Alkitab Mobile SABDA
[VER] : [ABUN]     [PL]  [PB] 
 <<  Markus 5 >> 

1Yefun Yesus si bi pakon mbros bi kwem mu mo bur Gerasa mo Em Galilea deta.

2Yefun Yesus do is kadit kwem mu nden saresa, yebris ge dik yo gato semda ben ne ma ku Yefun Yesus. Ye gato semda ben ne, an ma kadit jokwak mo makwe ne ma ku Yefun Yesus mone.

3Ye gato semda ben ne kem mo makwe, an kem mo jokwak gato yé grem yekri mone sor. Ye yo nggiwa rai an o nde. Kapre yé rai an su suk gato krat sato rantai ne o, bergan an sombok rantai ne wé o re.

4Yé rai yesemda ne gwes si syim wam bok yo mó re, sarewo rantai bok ne an ben toko wé. Besi gato yé rai an gwes su ne, an syat wé re. Yesemda ne nggi teker ware, sane ye yo nggiwa but an nde.

5Noru nombrak an muya-muma daret bot makwe si bobuk mone. An muya-muma sa, an saiye daret, an nai jok, an sap an kaim wip su.

6Yesemda ne me Yefun Yesus ma kadit os syu sa, an kas mu bare nggwa mo Yefun Yesus gwem,

7ete an saiye nggi do, "Yesus, Yefun Allah gato gum kok sye wai ne bi Gan, Nan ma ku ji wa suma ne? Nan tom su ji, Nan syo syim ete Nan ki Yefun Allah gum su do, Nan yo ben sukye nai ji nde."

8(Yesemda ne yo ki sukdu ne nde tó, Yefun Yesus ki nai ye ne do, "Semda, nan sombok kadit ye ré se!" anato yesemda ne ki bi sukdu-i sane.)

9Orete Yefun Yesus ndo mo semda ne do, "Nan gum sa u ne?" Semda ne ki do, "Ji gum do Legiun, we men ré ge mwa ndo nde."

10Semda mwa ne ndek gat Yefun Yesus subere Yefun Yesus syun án mu wé kadit nat ne nde.

11Karowa pe ne jot yaino, jot mwa yé re, git sugit mo bobuk de.

12Sane semda mwa ne ndek gat Yefun Yesus do, "Nan imo yo, Nan syogat men mu bok nggwa mo jot mwa ne et."

13Yefun Yesus imo sukdu gato án ki ne, sane semda mwa ne sombok wé kadit yebris ne, orete semda mu bok nggwa mo jot mwa ne. Jot yaino mone, jot mwa yé re, ge ribu we. Sane semda ben jot mwa ne kas ket kwoye mu ges ngga mo em mit, ete jot mwa ne mbon or sino.

14Yetu ge bok yo gato mewa jot ne, án me jot mwa ne mbon, orete án titi mu ki sukdu ne frekbot nje mo kota si nat bok yo gato karowa mone. Sane yé mwa ma wa me suk gato bor mone.

15Yé mwa ne ma ku Yefun Yesus sa, yé me yebris gato semda mwa ben ne, an kem not mone. An it san, an yo kawarun o nde, an bi sukjimnut ndo satu re. Sane yé mwa ne nyu ndo nde.

16Yé mwa gato me suk gato Yefun Yesus ben su ye gato semda ben ne, án nuk subot sukdu gato án me bor mone nai yé mwa gato ma ne. Án nukbot yesemda ne si jot mwa ne dom.

17Orge yé mwa gato kem mo bur ne ndek gat Yefun Yesus subere Yefun Yesus mu kadit án bi bur-i.

18Sane Yefun Yesus it mo kwem sa, yebris gato semda sombok kadit ne an ndek gat Yefun Yesus do, "Ji si dom."

19Sarewo Yefun Yesus yo imo sukdu gato an ki ne nde. Yefun Yesus ki nai yebris ne do, "Nan satu mu mo nan bi rus, ete nan kibot suk mwa gato Yefun Allah ben wa nan et. Nan satu mu mo nan bi nje, ete nan nukbot sukndo gato Yefun Allah dakai ben su nan anato nan ge ne."

20Sane yebris gato semda ben ne, an mu kadit pe ne. An mu, an nuk subot suk gato Yefun Yesus ben wa an ne. An mu ki sukdu ne frekbot nje gato kem mo kota musyu dik mone. Yé mwa gato syaretwa an bi sukdu ne, án yeket ndo nde.

21Orge Yefun Yesus mu mo em deta ne o sa, yé mwa ma sum wairi wa Yefun Yesus mo em de ne.

22Sugane yetu ge dik yo gato gum do Yairus ma ku Yefun Yesus. Yairus ré, an yesu mo ye Yahudi bi nu ari. Yairus me Yefun Yesus sa, an bare nggwa mo Yefun Yesus gwem,

23ete an ndek gat Yefun Yesus do, "Yenggras, ji bi pa donggon i ndo nde, bergan mom kwop rok it. Sane Nan si ji mu mo ji bi nu wa Nan ak Nan syim mo ji bi mam et, subere mom ge kadit suki ne, subere mom yo kwop nde."

24Sane Yefun Yesus si bi pakon si Yairus mu sino. Yé mwa simo Yefun Yesus mu sino mone dom. Yé mwa ne kamas buk mo yu kadit os deyo-deyo.

25Nggon ge dik yo gato fo sor kom mo tahun musyu dik sop we ma si yé mwa mone dom.

26Nggon ne mu mo dokter ge bok yo ware, mom yo ge nde. Mom ku sukye ndo nde. Mom syo mom bi suk mwa ne or nai dokter bok ne ware, mom yo ge nde. Wo mom bi suki ne de wai o re.

27Nggon ne jam sukdu mwa subot suk gato Yefun Yesus ben ne, ete nggon ne ma ku Yefun Yesus mone. Sane kapre yé mwa buk mo yu, nggon ne mu karowa Yefun Yesus kadit Yefun Yesus de dari, ete mom rot Yefun Yesus bi san nap,

28we mom nut mo mom syidem do, "Ji rot Yefun Yesus bi san nap sor re, bere ji ge re."

29Sane nggon ne do rot Yefun Yesus bi san nap ne sa, nggon ne fo or it anane. Nggon ne jam mo mom kaim do, suki gato ben mom ne, or kadit mom, mom jam nde re.

30Nggon ne rot Yefun Yesus bi san nap sa, sugane Yefun Yesus jam do, An bi suktinggi syesyar kadit An kaim it anane. Sane Yefun Yesus brek sokme yé mwa ne, ete An ndo mo nje mone do, "Je u anato rot Ji bi san ne?"

31Yefun Yesus bi pakon ki nai Yefun Yesus do, "Yenggras, Nan dakai me su Nan gro, yé mwa ré buk mo yu gat Nan, sane Nan ndo mo yé mwa more do, 'Je u anato rot Ji ne?' wa suma ne?"

32Sarewo Yefun Yesus sokbot yé mwa ne, An meret ye gato rot An bi san ne.

33Nggon ne jam suk gato bor mo mom re, sane mom ma bare nggwa mo Yefun Yesus gwem. Mom kwabom kro ndo nde, mom tetet, ete mom nukbot suk mwa gato bor mo mom ne.

34Sane Yefun Yesus ki nai nggon ne do, "Pa donggon, nan onyar kem mo Ji, anato nan ge re. Nan mu, nan kem not sor. Nan bi suki ne or kadit nan it anare!"

35Yefun Yesus ki suk su nggon ne saresa, yebris ge bok yo ma kadit Yairus bi nu, Yairus gato yesu mo ye Yahudi bi nu ari ne. Yebris bok ne ki nai Yairus do, "Nan bi mam kwop re. Nan syimfar yenggras mu mo nan bi nu o nde."

36Yefun Yesus misyar yé ne bi sukdu-i, ete An ki nai Yairus, gato yesu mo nu ari ne do, "Nan nyu nde, nan onyar kem pe mo Ji sor."

37Orge Yefun Yesus mu sor, An duyawa yé mwa mone, subere ye yo si An mu nde, wo pakon ge bok yo to Petrus, Yakobus si Yakobus bi nji Yohanes sor re ete sisu An mu mo nu ne.

38An ka at mu kom mo yesu ne bi nu sa, Yefun Yesus me yé mwa sum mone. Yé mwa ne wo, ba ret nderbot pa ne ndo nde.

39Yefun Yesus sok mo nu mit, ete An ki nai yé ne do, "Nin wo, nin ba ret wa suma ne? Pa yo kwop nde, wo pa sem sor re."

40Sarewo yé mwa mone sa An. Sane Yefun Yesus syogat yé mwa ne mu mo nden, orete Yefun Yesus si An bi pakon ka gri ne si pa ne bi ai si bi im sor re ete sok mo gumwak mit gato yé grem pa mukri kwop mone.

41Ete Yefun Yesus jom pa ne syim. An ki nai pa su a Ibrani do, "Talita kum," gato bi sukjimnut do, "Pa donggon Ji ki sare do, Nan sun tom!"

42Yefun Yesus ki nai pa donggon ne sa, pa donggon ne sun it anane. Pa sun ma ete mubot gumwak mit. (Pa kaim sye tepsu kom mo tahun musyu dik sop we.) Pa bi im si pa bi ai ne, án we yeket ndo nde.

43Sarewo Yefun Yesus duyawa pa bi im si pa bi ai do, an we kibot suk gato bor ne nai ye yi jam nde. Orete Yefun Yesus ki nai an we do, "Nin ka we syo sugit nai pa ré git et."


  Share Facebook  |  Share Twitter

 <<  Markus 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran