Dual Panel1Yefun Yesus mu kadit Yefun Allah bi nu saresa, An bi pakon ma ku An ete ki do, "Nan sokbot Yefun Allah bi nu ré et."
2Yefun Yesus ki do, "Nin dom sokbot nu ne et. Suk gato Ji ki ré suksangge anare, ri ma jok mwa gato yé nggo nu su ne, bere yé ma krut jok mwa ne or re, dik yo ut mo dik yo o nde."
3Yefun Yesus mu kem mo banbo gato gum do Zaitun sa, An bi pakon ma ku An wadigan mone, ete pakon ndo mo An do, "Kam u ete bere suk gato Nan ki ne bor ne? Suk sato suma anato bere bor nyim wa ós men jam do, bergan it, Nan satu ma mo bur ré, ete bur ré kru ne?"
4Yefun Yesus ki do, "Nin mewa nin nggwa sawe yé yo ma kidar nin.
5Bere yé mwa ma ki do, 'Ji anato Kristus gato Yefun Allah syogat ma mo bur ré,' ete án kidar yé bok ne sino jammo án re.
6Bere nin jam sukdu subot yé ben sukndi karowa nin, bere nin jam sukdu subot yé gato gu yu mo peyo-peyo, sarewo nin nyu nde. Bur ré yo kru nde tó, bere yé ben sukndi ete gu yu nyim wé et.
7Bere negara deyo futma gu negara deyo o. Bere yewis deyo futma gu yewis deyo o mone tó. Bere sui sye juwai bur ré ram mo peyo-peyo. Bere sukonde sye bor mo peyo-peyo.
8Nin me suk bok gane bor it yo, karowa bur ré kru it anane, tepsu nggon gato nukwe i su pa, bere nggon ne kem su bi pa.
9Su kam gane ma, yé mwa mo bur ré iwedewe bere bariket nin yé gato onyar kem mo Ji. Sane bere yé but nin e, yé ben sukye nai nin, ete yé gu nin kwop.
10Sugane, yé mwa gato onyar kem mo Ji, bere misyar Ji or re. Bere yé meret os wa yu, bere yé bariket yu.
11Bere ye gato kidar do, án tepsu yenabi gato gwat suktaru kadit Yefun Allah ne bor ete kidar yé mwa.
12Sugane yé ben sukibit mwa wai anato yé yo jimnotku yu saga nyim ne o nde.
13Wo ye gato onyar kem pe mo Ji sor kom mo pe gato or mó yo, bere an kem ndo to kapyo mato kapyo.
14Bere ye ki sukdu subot os ndo gato Yefun Allah fro wa men yetu subere Yefun Allah nai men gum sok mo An bi rus-i, ete An tepsu men bi Yekwesu mone. Sukdu gato ndo ne, bere yé ki frek subot yewis mwa mo bur ré or sino, eteyo bere bur ré kru it anane."
15Yefun Yesus ki o do, "Bere su kam sari ne ma nin me yetu ge dik yo ma mo Yefun Allah bi nu, ete an sok mo Yefun Allah bi gumwak fo mo Yefun bi nu mit. Ye ne, an mise teker, ete an gwat suk yo ma mone gato ben gumwak fo ne ibit, bere Yefun Allah bariwa gumwak ne or re. (Nin yé mwa ne sino gato baca sukdu gare, nin nutbot bi sukjimnut sisu ndo et.) Yenabi Daniel anato krom sukdu subot sukdu ne.
16Nin do me ye ne ma ben Yefun Allah bi nu mit ibit it yo, nin yé gato kem mo bur Yudea titi mu mo banbo et.
17Nin dogato ti mo bi nu yu is mo nu mit wa nai suk yo mone nde, wo nin titi sor!
18Nin dogato ben suk mo nggwe satu mu mo nu wa nai bi san nit nde. Nin titi sor!
19Su kam ne nggon gato syimfar si nggon gato pe bi pabom er tó ne, bere ku sukye ndo nde.
20Nin ki suk su Yefun Allah subere sukye gato ben nin ye Yudea ne yo bor su aina gato nyot dek nde. Nin ki suk su Yefun Allah subere nin titi su kam sye kam Sabat dom nde,
21we su kam gane yé ku sukye ndo nde. Kadit kam gato Yefun Allah ut bur ré sor kom mo kam gato bur ré kru, yé yo ku sukye gato yé teker sato sukye ré yo mo nde, sukye gato yé ku su kam ne bere ye wai o re.
22Bere kam gato yé ku sukye su ne Yefun Allah tot napyo wé, ondeyo yé mwa ne kwop or. Yefun Allah jimnotbot yé gato Yefun fro suga nyim wa An nai sok mo An bi rus-i, sane bere An tot kam gato yé ku sukye su ne napyo wé re.
23Sane su kam gane, ete ye yo do ma ki do, 'Nin me ye ré et! Kristus gato Yefun Allah syogat ma wa jowa men anato ma it! Nin me ye motu et! Kristus anatu it!' yo, nin jambot nde.
24Ye gato ben kidar do, an dakai anato Kristus gato Yefun Allah syogat ma mo bur ré wa nai men yetu kadit sukye ete jowa men ne bere mó. Sane dom yenabi gato ma wa kidar nin bere mó. Yé bok ne bere kadum bi suktinggi, ete ben suk gato ben nje yeket ndo nde. Yé bok ne ben bi suk-i, bergan án ben kidar nje gato Yefun fro suga nyim wa Yefun nai sok mo Yefun bi rus-i, sarewo án yo ku os mone nde.
25Sane, nin jammo suk gato Ji ki ré, sukdu bok ne, yo bor nde tó, Ji ki napyo nai nin jam nyim wé re.
26Sane ye yo do ma ki nai nin do, 'Yetu bi Pa ma kem mo pe gato kwe yo kom mo nde,' yo, nin mu me mone nde. Sane dom, ye yo do ma ki do, 'Yetu bi Pa gurik nggwa mo nu mit mone ya,' yo, nin jambot nde.
27We sare, Yetu bi Pa ma it yo, bere yé mwa me An ma tepsu nowarek rer bot gu kadit nobu nim kom mo nobu ket.
28Yetu bi Pa ma yo, bere nin jam An ma re, tepsu nin jam suge dik yo kwop, we ndam syap mwa sum wairi wa suge mukri ne."
29"Sukye gato yé mwa ne ku su kam bok neya orete yo, kam su mo gu, bere Yefun Allah te re. Aina bere ru rer o nde. Bí mwa ne ges kadit gu or. Suk mwa mo gu nim ne yo kas ri o nde.
30Su kam gane Yetu bi Pa to Ji ré bere bor mo gu. Bere Ji is ma sisu nyotem, Ji kaim rer-rik su Ji bi suktinggi gato bor mone. Sane yé mwa ne sino mo bur ré iwedewe bere nyu ete wo.
31Malaikat dik yo fuf trompet ba sye yo, bere Ji syogat Ji bi malaikat mubot bur ré iwedewe nai yé gato Yefun Allah fro suga nyim wa An nai sok mo An bi rus-i ne. Malaikat ne bere nai yé ne kadit nobu nim, kadit nobu ket, kadit nobu sem, kadit nobu nden. Malaikat nai yé mwa ne sor kadit bur ke kom mo bur naprut ne."
32"Men nutbot kwe ara, subere men jam sukduno kwa yo o et. Kwekwa ne kur ete i-nat kup be bor sim yo, men jam do, bergan no kro it anane.
33Sane dom, nin me suk mwa gato Ji kibot gare bor it yo, bere nin jam do, yo nam nde ge, Ji ma tepsu yetu bi Yekwesu it anane.
34Suk gato Ji ki ré suksangge anare, yé gato kem mo bur su ré, án sino yo kwop nde tó, suk gato Ji ki ne bor sino re.
35Gu nim ne si bur ré bere kru re, wo Ji bi sukdu ne kem sor to kapyo mato kapyo."
36"Kam gato Yetu bi Pa to Ji ré satu ma su ne, yetu ge dik yo jam kam ne nde. Malaikat mo gu dom jam nde re. Ye yo jam bi kam-i nde. Ye yo jam bi jam-i dom nde. Ji dakai, gato Yefun Allah bi Gan jam nde dom re, wo Yefun Allah wadigan sor ete jam.
37Kam gato Ji ma su ne tepsu kam gato Nowak kem mo bur ré.
38Su kam gato syur syé nde tó, yé git sugit e, yé da syur e, yé kra yu e ne. Yé ben suk gato sagana yé ben ne sane sor kom mo kam gato Nowak sok mo bi kwem mit ne.
39Wo yé yo bi sukjimnut kom mo suk gato bere bor mone nde, sane sor syur syé ma gwat án or wé re. Sane dom, Ji satu ma mo bur ré yo, bere yé yo bi sukjimnut kom mo suk gato bere bor mone dom nde.
40Su kam ne yetu ge we yo ben suk mo nggwe yo, bere Ji ma nai ge dik yo, wo ge dik yo Ji misyar kem.
41Nggon ge we yo krut bi gandum mo pe yo, bere Ji nai ge dik yo, wo ge dik yo Ji misyar kem.
42Sane nin frawa nin nggwa, we nin jam nde kam gato bere nin bi Yekwesu ma su ne.
43Ye gato bi nu jam do, ye gato syimsi suk ma su noru ne yo, bere an eswa yesyimsi ne, ete yesyimsi ne yo ku os wa sok mo nu ne nde.
44Sane dom, nin fro nin nggwa petok sor, we bere Yetu bi Pa ma su jam gato nin jam ri nde."
45Yefun Yesus ki o do, "Pakwerut gato jam suk mwa, ete ben bi suk-i ri-roi tepsu bi yenggras mit ne te, men jam pa ne sa u ne? Pa ne ben bi suk-i sa u ne? Pa ne anato tepsu pa gato yenggras bes tepsu yesu wa yenggras bi pakwerut sino. Pa ne mewa pakwerut bok neya sisu ndo, pa syo sugit tep wa pakwerut git ne sino.
46Pakwerut ne bi yenggras do ma ku pa ne yo, pa gato benbot suk gato bi yenggras syogat pa ben ne bere pa ku sukndo mone.
47Suk gato Ji ki ré suksangge anare, bere yenggras ne bes pa ne wa pa mewa yenggras ne bi suk mwa ne sino.
48Wo pakwerut ne ben sukibit, ete pa nut mo pa dakai do, 'Ji bi yenggras, nam ete bere ma,'
49ete pa ne kwam pakwerut yi ne daret e, pa git e, pa da nau si yenau e ne.
50Orete pa bi yenggras satu ma su mit, sisu kam gato pa jam ri nde, si jam gato pa jam ri nde.
51Sane bere pa bi yenggras sap pa kaim wip ndo nde. Orete yenggras syun pa ne mu ngga mo pe gato yé. Mo pe ne pa si ye gato kidar do, an mit iwa an ben an bi yenggras bi suk-i, sarewo an mit tara re. Pa ne si yé ne ku sukye mone sino, án wo ndo nde, án sino nderku án dakai mone."