Dual Panel1Sane men sok mo yewis ye Yahudi yo, suk sato suma anato men ku wai kadit yewis yi ne? Men simo sunat mo men kaim ne yo, bere ós men sa u ne?
2Men tepsu ye Yahudi gato simo sunat sa, men ku suk mwa o re. Su ketke, Yefun Allah grem An dakai bi sukdu-i ne kem su ye Yahudi re.
3Sarewo ye Yahudi ge bok yo bi sukjimnut kem pe mo Yefun bi sukdu nde yo, bere sa u ne? Sane bere Yefun Allah yo bi sukjimnut kem pe mo men o nde dom bado?
4Sane nde re. Kapre yetu kidar suk, Yefun ben suk tepsu suk gato An ki ne petok sor, tepsu yeraja Daud krom sukdu subot Yefun Allah mo Yefun bi sukdu sare do, "Nan ki Nan bi sukdu-i sangge tepsu suk gato Nan tom ne, yé dakai jam re; Kapre yé ndak Nan mo suk gato Nan tom ne, bere yé yo ku os nde."
5Sarewo men ye Yahudi do ben suk siri kadit Yefun Allah mit anato kak os wa Yefun ben sukndo mwa wai bor wa yé mwa jam it yo, bere men ki subot sukdu ne sa u ne? Yefun Allah syo sukye nai men mo suk gato men ben siri kadit An mit ne anato ibit bado? (Ji ki sukdu gare tepsu yetu ki bi sukdu-i ko ré go!)
6Sane nde. Yefun Allah bere syo sukye nai ye gato ben sukibit sor. Wo Yefun yo syo sukye nai men yetu mo sukibit gato men ben ne nde yo, bere sa u ne? Bere An yo ndobot men yetu mo bur ré mo nde, fe!
7Yetu ge dik yo duwer men su bi sukdu sato ré do, "Sukkidar bok gato ji ben ne kak os wa yé bes Yefun Allah gum kok mo suk gato Yefun Allah ben sisu ri-roi ne yo, bere Yefun Allah syo sukye nai ji tepsu ye gato ben sukibit wa suma ne?"
8Sukdu ne men ki rer o et, sare do, "Men ben sukibit subere sukndo gato Yefun ben ne bor sye o et." Men ki sukdu sane anato ndo bado? Sukdu ne ibit, sarewo yetu ge bok yo da kiket ji gum do, ji ki sukdu sane mó re. Wo yé bok gato kiket ji gum mone, bere Yefun Allah syo sukye nai ye ne tepsu sukdu ibit gato yé bok ne kiket ji su ne.
9Sane bere sa u ne? Yefun Allah nut mo men ye Yahudi do, men ndo wai kadit yewis yi neya bado? Nde re. Ji ki sukdu nai nin suga nyim ne mó re, sare do, sukibit jom men ye Yahudi si yewis yi mwa ne tepsu yu sino re.
10Ye Yahudi si yewis yi mwa ne sino ben sukibit bu, tepsu ye krom mo Yefun Allah bi sukdu do, "Men yetu mo bur ré ge dik yo ben bi suk-i ri-roi yo mo nde.
11Ye gato jam Yefun Allah bi suk-i yo mo nde. Ye gato meret Yefun Allah yo mo nde.
12Yetu mwa ne sino brek dari ket Yefun Allah re. Yetu mwa ne sino muket os siri kadit Yefun it. Ye gato ben bi suk-i ne ri-roi yo mo nde, yetu ge dik yo dom nde.
13Sukdu gato syesyar kadit án syokwet ne ibit, tepsu makwe gato yé kak ne basmi ibit. Sukkidar kas kadit án brip gato ram ne tepsu syur sye mu ti. Án ki bi sukdu-i ibit anato ben nje ibit su, tepsu kwis jau nje su bi ri anato gu nje kwop su.
14Án ki bi sukdu-i, án kabor nje, án syi suk mo nje petok sor.
15Án iwa ben sukndi su nje, án iwa gu nje kwop wé kekro.
16Án ben sukye nai nje, án ben suk bok yo ibit mo pe bok gato án mu mone.
17Án si ye yi kem ndo su yu ne, án jam nde ware, án jam nde án kem not.
18Án yo jammo Yefun Allah mo nde."
19Men jam do, sukduno mwa mo ye Yahudi bi sukduno-i ne, ye krom wa yé gato sukduno ne kem su ne, subere án jam ete benbot sukduno ne. Ye Yahudi mwa ne jam sukduno ne, sane anato án yo ku os wa án ki do, án jam nde re. Bere Yefun Allah ki men yetu mwa ne mo bur ré syen Yefun bi sukduno ne.
20Sane anato kapre men yetu werwa men benbot ye Yahudi bi sukduno-i ne yo, bere men yo ku os ndo mone nde. Yefun Allah ki mo ye gato werwa benbot sukduno ne do, sukduno ne yo kak os wa án sok mo Yefun Allah bi rus-i nde, wo sukduno ne ós wa kadum suk gato Yefun Allah bariwa men yetu sino mo bur ré ben ne sor re.
21Su ré Yefun Allah fro os subere men yetu ku os wa men sok mo An bi rus-i. Ye Yahudi bi sukduno-i ne, yo tep nde, wo Yefun Allah fro os be wa men re. Musa bi sukduno-i si yenabi bi sukdu-i sino kadum do, os ri anato os gato Yefun Allah fro ré,
22sare do, yetu gato onyar kem mo Yesus Kristus sor anato ku os wa Yefun Allah ki mo yé ne do, yé ne sa, tep wa sok mo An bi rus-i. Yefun Allah fro os gare wa yetu mwa ne sino gato onyar kem mo Kristus, ye Yahudi si yewis yi mwa ne, án sino bi os dik ne tepsu yu re.
23Men yetu mo wis mwa ne sino ben sukibit re, men sino yo nggiwa men dakai kom mo pe gato Yefun Allah bi suktinggi bor wa ós men kem ndo ne mo nde.
24Men yetu dakai sor yo nggiwa ben suk tep nde, wo Yefun Allah dakai fro os wa men re. Men yo ben suk yo nyim wa Yefun Allah nde, wo Yefun Allah dakai bi sukjimnut sye kas subot men yi, sane anato An fro os wa men subere An nai men wé kadit sukye gato men ku mo sukibit gato men ben ne. Orete An ki subot men do, men sa, tep wa men gum sok mo An bi rus-i it. Os gato An fro wa men anare: An bi Yesus Kristus ma mo bur ré wa tot suktot mo sukibit gato men ben ne wé.
25Yefun Allah bi Yesus Kristus ma kwop, An dé sye wa men, An dé sye win men mo sukibit gato men ben ne. Sane men yé gato onyar kem mo suk gato Kristus ben ne bere Yefun Allah iwa nai men sok mo An bi rus-i it. Yefun Allah fro os gare wa kadum do, Yefun Allah ben An bi suk-i ne ri-roi su men sor, we sugato nyim tuya Kristus ma nde tó, yetu da ben sukibit mwa, sarewo Yefun Allah yo maskwa án mo nde tó, Yefun misyar yei.
26Sarewo su ré, men jam do, Yefun Allah yo misyar sukibit gato yé ben ne o nde, wo Yefun Allah syo sukye nai nje tepsu sukibit gato yé ben ne sor. Yefun ben sane subere yé jam do, Yefun ben An bi suk-i ne ri-roi tepsu sukdu gato An ki ne. Sane ye gato onyar kem mo Yesus Kristus ne, bere Yefun Allah ki mo ye ne do, ye ne sa, tep wa sok mo An bi rus-i re.
27Sane men ku os wa men bes men nggwa kok o nde. Men yo ku os nde wa suma ne? Men sok mo Yefun bi rus-i mo suk gato men ben tepsu ye Yahudi bi sukduno-i ne bado? Nde re, wo men onyar kem mo Yesus Kristus anato Yefun Allah nai men gum sok mo An bi rus-i mone it.
28Sane, men ki men bi sukdu-i ne pe it sare do, men benbot ye Yahudi bi sukduno-i ne yo, suk ne bere yo ós men nde, wo men onyar kem mo Yesus Kristus sa, bere Yefun Allah nut mo men do, men sa, tep wa sok mo An bi rus-i it.
29Nin nut do, Yefun Allah anato Yefun gato jom ye Yahudi ne sor re bado? Yefun yo jom yewis yi dom nde, bado? Nde re, Yefun Allah jom yewis yi ne dom.
30Yefun Allah, men bi yenggras gato jom men ne, An ka dik sor. Ye Yahudi onyar kem mo Yesus Kristus yo, bere Yefun Allah yo ben sukye nai yé Yahudi ne tepsu sukibit gato yé ne ben ne nde, wo Yefun Allah ki do, yé ne sa, tep wa sok mo An bi rus-i it. Sane yewis yi gato onyar kem mo Yesus Kristus dom, bere Yefun Allah ki do, ye ne dom tep wa sok mo An bi rus-i re.
31Men onyar kem mo Yesus Kristus it, sane men nut do, men bare ye Yahudi bi sukduno-i wé, bado? Sane nde, wo men bi sukjimnut do, sukduno ne da ndo wa men dom, sukduno ne yo ós men sok mo Yefun Allah bi rus-i nde, wo sukduno ne ós men jam suk gato Yefun Allah iwa men ben ne, sane men benbot sor.