Alkitab Mobile SABDA
[VER] : [ABUN]     [PL]  [PB] 
 <<  Markus 10 >> 

1Yefun Yesus ki bi sukdu-i or sa, Yefun Yesus mu kadit pe ne. An mu mo bur Yudea, or o An mu tok Syur Yordan deta. Yé mwa ma ku Yefun Yesus mone, sane Yefun Yesus duno yé mwa ne, tepsu sagana An duno nje mó re.

2Ye Farisi ge bok yo ma ku Yefun Yesus subere yé bok ne werwa meret os wa Yefun. Ye Farisi ne ndo mo Yefun Yesus do, "Men simo Musa bi sukduno-i ne yo, yekra ku os wa an sombok an bi nggon wé, bado, nde e?"

3Yefun Yesus ki nai án do, "Mo Musa bi sukdu-i ne te, Musa syogat nin ben sa u ne?"

4Ye Farisi ne ki do, "Musa duno men do, yekra gato iwa sombok an bi nggon wé, an krom mo surat do, an sombok an bi nggon wé it anane, orete an syogat an bi nggon mu kadit an."

5Yefun Yesus ki nai án do, "Musa krom sukdu sane, we nin bariwa jammo sukduno gato ndo, nin onyar krat ware.

6Sarewo su ketke Yefun Allah ut men yetu ne, ye ki do, 'Yefun Allah ut yebris, Yefun Allah ut nggon.

7Sane anato, yebris bere mu kadit an bi im si an bi ai ete an si an bi nggon kem tepsu yetu ge dik sor,

8we ye we gato kra ne, an we tepsu dik it.' An we yo tepsu yetu ge we o nde, wo an we tepsu yedik it.

9Yefun Allah ben yebris si bi nggon tepsu dik, sane anato yetu sombok an we ne wé kadit yu nde."

10Orge Yefun Yesus si bi pakon mu kom mo nu sa, An bi pakon ndobot An mo sukdu ne.

11Yefun Yesus ki nai An bi pakon do, "Ye to sombok an bi nggon ne wé, ete an kra su nggon yi yo o it yo, ye ne ben suk siri ses an bi nggon doketke anane.

12Sane dom nggon ne sombok an bi ya wé, ete kra su ye yi yo o it yo, nggon ne ben suk siri dom anane."

13Yetu ge bok yo gwat an bi pa wokgan ma mo Yefun Yesus subere Yefun Yesus ak syim mo pa ne, subere ri ma Yefun Allah ben sukndo su pa ne. Yefun Yesus bi pakon me yé gwat pa wokgan ne ma sa, pakon ne maskwa, pakon ndantom ye gato gwat pa wokgan ma ne.

14Yefun Yesus me suk gato An bi pakon ben ne sa, An maskwa ket An bi pakon. An ki do, "Nin misyar pa wokgan ma mo Ji sor, nin duyawa nde, we ye gato jammo Ji tepsu pa wokgan jammo bi ai, bere Yefun Allah jowa ye ne.

15Suk gato Ji ki ré suksangge anare, ye to bariwa jammo Yefun Allah tepsu pa wokgan jammo bi ai ne yo, bere ye ne yo ku os wa an sok mo Yefun Allah bi rus-i nde."

16Yefun Yesus ki sukdu ne or sa, Yefun Yesus nai pa wokgan ne ma, An kambrut pa ne gedik-gedik, ete An ak syim mo pa wokgan gedik-gedik ne sino, ete An ki do, "Yefun Allah ete ben sukndo su nan sor."

17Yefun Yesus do mu o kadit nat ne sa, yetu ge dik yo kas ma. An tu an umsu mo Yefun Yesus gwem, ete an ndo mo Yefun Yesus do, "Yeguru, Nan sa, Nan ben Nan bi suk-i ndo. Ji ben suk sato suma subere ji kem ndo to kapyo mato kapyo ne?"

18Yefun Yesus ki nai ye ne do, "Suma ben to nan ki do, Ji ben Ji bi suk-i ndo ne? Yetu gato ben bi suk-i ndo yo mo nde, wo Yefun Allah ka dik sor anato ben bi suk-i ndo.

19Nan jam Yefun Allah bi sukduno sato: Nin gu ye yi kwop daret nde, nin ben siri daret nde, nin syimsi suk nde, nin ndak ye yi gum su sukkidar nde, nin kidar suk wa ku sugum nde, nin jammo nin bi ai si nin bi im."

20Ye ne ki do, "Yeguru, sukduno bok ne sino ji benbot kadit ji ka yemsok ne it."

21Yefun Yesus sokme ye ne, An jimnotku ye ne ndo nde. Orete Yefun Yesus ki do, "Suk dik yo anato nan yo benbot nde tó, sare do, nan mu nan so nan bi suk mwa gato nan ku ne, orete suk mwa ne bi sugum nan syo nai ye gato yo ku suk yo mo nde. Sane bere nan ku suk mwa mo gu. Nan syo sugum ne nai ye gato yewa suk, orete nan ma simo Ji et."

22Ye ne jam sukdu gato Yefun Yesus ki ne sa, ye ne jimnutbot ndo nde. Ye ne mu kadit re, we an bi sukjimnut sye mo an bi suk mwa ne.

23Orge Yefun Yesus sokbot An bi pakon, ete An ki nai An bi pakon do, "Ye gato bi suk mwa iwa an gum sok mo Yefun Allah bi rus-i ne yo, bergan os ne yé teker wa an re."

24Yefun Yesus bi pakon jam sukdu gato Yefun Yesus ki ne sa, án yeket. Sarewo Yefun Yesus ki o do, "Ji bi pa, ye gato kwabom kam mo suk mwa gato an ku ne, bere os ne yé teker wa an gum sok mo Yefun Allah bi rus-i re.

25Te suge sye gato gum do unta sok ket sum parke wak mó bado, nde e? Yo sok mo nde, sukye teker ware. Sane dom yé gato bi suk mwa iwa án gum sok mo Yefun Allah bi rus-i yo, suk ne tepsu sukye teker wa án re."

26Yefun Yesus bi pakon jam Yefun Yesus bi sukdu ne, án yeket wai o re, ete pakon ne ndo mo Yefun Yesus do, "Sane bere je u anato ku os wa sok mo Yefun Allah bi rus-i ne?"

27Yefun Yesus sokbot pakon ne, ete An ki do, "Yetu yo bi os mo nde, wo Yefun Allah sa, bi os mó; mo suk mwa ne sino gato Yefun Allah iwa ben ne yo, Yefun nggiwa wai mó re."

28Orge Petrus ki nai Yefun Yesus do, "Men gare, men misyar men bi suk mwa gato men ku ne sino kem ete men simo Nan."

29Yefun Yesus ki nai án do, "Suk gato Ji ki ré suksangge anare, ye to misyar an bi nu e, bi nji e, bi nyanggon e, bi yenggras e, bi pa e, bi nggwe e, suk mwa e ne kem subere an mu ben Ji bi suk-i, an mu ki sukdu subot os ndo gato Yefun Allah fro ne yo,

30bere Yefun Allah win suk mwa gato an misyar ne mu kom mo wam wotin dik yo. Suk mwa gato an misyar sato: an bi nu e, an bi nji e, an bi nyanggon e, an bi im e, an bi pa e, an bi nggwe e ne, sugato an kem mo bur ré tó yo, ben sato Yefun Allah syo suk gado ne satu nai an mwa wai o re. Sarewo an ben Ji bi suk-i yo, bere an ku sukye mone dom. Or o su kam sari ne ma bere an kem ndo to kapyo mato kapyo.

31Wo yé mwa gato ben Ji bi suk-i nam, bere an ku suk wari, ete yé mwa gato ben Ji bi suk-i ne yo nam nde, bere an ku suk nyim."

32Yefun Yesus si An bi pakon mu mo kota Yerusalem sa, Yefun Yesus mu nyim mo yé mwa gwem. Yefun Yesus mu nyim mo án gwem saresa, Yefun Yesus bi pakon sino bi sukjimnut waiyu subot An. Yé gato simo Yefun Yesus mu boribot Yefun Yesus si bi pakon, we yé ne nyuwa ye Yahudi. Orge Yefun Yesus kendo An bi pakon ge musyu dik sop we ne mu dor kadit yé ne, ete Yefun Yesus ki subot suk mwa gato bere yé ben nai An mo Yerusalem.

33Yefun Yesus ki do, "Men mu mo Yerusalem it anare. Mone yé meret os wa gwat yeko ma wa but Yetu bi Pa to Ji ré, ete yé syo Ji mo yekwesú mo Yefun Allah bi nu si yeguru agama syim. Bere án syokom yé gu ji kwop, án syo Ji mo yewis yi syim-i.

34Yewis yi ne, bere yé ne ki Ji ket kwayo-kwayo, yé ne sukut tom Ji, yé ne kwam Ji su bus, orete yé ne gu Ji kwop. Sarewo kom mo kam we rek, bere Ji sun kadit sukkwop o re."

35Orge Yakobus si Yohanes, gato Zebedeus bi gan we ne, an we ma ku Yefun Yesus, ete an we ki do, "Yeguru, men ka we ndek mo Nan do, suk to men ka we ndek mo Nan, Nan ben wa men et."

36Yefun Yesus ndo mo an we do, "Suma anato nin ka we iwa Ji ben wa nin ka we ne?"

37An we ki do, "Kam sari ne ma, Nan jowa nje mo pe gato ndo wai, Nan gum kok wai mone yo, Nan bes men ka we gum pasye si Nan sino, men ka we ge dik yo kem tak Nan de syim ge, men ka we ge dik yo o kem tak Nan de syim jam."

38Sarewo Yefun Yesus ki nai an we do, "Nin ka we jam nde suk gato nin ka we ndekwa ne. Nin ka we fro nggwa wa nin ka we ku sukye tepsu sukye gato bere Ji ku ne, bado? Ji ré, Ji ben Yefun Allah bi suk-i anato bere yé gu Ji kwop mone. Te nin ka we iwa ben Yefun Allah bi suk-i kapre yé gu nin kwop mó dom bado?"

39An we ki do, "Men fro men nggwa wa re." Sane Yefun Yesus ki nai an we o do, "Sangge, bere nin ka we ku sukye tepsu Ji, bere yé gu nin ka we kwop dom mo Yefun Allah bi suk-i gato nin ka we ben ne, tepsu bere yé gu Ji kwop re.

40Sarewo Ji dakai yo bi os wa Ji syo nat yo wa nin ka we kem mone nde, wo Yefun Allah sor ete fro ye gato bere kem tak Ji de syim ge si ye gato kem tak Ji de syim jam ne."

41Pakon ge musyu dik doyi neya jam sukdu gato Yakobus si Yohanes ki ne sa, án maskwa ket pa we ne.

42Sane Yefun Yesus kendo pakon ge musyu dik sop we sum sino, ete An ki nai An bi pakon do, "Nin jam do, yé gato gum yekwesu mo bur ré gato jam nde Yefun, bere yekwesu bok ne ben bi suk-i su án bi rus-i krat wai o re. Yekwesu gato gum yepasye ne bere syaugat án bi rus-i ben suk tepsu yepasye ne bi sukdu-i ne sor. Án bi rus-i tepsu án bi pakwerut-i gato benbot suk gato án imo sor.

43Sarewo nin jom nin bi rus-i sane nde, wo sare, ye gato iwa yé bes an nggwa tepsu yepasye it yo, an ben nggwa tepsu pa wokgan gato iwa ós yé mwa neya et.

44Ye gato iwa an gum yekwesu it yo, an ben nggwa tepsu yé mwa neya bi pakwerut et,

45we Yetu bi Pa to Ji ré ma mo bur ré wa yé ben suk wa Ji nde, wo Ji ma wa ós nje, ete Ji bi nggwa tepsu suktot mo sukibit gato yé mwa ben ne."

46Yefun Yesus si An bi pakon mu sa, án ma kom mo kota Yerikho. Or o Yefun Yesus si An bi pakon mu kadit Yerikho, yé mwa si án mu sino. Yefun Yesus si yé mwa ne mu sino saresa, yetu ge dik yo gato gro ndu kem mo os de, an ndek suk mo ye gato mu wai ket os ne. Ye gato gro ndu ne gum do, Bartimeus, gato bi ai mo Timeus.

47Bartimeus ré jam sukdu kadit nje do, Yefun Yesus ye Nazaret mu wai ket os gato an kem mone. Sane Bartimeus jam do Yefun Yesus wai mone sa, Bartimeus saiye do, "Yesus o, yeraja Daud bi Dat o, Nan jimnotku ji et!"

48Yé mwa ne maskwa Bartimeus, ete yé ndantom an do, "Nan not tom!" Yé da ndantom an, sarewo an saiye gat nggi wai o re do, "Yeraja Daud bi Dat o, Nan jimnotku ji et!"

49Sane Yefun Yesus ti not, An syogat yé gwat ye gato gro ndu ne ma mo An. Yé mu ki nai ye gato gro ndu ne do, "Nan ti tom! Yefun Yesus kendo nan ma it anare. Nan mit at wa et!"

50Bartimeus jam sukdu ne sa, an am an bi san syu gato an it ne kem, ete an ti an mu ku Yefun Yesus.

51Yefun Yesus ki nai an do, "Nan iwa Ji ós nan su suma ne?" Bartimeus gato gro ndu ne ki do, "Yeguru, Nan ós ben ji gro ndo satu et."

52Yefun Yesus ki nai an do, "Nan gro ndo satu it anare, nan mu sor. Nan onyar kem mo Ji anato nan ge re." Yefun Yesus do ki An bi sukdu-i or sa, Bartimeus gro ndo satu it anane, orge an si Yefun Yesus mubot os sino.


  Share Facebook  |  Share Twitter

 <<  Markus 10 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran