Dual Panel1"Nin ki ye yi gum ibit nde. Nin ki ye yi gum ibit, sane bere Yefun Allah waii ki nin gum ibit dom,
2we Yefun ki nin gum-i tepsu nin ki ye yi gum-i ne. Sane nin ki ye yi gum-i ibit sye o yo, bere Yefun Allah waii ki nin gum-i ibit sye o.
3Suma ben anato nin ki nin bi nji mo sukkwik wokgan mo an gro-i, sarewo nin misyar kwemuk gato yawa nin gro-i ne?
4Nin ki nai nin bi nji do, 'Ji kwa sukkwik wé kadit nan gro et.' Wo nin dakai gro-i kwemuk kewa re, ete nin ki sane bere sa u ne?
5Nin tepsu ye gato ki suk su an syokwet wik ko re go! Nin nai kwemuk wé kadit nin dakai gro-i et, subere nin gro-i rer, orete nin kwa sukkwik ne wé kadit nin bi nji gro-i ne.
6Nin syo Yefun Allah bi suk-i nai ndar nde, we bere ndar brek ma ete gu nin. Sane dom, nin syo nin bi suk gato bi sugum sye sato mutiara nai jot nde, we bere jot ne yakos mo bur sor re. "
7"Nin ndek gat Yefun Allah sane sor, bere Yefun Allah syo suk nai nin; nin meret gat sane sor, bere nin ku; nin nggo nusyo gat sane sor, bere Yefun Allah kak nusyo wa nin.
8We, sare, ye to ndek gat Yefun Allah, bere Yefun Allah bi suk nai an; ye to meret gat, bere an ku suk gato an mitmo ne; ye to nggo gat, bere ye kak nusyo wa an.
9Nin bi pa ndekwa roti it yo, bere nin syo jok yo nai pa ne bado? Nde re.
10Pa ndekwa boge it yo, bere nin syo kwis nai pa ne bado? Nde re.
11Nin yé gato ben sukibit ne, nin jam nin syo suk gato ndo nai nin bi pa. Sane bere, nin ndek suk mo nin bi Ai mo gu yo, bere nin bi Ai syo suk gato ndo wai kadit ne o re."
12Sane Yefun Yesus ki do, "Suk bok gato Ji duno nin su ne tepsu Musa si yenabi krom mo bi sukduno-i sare do, 'Suk gato nin mit iwa ye yi ben su nin ne yo, nin ben suk sane su ye yi neya et.' "
13"Nin muket os gato bi ros syo ne nggwot et. Os gato ndo anane, sarewo nin do muket os gato bi ros syo ne re yo, bere nin ngga mo bot gesyos mo koirut. Os gato fro mo bot gesyos yé muket ne ndaf, ete yetu mwa muket os ne.
14Sarewo os gato fro mo pe gato men kem ndo to kapyo mato kapyo ne, os ne yé re. Os ne bi ros syo ne nggwot, ete yetu gato muket os ne yo mwa nde."
15"Nin mewa nin nggwa kadit yenabi gato kidar nin. Yenabi ne ma ku nin, ete án brek nden we, án ben án nggwa sato domba mo de nden, wo án mit ne tepsu ndar krok.
16Bere nin jam án mo suk gato án ben ne. Kwe gato jak mwa mó, bere yo bo sato anggur bo nde. Es damen yo bo-i sato kwe ara bo-i nde.
17Sane dom kwe gato kom ndo, bere bo ndo, wo kwe gato kom ibit, bere bo ibit.
18Kwe gato kom ndo, bere yo bo ibit nde. Sane dom kwe gato kom ibit, bere yo bo ndo nde.
19Kwe gato yo bo ndo nde, bere ye gwa wé, ete ye gre mo bot.
20Sane bere nin jam yenabi gato kidar nin mo suk gato án ben ne.
21Mo yé bok ne sino gato kendo án bi Yekwesu mo Ji, ge bok yo bere yo sok mo Yefun Allah bi rus-i nde. Ye gato benbot Ji bi Ai mo gu bi sukdu-i ne sa, bere ye ne sor ete sok mone.
22Sarewo kam gato Yefun Allah ndobot yé bok ne sino, bere yé mwa yo sok mone nde. Bere yé mwa ne ki nai Ji do, 'Nan anato tepsu men bi Yekwesu. Men nai suktinggi mo Nan gum, ete men ki sukdu gato Yefun Allah tarubot men wa yé jam. Sane dom men nai suktinggi mo Nan gum ete ben suk mwa gato yetu yeket, men ben ye gato i ne ge e, men syun semda wé kadit ye gato semda ben e ne.'
23Bere yé bok yo da ki sane, sarewo bere Ji ki rer nai án do, 'Ji yo jam nin nde. Nin yé gato ben sukibit gato siri kadit Yefun Allah mit ne, nin mu kadit Ji tom!' "
24"Sane ye gato jammo ete benbot sukdu gato Ji ki ne anato tepsu ye gato jam suk ete nggo an bi nu mo jok.
25Nu ne an nggo krat mo jok, sane nogi do gwa nu ne, syur syé ma pet mo nu ne, nofuf kas nggi ma ti mo nu ne yo, nu ne yo e nde.
26Sarewo ye gato jam sukdu gato Ji ki ne, ete an yo benbot nde yo, ye ne tepsu ye gato jam nde suk ete an nggo an bi nu mo yen.
27Sane nogi do gwa nu ne, syur syé ma pet mo nu ne, nofuf kas nggi ma ti mo nu ne yo, nu ne e gwa mo bur sor."
28Yefun Yesus ki sukdu bok gare, orete yé mwa mone yeket An, we An ki bi sukdu-i ne tepsu Yefun Allah dakai ki bi sukdu-i, An bi sukdu-i pet mo nje.
29Yeguru agama ne, án ki ye yi gum mo án bi sukdu-i subere yé jammo án, wo Yefun Yesus yo duno nje sane nde, Yefun dakai duno nje, ete yé iwa jammo Yefun bi sukdu-i ne sor.