subere yé bes án gum kok mone.

7Án do mu mo pasar it yo, án iwa yé mwa mo pasar ki do, yepasye ana ma ne, ete yé ki do, 'kam ndo' mo án.

8Wo Ji ki sare do, nin sino tepsu yedik, sane nin bes ye yo gum 'yeguru' daret nde. Nin bi Yeguru ne ka dik sor, Ji dakai.

9Nin kendo ye yo mo bur ré gum do 'nin bi ai' daret nde, we nin bi ai ka dik sor, ete An kem mo gu.

10Sane dom, nin kendo ye yo gum do 'yekwesu' daret nde, we nin bi Yekwesu ge dik sor anato Kristus gato Yefun Allah syogat ma mo bur ré wa nai nin yetu kadit sukye ete jowa nin.

11Ye gato nin bes gum yekwesu, an anato ye gato ben suk tepsu nin bi pakwerut ne et,

12we ye gato bes an nggwa kok tepsu an yepasye, bere Yefun Allah ben an damen o re, wo ye gato is an nggwa ga tepsu pa wokgan, bere Yefun Allah dakai bes an gum yepasye o re."

13"Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Ben sato nin syimwa nusyo subere ye yo ku os wa sok mo Yefun Allah bi rus-i nde. Nin yo sok nde, or o nin ben sukye yawa os wa ye gato iwa sok mone dom.

14[Nin yeguru agama, bere nin ku sukye. Nin ye Farisi, bere nin ku sukye. Nin kidar nggonna subere nin nai suk mo nggonna ne bi nu or sino. Sane dom nin benadi syu, subere yé mwa gato me nin ben sane nut do, nin sa, ben Yefun Allah bi suk-i sisu ndo, ondewo nin ben nin bi suk-i ibit re. Sane bere Yefun Allah syo sukye gato de wai nai nin mone o re.]

15Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Nin mu mo os syu mu mo peyo-peyo, nin bi win mo sem mu mo bur yi meret ye yo wa nin but tepsu nin bi pakon. Nin ku it yo, bere nin ben pa ne ibit wai kadit nin o re, ete ri ma pa ne ges mo bot gesyos re.

16Nin anato tepsu ye gato ós ye yi muket os, sarewo nin gro ndu. Bere nin ku sukye. Nin duno nje su sukduno-i gato siri kadit Yefun Allah bi sukduno-i. Nin ki do, 'Ye yo tom suk ete syo an syim su do, "Yefun Allah bi nu anane," yo, bere nin ki do, an yo benbot suk gato an tom ne nde yo, suk yo o nde. Wo an tom suk, ete an syo an syim su do, "Yefun Allah bi nu bi emas anane," yo, bere nin ki do, an yo benbot suk gato an tom ne nde yo, bere an ku sukye.'

17Nin jimgon, nin tepsu ye gato gro ndu. Suma anato ndo wai ne, emas bado, Yefun Allah bi nu gato ben emas ne tepsu Yefun Allah bi suk-i ne?

18Nin duno nje o do, 'Ye yo tom suk, ete an syo an syim su do, "Meja gato men grem suk yo wa som Yefun su ne anane," yo, bere nin ki do an yo benbot suk gato an tom ne nde yo, suk yo o nde. Wo an tom suk, ete an syo an syim su do, "Suksom gato ji gwat ma grem mo meja ne wa ji som Yefun su anane," yo, bere nin ki do, an yo benbot suk gato an tom ne nde yo, bere an ku sukye.'

19Nin gare, nin gro ndu ndo nde. Suma anato ndo wai ne, suksom gato an gwat ma ne, bado, meja gato ben suk ne tepsu Yefun Allah bi suk-i e?

20Sane, ye gato tom suk, ete an syo an syim su do, 'Meja gato men grem suk yo wa men som Yefun su ne anane,' yo, tepsu an syo an syim su meja si suksom mwa mone sino dom.

21Sane dom, ye gato tom suk, ete an syo an syim su do, 'Yefun Allah bi nu anane,' yo, tepsu an syo an syim su nu ne si Yefun gato kem mo bi nu ne dom.

22Sane dom, ye gato tom suk, ete an syo an syim su do, 'Gu ana nim ne,' yo, tepsu an syo an syim su Yefun Allah bi nat si Yefun Allah gato kem mone dom.

23Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Suk gato nin fros su sugit wa ben sugit ne wik sato selasih e, adas manis si jintan yo, nin tik but musyu dik, ete nin syo but dik yo nai Yefun. Nin ben sukwokgan sane da ndo, sarewo nin misyar sukduno gato sye wai mo Yefun Allah bi sukduno wa suma ne? Sukduno sato, men ben suk ri-roi su nje e, men dakai jimnotku nje e, men ben suk su nje tepsu pe gato men tom e ne, nin misyar nde, wo nin benbot sor. Nin misyar sukduno gato sye wai sane nde. Sane dom, sukduno wokgan ne, nin misyar dom nde, wo nin benbot sukduno mwa ne sino sor.

24Nin gare tepsu ye gato gro ndu. Nin fre biran kadit syur gato nin da, sarewo nin dakai kuk suge sye sato unta.

25Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Nin mus gelas si mbem mo de nden kwo sor re, wo mo mit ne dum ndo nde, tepsu nin ben nin nggwa ndo mo nden sor re, wo nin mit tara re. Nin mit ne dum su suk sato, nin gro sye wa nin ku suk mwa, nin dakai nut subot nin dakai sor re, nin yo nutbot ye yi nde.

26Nin ye Farisi gro ndu wai o re! Nin mus nin bi gelas si nin bi mbem ne mo mit nyim, sane bere mo de nden ne ndo dom.

27Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Nin tepsu makwe gato yé fro bi nu ne kwo ndo mo de nden ne sa, ndo wai o re, wo mo mit ne yekwop dini si i-ku gato kwik ete mbras mó.

28Nin sane dom, mo de nden sa, yé mwa ne nut do, nin sa, ben sukndo tepsu Yefun Allah mit, sarewo nin mit ne tara re, nin ben kidar nje, nin ben sukibit petok sor."

29"Nin yeguru agama, bere nin ku sukye. Nin ye Farisi, bere nin ku sukye. Nin ki suk su nin syokwet sor re. Nin fro makwe gato ndo wa yenabi. Ye gato ben sukndo tepsu Yefun mit ne, nin mbrau bi nu mo makwe.

30Ete nin ki do, 'Men kem su kam gato men bi amui kem sor sa, men yo si án gu yenabi kwop nde.'

31Nin ki sane anato tepsu nin dakai ki nin gum ibit, we nin bi amui anato gu yenabi kwop.

32Sane yo, suk gato nin bi amui ben ne, bere nin waii ben sane dom re!

33Nin ben nin bi suk-i ibit, nin tepsu kwis! Nin si nin bi amui sino ben sukibit tepsu yu. Bere je u anato nai nin kadit sukye gato bere nin ku mo bot gesyos ne?

34Nin jammo suk gato Ji ki ré et, bere Ji syogat yenabi deyo ma, bere Ji syogat ye gato jam suk mwa si yeguru ma dom, wo bere nin gu deyo kwop, bere nin mban deyo mo kwesukwin, bere nin kwam deyo mo nin bi nu ari, ete nin syun deyo kadit kota dik yo mu mo kota dik yo.

35Sane ri ma, bere nin ku sukye mo yé mwa gato ben sukndo tepsu Yefun mit gato nin si nin bi amui gu kwop wé ne. Ketke kadit nin bi amui gu Habel, gato ben sukibit yo mo nde. Or o nin bi amui gu ye yi bok yo o sor kom mo Zakaria, gato Berekia bi pa. Nin bi amui gu an kwop mo Yefun Allah bi nu si bot kot wa ye gre suge mó wa som Yefun su mone ndet.

36Suk gato Ji ki ré suksangge anare, nin gato kem mo bur su kam ré, bere nin anato ku sukye mo yé mwa gato nin bi amui gu kwop ne."

37"Kamapa! Nin yé gato kem mo kota Yerusalem, nin gu yenabi kwop, nin am ye gato gwat Yefun Allah bi suktaru ma su jok. Kapre nin gu yenabi kwop sane o, Ji iwa Ji mewa nin tepsu ndam kokor mewa bi gan mo i desnak, sarewo nin bariwa re.

38Sane bere Yefun Allah misyar nin re, bere Yefun yo sisu nin o nde.

39Ji ki sare do, kadit kam ré nin yo ku Ji o nde, sane sor tepsu kam gato nin ki do, 'Ye gato Yefun Allah syogat ma ré, Yefun Allah ben sukndo su An et!' "


  Share Facebook  |  Share Twitter

 <<  Matius 23 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran