Alkitab Mobile SABDA
[VER] : [ABUN]     [PL]  [PB] 
 <<  Markus 13 >> 

1Yefun Yesus duno nje mone, or Yefun Yesus mu kadit Yefun Allah bi nu ne. Yefun Yesus mu kadit Yefun Allah bi nu saresa, Yefun Yesus bi pakon dik yo ki nai Yefun Yesus do, "Yeguru, Nan me Yefun Allah bi nu ré et! Yefun Allah bi nu ré ndo wai o re, jok gato yé nggo nu su ne sye wai o re."

2Yefun Yesus ki nai an do, "Nan dom sokbot nu gato sye wai ne et. Yefun Allah bi nu ne ndo wai, sarewo kapyo tak nu ne ibit or re. Ri ma jok mwa gato yé nggo nu su ne, bere yé ma krut jok mwa ne or re, dik yo ut mo dik yo o nde."

3Orge Yefun Yesus mu mo bobuk Zaitun, An kem mo bobuk de gato tak Yefun Allah bi nu ne. Yefun Yesus kem mone sa, An bi pakon ge at gato gum do Petrus, Yakobus, Yohanes, si Andreas, án ge at wadigan ma mo Yefun Yesus, án ki sukdu dor mone.

4Yefun Yesus bi pakon ge at ne ndo mo Yefun Yesus do, "Yenggras, Nan ki sukdu rer nai men et. Sukdu gato Nan ki subot Yefun Allah bi nu ne te, kam ot ete bere suk mwa gare bor ne? Suk sato suma anato bere bor nyim wa ós men jam do, bergan it, kam gato Nan ki ne ma it ne?"

5Yefun Yesus ki nai án ka at ne do, "Nin mewa nin nggwa sawe ye yo ma kidar nin.

6Bere yé mwa ma ki do, 'Ji anato Kristus gato Yefun Allah syogat ma mo bur ré,' ete kidar yé bok ne sino jammo án re.

7Bere nin jam sukdu subot yé ben sukndi karowa nin, bere nin jam sukdu subot yé gu yu mo peyo-peyo, sarewo nin nyu nde. Bur ré yo kru nde tó, bere yé ben sukndi ete gu yu nyim wé et.

8Bere negara deyo futma gu negara deyo o, bere yewis deyo futma gu yewis deyo o mone tó. Bere sui sye juwai bur ré ram mo peyo-peyo. Bere sukonde sye bor mo peyo-peyo dom. Nin me suk bok gane bor it yo, karowa bur ré kru it anane, tepsu nggon gato nukwe i su pa, bere nggon ne kem su bi pa.

9Su kam gane ma, nin mewa nin nggwa, we bere yé but nin, ete yé gwat nin mu mo ye Yahudi bi yepasye. Yé gwat nin deyo mu mo ye Yahudi bi nu ari dom, ete ye Yahudi kwam nin su bus mone. Bere yé but nin, we nin onyar kem mo Ji, ete nin ben Ji bi suk-i. Bere yé gwat nin mu mo yepasye gato jowa bur ré yo, bere nin ti mo yeraja si gubernur gwem, ete nin ki sukdu subot Ji nai yepasye ne jam.

10Sukdu subot os ndo gato Yefun Allah fro wa nin ne yo, bere yé ki frekbot yewis mwa mo bur ré iwedewe orete yo, bere bur ré kru it anane.

11Yé gwat nin mu mo yepasye subere yepasye ne ndobot nin yo, nin jimnot teker subot suk gato nin ki ne nde. Nin nokwa teker nde, we su kam gane it yo, Yefun Allah Gen ós nin ki suk mone. Sukdu gato nin jam mo nin mit ne yo, nin ki nai nje sor, we sukdu gato nin ki ne ma kadit nin dakai nde, wo sukdu ne ma kadit Yefun Allah Gen.

12Nin gato onyar kem mo Ji, nin bi nji deyo bere meret os wa nin ete syo nin mo yepasye syim, ete yepasye syokom yé gu nin kwop. Nin bi ai deyo syo nin mo yepasye syim, ete yé gu nin kwop dom. Nin deyo bi pa, bere bariwa jammo nin, ete syo nin mo yepasye syim, ete yé gu nin kwop.

13Nin ben Ji bi suk-i, sane bere yé mwa ne sino bariket nin, wo ye gato onyar kem pe mo Ji sor kom mo pe gato or mó yo, bere ye ne kem ndo to kapyo mato kapyo."

14Yefun Yesus ki o do, "Bere kam sari ne ma nin me yetu ge dik yo ma mo Yefun Allah bi nu, ete an sok mo Yefun Allah bi gumwak fo mo Yefun bi nu mit. Ye ne, an mise teker, ete an gwat suk yo ma mone gato ben gumwak fo ne ibit, subere Yefun Allah bariwa gumwak ne or re. (Nin yé mwa ne sino gato baca sukdu gare, nin nutbot bi sukjimnut sisu ndo et.) Sane nin do me ye ne ben Yefun Allah bi nu mit ibit it yo, nin yé gato kem mo bur Yudea titi mu mo banbo et.

15Nin dogato ti mo bi nu yu is ete sok mo nu mit wa nai suk yo mone nde, wo nin titi sor.

16Nin dogato ben suk mo nggwe satu mu mo an bi nu wa nai an bi san syu nde. Nin titi sor!

17Su kam ne nggon gato syimfar si nggon gato pe bi pabom er tó ne, bere ku sukye ndo nde.

18Nin ki suk su Yefun subere sukye gato ben nin ye Yudea ne yo bor su aina gato nyot dek nde,

19we su kam gane yé ku sukye ndo nde. Kadit ketke, kadit kam gato Yefun Allah ut bur ré sor kom mo kam gato bur ré kru, yé yo ku sukye gato yé teker sato sukye ré yo mo nde, sukye gato yé ku su kam ne bere yé wai o re.

20Wo bere kam gato yé ku sukye ré su ne Yefun Allah tot napyo wé, ondeyo yé mwa ne kwop or. Yefun Allah jimnotbot yé gato An fro suga nyim wa An nai sok mo An bi rus-i, sane bere An tot kam gato yé ku sukye su ne napyo wé.

21Su kam gane ete ye yo do ma ki do, 'Nin me ye ré et! Kristus gato Yefun Allah syogat ma wa jowa men anato ma it!' 'Nin me ye motu et! Kristus anatu it!' yo, nin jambot nde.

22Ye gato ben kidar do, an dakai anato Kristus gato Yefun Allah syogat ma mo bur ré wa nai men yetu kadit sukye ete jowa men ne bere mó. Sane dom yenabi gato ma wa kidar nin bere mó. Yé bok ne bere kadum bi suktinggi gato ben yé yeket ndo nde. Yé bok ne ben bi suk-i, bergan án ben kidar nje gato Yefun Allah fro suga nyim wa Yefun nai sok mo Yefun bi rus-i, sarewo bere yé bok ne yo ku os mone nde.

23Sane nin mewa nin nggwa kadit ye gato kidar nin, we sukdu bok ne, yo bor nde tó, Ji ki napyo nai nin jam nyim wé re."

24"Sukye gato yé mwa ne ku su kam bok neya orete yo, kam su mo gu, bere Yefun Allah te re. Aina bere ru rer o nde.

25Bi mwa ne ges kadit gu or. Suk mwa mo gu nim ne yo kas ri o nde.

26Su kam gane yé mwa ne sino mo bur ré me Yetu bi Pa to Ji ré bor mo gu. Bere Ji is ma sisu nyotem. Ji kaim rer-rik su Ji bi suktinggi gato bor mone.

27Bere Ji syogat Ji bi malaikat mubot bur ré iwedewe nai yé gato Yefun Allah fro suga nyim wa An nai sok mo An bi rus-i ne. Malaikat ne bere nai yé ne kadit nobu nim, kadit nobu ket, kadit nobu sem, kadit nobu nden. Malaikat nai yé mwa ne sor kadit bur ke kom mo bur naprut ne."

28"Men nutbot kwe ara, subere men jam sukduno kwa yo o et. Kwekwa ne kur ete i-nat kup be bor sim yo, men jam do, bergan no kro it anane.

29Sane dom, nin me suk mwa gato Ji kibot gare bor it yo, bere nin jam do, yo nam nde ge, Ji ma tepsu yetu bi Yekwesu it anane.

30Suk gato Ji ki ré suksangge anare, yé gato kem mo bur su ré, án sino yo kwop nde tó, suk gato Ji ki ne bor sino re.

31Gu nim ne si bur ré bere kru re, wo Ji bi sukdu ne kem sor to kapyo mato kapyo."

32"Kam gato Yetu bi Pa to Ji ré satu ma su ne, yetu ge dik yo jam kam ne nde. Malaikat mo gu dom jam nde re. Ye yo jam bi kam-i nde, ye yo jam bi jam-i dom nde. Ji dakai, gato Yefun Allah bi Gan jam nde dom re, wo Yefun Allah wadigan sor ete jam.

33Sane nin frawa nin nggwa et! Nin jam nde kam gato Ji ma su ne re. Nin mewa sor!

34Kam gato Ji ma su ne tepsu sukdu subot yenggras dik yo gato mu mo os syu mo bur yi. Yenggras ne syogat an bi pakwerut mewa an bi nu ne. An fro suk wa pa gedik-gedik ben mo an bi nu ne, ete an ki nai pakwerut gato mewa nusyo ne do, 'Nin kem su nin fra sor ji satu ma et.'

35Sane dom nin kem su nin fra, bere Ji satu ma re. Ji anato tepsu yenggras gato mu kadit an bi nu ne. Sane nin jam nde kam gato bere Ji satu ma mo Ji bi nu ne. Ji satu ma su kre bado, su noru mit bado, ndam kokor ke ete Ji ma bado, kam it ete Ji ma bado, nin jam nde re.

36Sane nin kem su nin fra nin nggwa wa kam gato Ji ma su ne et, sawe kam gato Ji satu ma ne, nin gensu, ete Ji ku nin sem mit.

37Suk gato Ji ki nai nin ré, Ji ki nai yé mwa ré sino jam dom, 'Nin kem su nin fra et!' "


  Share Facebook  |  Share Twitter

 <<  Markus 13 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel