Alkitab Mobile SABDA
[VER] : [ABUN]     [PL]  [PB] 
 <<  Matius 25 >> 

1"Su kam gato bere Yetu bi Pa ma tepsu men bi Yekwesu, bere yé ben suk mo bur ré tepsu sukamno ré: nggonnak ge musyu dik gwat án bi sukru ete mu sakanwa yebris gato bere kra.

2Nggonnak ge mumek yo jimgon, ge mumek yo o jam suk mwa.

3Ge mumek gato jimgon ne gwat án bi sukru, sarewo án yo gwat manik su nde.

4Nggonnak ge mumek gato jam suk mwa ne, án gwat manik su sukbo wa án bi sukru.

5Yebris gato bere kra ma yó, sane nggonnak bok ne syugwot ete sem re.

6Noru miten, ete ye yo saiye do, 'Yebris gato bere kra ne ma it! Nin ma men mu ku an et!'

7Nggonnak ge musyu dik ne sun ete fro án bi sukru.

8Ge mumek gato jimgon ki nai ge mumek gato jam suk mwa do, 'Men bi sukru bergan manik sa, sane nin syo manik yo nai men et.'

9Ge mumek gato jam suk mwa ki do, 'Men bari, men gwat manik yo tepsu nin si men sino nde. Nin dakai mu so mo kios.'

10Ge mumek gato jimgon mu so manik saresa, yebris gato bere kra ne ma. Ge mumek gato fro ne si yebris ne mu mo pe gato yé konwa sukra ne, ete ye syimwa nusyo ne krat wari re.

11Bergan nggonnak ge mumek gato jimgon ne ma me nusyo ne krat ete saiye do, 'Yenggras, yenggras nan kak nusyo wa men et!'

12Yebris gane ki do, 'Ji bari. Ji jam nde nin re.'

13Sane nin mewa nin nggwa, we nin jam nde kam si bi jam gato Yetu bi Pa ma su ne."

14"Yefun Allah ben suk su yetu gato An nai sok mo An bi rus-i tepsu yenggras mo sukamno ré: yenggras dik yo mu mo pe yi yo nde tó, an kendo an bi pakwerut ne ma, ete an bes pa ne sino wa mewa an bi suk.

15An me an bi pakwerut gato ben suk nggi, ete an bi sugum nai pakwerut ne tepsu pa ne bi suktinggi ne. Sane pa gato nggiwa ben suk mwa, an syo sugum det mumek . Pa gato nggiwa ben suk tep, an syo sugum det we. Pa gato nggiwa ben sukwokgan, an syo sugum det dik. An syo sugum ne, orete an mu.

16Pa gato ku sugum det mumek mu ben suk su kekro, ete pa ne ku sugum det mumek yo tó o.

17Sane dom, pa gato ku det we waii ben suk su sugum ne, ete ku det we yo tó o.

18Wo pa gato ku sugum det dik, pa gwat sugum ne mu, pa po bur wak, orete pa gurik yenggras bi sugum mone.

19Nam ete pa bi yenggras satu ma, ete yenggras kendo pa ne sum wa an ndobot pa mo sugum gato an syo pa nai ne.

20Pa gato ku sugum det mumek gwat sugum det mumek yo tó o ma, ete ki nai bi yenggras do, 'Yenggras, nan syo sugum det mumek nai ji. Nan me ré, ji ku det mumek yo tó o ré.'

21Yenggras ki do, 'Nan sa, pakwerut gato ben sukndo, nan ben nan bi suk-i ri tepsu ji mit. Nan ben nan bi suk-i ri su sukwokgan gato ji syo nai nan, sane ré yo, ji bes nan wa mewa suk mwa. Nan ma men konwa sino et.'

22Pa gato ku sugum det we ma dom. Pa ne ki nai bi yenggras do, 'Yenggras, nan syo sugum det we nai ji. Nan me ré, ji ku det we yo tó o ré.'

23Yenggras ki do, 'Nan sa, pakwerut gato ben bi suk-i ndo, nan ben nan bi suk-i ri tepsu ji mit. Nan ben nan bi suk-i ri su sukwokgan gato ji syo nai nan, sane ré yo, ji bes nan wa mewa suk mwa. Nan ma men konwa sino et.'

24Orete pa gato ku sugum det dik ne ma. Pa ne ki nai bi yenggras do, 'Ji jam do nan anato ye gato syogat nan bi pakwerut sam sukde, nan nai suk kadit pe gato nan bi kamba mo nde.

25Sane ji nyuwa nan, ji gwat nan bi sugum, ete ji gurik mo bur wak. Nan me ré, nan bi sugum det dik anare.'

26Yenggras ne ki do, 'Nan yebambrai, nan ben sukibit. Nan da jam suk gato ji ben ne, sarewo nan dakai bambrai. Nan jam ji nai sugit gato kri mo nggwe gato ji jan nde. Nan jam ji nai suk kadit pe gato ji bi kamba mo nde, sarewo nan dakai bambrai.

27Wo nan gwat ji bi sugum grem mo bank sa, bere ji satu ma, ete ji ku sugum ne su bi bunga o tó, ji ku sugum mwa gan yo o.'

28Sane yenggras ne syogat pa yi ne do, 'Nan nai sugum kadit pa ré, ete nan syo nai pa gato sum sugum kom mo det musyu dik ne.

29We sare, ye gato bi suk mó yo, bere an ku suk mwa yo o, ete an ku suk mwa wai o re. Ye gato mewa suk gato ye yi syo nai an sisu ndo yo, bere Yefun Allah bes ye ne jowa suk mwa wai o. Wo ye gato bi suk yo mo nde yo, wokgan gato mó yo, bere yé nai wé kadit an re.

30Sane nin gwat pa gato bambrai ré, ete nin bare pa ne mo pe gato ndendu. Mone bere pa ne wo ete nderku nggwa.' "

31"Su kam gato Ji, gato Yetu bi Pa, ma su Yefun Allah bi suktinggi ne tepsu nin yetu bi Yekwesu, bere Ji sisu Ji bi malaikat ma sino. Ji gum kok sye wai o re, Ji kem mo Yekwesu bi kursi gato ndo yé re.

32Yewis mwa ne sino mo bur ré iwedewe sum mo Ji gwem, ete Ji wat yetu tepsu ye gato mewa suksi wat domba kadit kambing.

33Ji wat, ete Ji grem domba tak Ji de syim ge, wo kambing tak Ji de syim jam.

34Sugane Ji, gato Yekwesu mone bere Ji ki nai nje gato tak Ji de syim ge do, 'Nin ma, nin yé gato Ji bi Ai ben sukndo su. Nin ma nin nai suk gato Yefun Allah fro wa nin ne. Yefun fro nat wa nin si An gum yekwesu mone sino, An fro nat ne ndek kadit kam gato An ut bur ré re.

35Nin ben sukndo su Ji anato Yefun Allah fro nat ne wa nin. Nin ben suk sato: Ji on de, ete nin syo sugit nai Ji git. Ji sosa, ete nin syo syur nai Ji da. Ji tepsu yedamok, ete nin kendo Ji ma si nin kem.

36Ji yewa san, ete nin syo san wa Ji it. Ji i, ete nin mewa Ji. Yé bok Ji mo sel, ete nin ma ku Ji mone.'

37Sane su kam ne ye gato ben suk tepsu Yefun Allah mit ne ki do, 'Yenggras, men ku Nan on de, ete men syo sugit nai Nan git su kam u ne? Men ku Nan sosa, ete men syo syur nai Nan da su kam u ne?

38Men ku Nan tepsu yedamok, ete men kendo Nan ma si men kem su kam u ne? Men ku Nan yewa san, ete men syo san nai Nan it su kam u ne?

39Men ku Nan i, ete men mewa Nan su kam u ne? Men jam yé bok Nan mo sel, ete men mu ku Nan mone su kam u ne?'

40Bere Ji, gato Yekwesu mone ki do, 'Suk gato Ji ki ré suksangge anare, suk gato nin ben wa Ji bi rus-i, kapre yé ne pa wokgan, tepsu nin ben suk ne wa Ji dakai.'

41Sane o, bere Ji ki nai yé gato tak Ji de syim jam ne do, 'Nin mu kadit Ji. Yefun Allah dufo mo nin it. Nin mu ngga mo bot gesyos gato Yefun Allah fro wa biris bi yekwesu si bi rus-i ne et.

42We, Ji on de, ete nin yo syo sugit yo nai Ji git nde. Ji sosa, ete nin yo syo syur yo nai Ji da nde.

43Ji tepsu yedamok, ete nin yo kendo Ji ma si nin kem nde. Ji yewa san, ete nin yo syo san yo wa Ji it nde. Ji i e, yé bok Ji mo sel, ete nin yo mewa Ji nde.'

44Sane bere yé gato tak Ji de syim jam ne waii ki do, 'Yenggras, men ku Nan on de e, sosa e, tepsu yedamok e, yewa san e, i e, mo sel, ete men yo ós Nan nde su kam u ne?'

45Bere Ji ki do, 'Suk gato Ji ki ré suksangge anare, suk gato nin yo ben wa Ji bi rus-i nde, kapre yé ne pa wokgan, tepsu nin yo ben wa Ji dakai nde.'

46Sane yé tak Ji de syim jam ne bere ges mu ngga mo bot gesyos, wo yé gato ben suk tepsu Yefun Allah mit yo, bere kem ndo to kapyo mato kapyo."


  Share Facebook  |  Share Twitter

 <<  Matius 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel