Dual Panel1Ye Farisi ge bok yo gato duno nje su Musa bi sukduno-i si yeguru agama ge bok yo gato ma kadit Yerusalem, án ma, án sum wairi wa Yefun Yesus.
2Ye Farisi si yeguru ne me Yefun Yesus bi pakon ge bok yo git sugit mone. Pakon ne git sugit ne sa, pakon ne yo mus án syim tepsu ye Yahudi bi sukduno-i nde. Sane ye Farisi si yeguru nut do, Yefun Allah bariket Yefun Yesus bi pakon mo gato pakon ne yo mus án syim tepsu ye Yahudi bi sukduno-i nde.
3Ye Farisi si ye Yahudi mwa ne sino jom án bi amui bi sukduno-i ne krat tó. Sagana án yo git sugit nde tó, án mus án syim nyim wé tepsu án bi amui bi sukduno-i ne.
4Sane dom, ye Yahudi satu ma mo án bi nu kadit pasar ne yo, án yo git nde tó, án mus án syim, án de syur, án mus pe mwa ne or. Sane dom, án mus mok e, án mus súk gato yé kon sugit su ne, án mus pe gato yé kem mó dom, we sukduno mwa gato án bi yenggras duno án su ne án jom krat.
5Ye Farisi si yeguru agama jom sukdu ne krat anato án ndo mo Yefun Yesus do, "Nan bi pakon yo benbot men bi amui bi sukduno-i nde wa suma ne? Nan bi pakon git sugit, sarewo án yo mus án syim tepsu men bi sukduno-i nde wa suma ne?"
6Yefun Yesus ki do, "Nin gare, nin ki suk su nin syokwet sor re, wo nin mit tara re. Sukdu gato Yefun Allah tarubot Yesaya wa nin ne sangge, sare do, 'Yefun Allah ki do, Yé ré un Ji su án syokwet sor re, wo án mit si án onyar tara kadit Ji re.
7Án un Ji ware, án yo un Ji su án mit dik nde, we án duno nje su yetu bi sukduno-i, kadit Ji bi sukduno-i re.'
8Yefun Allah bi sukduno-i ne, nin misyar re, wo nin bi amui bi sukduno-i ne anato nin jom krat."
9Orete Yefun Yesus ki nai ye Farisi si yeguru ne o do, "Nin sa, nin bi os mwa wa nin misyar Yefun Allah bi sukduno-i ne, subere nin jom nin dakai bi sukduno-i ne kadit.
10Sato Yefun Allah bi sukduno-i gato Musa krom ne, nin jam sare do, 'Men jammo men bi ai si men bi im.' Musa ki o do, 'Ye to dufo mo bi ai yo, bi im yo, bere men gu ye ne kwop wé sor.'
11Sarewo nin duno nje sare do, 'Ye to ki nai an bi ai si an bi im do, "Bere ji gwat ji bi suk mu, ji syo nai Yefun Allah tepsu suksom, sane ji yo ós nin ka we su suk ne nde." Nin yeguru agama duno nje do, ye ne gwat suk mwa ne tepsu suksom wa Yefun ete misyar an bi yenggras anato ndo.'
12Sane nin duno nje su nin bi sukduno-i anato yé ne misyar án bi yenggras ne re. Yé ne yo ben suk yo wa an bi im si bi ai o nde.
13Sane nin duno nje su nin bi sukduno-i ne subere án jom nin bi amui bi sukduno-i ne krat re anato án misyar Yefun Allah bi sukduno-i. Nin duno nje su nin bi sukduno-i mwa yo o subere yé misyar Yefun Allah bi sukduno-i, ete yé win su nin bi yenggras bi sukduno-i ne o re."
14Orete Yefun Yesus kendo ye Farisi si yeguru mwa ne ma o, ete An ki nai yé mwa ne do, "Nin syaretwa suk gato Ji ki ré sisu ndo subere nin jam et!
15Yefun Allah yo bariket men mo suk gato men nai kadit nden ma, ete ges ngga mo men mit nde, wo Yefun Allah bariket men mo suk gato syesyar kadit men mit ne.
16[Sane nin brek nin dabe muya-muma kadit nde, wo nin jammo Ji bi sukdu ré sor!]"
17Yefun Yesus mu kadit yé mwa ne, ete An satu mu mo nu mit sa, Yefun bi pakon ndek mo Yefun Yesus subere Yefun ki rer subot sukamno ne bi sukjimnut nai án jam et.
18Yefun Yesus ki nai An bi pakon do, "Te, nin yo jam sukamno ne bi sukjimnut ri nde tó bado? Yefun Allah yo bariket men mo gato men nai suk kadit nden ete suk ne ges mo men mit nde re, nin jam nde bado?
19We suk gato men nai kadit men kaim de nden, gato ges mo men mit anato sugit gato men git ne. Yefun Allah yo bariket men mo sugit gato men git ne nde. Sugit gane yo sok mo men bi sukjimnut nde, sarewo sugit gato men git ne ges ete sok mo men mit si men ondim, orge syesyar mu nden re." Sane Yefun Yesus ki bi sukdu-i mone anato men jam do, sugit mwa ne sino ndo wa men git.
20Orete Yefun Yesus ki o do, "Yefun Allah bariket men yetu mo suk gato ma kadit men mit si men onyar,
21we suk mwa gato ma kadit men mit ne, ma kadit men yetu bi sukjimnut ibit ne. Sukjimnut ibit anato ben men ben sukibit sato ré: men iwa men ben siri su nggon daret e, men syimsi suk e, men gu ye yi kwop e,
22men gro sye wa men ku suk mwa e, men iwa ben sukibit nai ye yi e, men iwa kidar suk e, men gro sye wa ku ye yi bi suk e, men iwa men kiket ye yi, men iwa bes men nggwa kok e, men iwa ben sukdaret mwa.
23Sukibit mwa gare syesyar kadit men mit, ete suk bok gare anato ben Yefun Allah bariket men. "
24Orge Yefun Yesus mu kadit pe ne mu mo pe dik yo karowa kota Tirus. An sok mo nu dik yo, we Yefun Yesus bariwa yé mwa jam An ma mone. Sarewo Yefun Yesus yo ku os wa gurik An nggwa mone nde.
25Nggon ge dik yo jam Yefun Yesus ma mone sa, nggon ne ma kekro, mom bare nggwa mo Yefun Yesus gwem. Semda ben nggon ne bi mam.
26Sane nggon ne ndek mo Yefun Yesus subere An syun semda ne wé kadit mom bi mam. Nggon ne, yewis ye Yahudi nde. Nggon ne yewis ye Yunani, mom ontu mo bur Siria mo kota Fenisia.
27Yefun Yesus ma wa ós yewis ye Israel, sane An duyawa nggon ne, we nggon ne yewis yi, sane An ki nai nggon ne do, "Ketke men syo sugit nai men bi pa wokgan git sane sor pa on don or et. Wo men nai pa wokgan bi sugit ete men am nai ndar git, bere siri re."
28Nggon ne werwa Yefun Yesus ós mom, sane mom ki do, "Sangge, Yenggras, men syo pa wokgan bi sugit nai ndar nde, wo ndar gato mo meja desnak bere git sugit mwir gato pa ben ges mo bur ne fe!"
29Sane Yefun Yesus ki nai nggon ne do, "Nan bi sukdu-i ne ndo wai o re, sane anato Ji ós nan it anare. Nan satu mu mo nu, bere nan me do, semda yo ben nan bi mam o nde, semda ne titi kadit re."
30Nggon ne satu mo nu sa, nggon ne me bi mam sem mo kwatka mo nu mit, semda gato ben pa ne titi wé kadit pa ne re.
31Orge Yefun Yesus mu kadit kota Tirus. An mubot os gato mu mo Em Galilea. Sane An muket os gato mu mo kota Sidon, orete An mu kom mo nat gato gum do Kota Musyu Dik.
32Mone yé deyo gwat yetu ge dik yo gato dabe mbut ma. Ye ne yo ki suk sisu ndo nde. Yé gwat yebris ne ma mo Yefun Yesus, ete yé ndekwa Yefun Yesus ak syim mo yebris ne.
33Yefun Yesus si yebris ne mu ko gan kadit yé mwa, ete Yefun Yesus bok An sopkwa mo ye ne dabe wak we. Or o Yefun Yesus sukut mo An sopkwa, ete Yefun Yesus syimbot ye ne brip.
34Orge Yefun Yesus sok mu nim mo gu, An jimnotbot yebris ne teker, sane Yefun Yesus syesyar An mas nggi syu mu nden, ete An ki nai yebris ne do, "Efata!" Efata bi sukjimnut su Yefun Yesus bi a ne do, "Nan dabe si nan syokwet kak se!"
35Sugane ye ne dabe we ne rer it anane. Ye ne syokwet kak, an brip ram, ete an ki suk sisu ndo it anane.
36Yefun Yesus duyawa nje mone do, "Nin ki subot suk gato nin me ne nai ye yi jam daret nde." Yefun Yesus duyawa ye kibot suk gato bor mone nggi wai o, sarewo yé mu kibot sukdu ne frekbot mu kom mo peyo-peyo mwa wai o re.
37Yé mwa gato jam sukdu ne án yeket ndo nde. Yé ne ki do, "Suk mwa gato An ben ne, An ben sisu ndo sino fe! An ben ye gato dabe mbut, dabe ndo satu. Ye gato syokwet mbut, An ben ye ne wa ki suk sisu ndo. Mban! Ye ré sa, ben bi suk-i ndo wai o re."