Dual Panel1Sane bere men ki sukdu sato suma subot men bi amui, Abraham ne? Yenggras ne nutbot ye Yahudi bi sukduno-i ne te, sukduno ne kak os wa men sok mo Yefun Allah bi rus-i ne bado, sa u ne?
2Abraham ku os wa Yefun Allah nai Abraham gum sok mo Yefun bi rus-i mo gato Abraham ben bi suk-i ne ndo tepsu ye Yahudi bi sukduno-i yo, bere Abraham ku os wa bes an nggwa kok mone re. Sarewo Abraham yo ku os wa bes an nggwa kok mo Yefun Allah gwem yo mo nde.
3Tepsu ye krom mo Yefun Allah bi sukdu do, "Abraham onyar kem mo sukdu gato Yefun Allah ki nai an, sane anato Yefun Allah nut mo Abraham do, an sa, tep wa sok mo Yefun Allah bi rus-i it."
4Ye gato ben suk, bere ku sugum mo bi kamba. Sugum ne ye yo bi nai an yi nde, wo ye bi tepsu an bi kamba ne.
5Sarewo ye gato nut do, an kamba wa benbot ye Yahudi bi sukduno-i subere Yefun Allah nut mo an do, an tep wa sok mo Yefun Allah bi rus-i ne yo, bere siri re, Yefun Allah yo nai ye ne sok mo bi rus-i nde. Sarewo ye gato yo nutbot an bi kamba nde, wo an kwabom kam mo Yefun Allah do, bere Yefun nai an wé kadit sukye gato an ku mo os ibit, sane bere Yefun Allah nut mo ye ne do, "Ye ré sa, onyar kem mo Ji it, sane Ji nai an gum sok mo Ji bi rus-i sor." Yefun nai an sok mo Yefun bi rus-i mo an bi kamba nde, wo Yefun nai an sok mo Yefun bi rus-i mo gato an onyar kem mo suk gato Yefun ki ne sor.
6Sane dom, Daud bi sukjimnut-i tepsu sukdu ne. Daud ki do, "Ye gato Yefun Allah nut do, 'Ye ne sa, an yo bi sukjimnut sye mo suk gato an dakai ben ne nde, wo an onyar kem mo Ji, sane an sa, tep wa sok mo Ji bi rus-i it,' sane bere ye ne mit at wa." Daud ki sukdu subot ye gato sok mo Yefun Allah bi rus-i sare do,
7"Ye gato Yefun Allah yo nutbot bi sukibit ne o nde, bere ye ne mit at wa. Ye gato Yefun Allah ben sato rom bi sukdaret wé kadit an, tepsu ye rom sukkwik mo bur ne wé, ete ye nutbot o nde, sane bere ye ne mit at wa.
8Ye gato Yefun Allah yo ben sukye nai mo sukibit gato an ben ne o nde, bere ye ne mit at wa."
9Mo Daud bi sukdu ne, ye gato mit at wa ne te, ye gato simo sunat sor re, bado, ye gato yo simo sunat nde dom e? Sunat mo yo, sunat mo nde yo, suk yo nde, wo men ki mó re, sare do, Abraham onyar kem mo suk gato Yefun Allah ki ne anato Yefun Allah nut mo an do, "Abraham ré sa, tep wa sok mo Ji bi rus-i it."
10Sane Yefun Allah ki sukdu ne nai Abraham su kam u ne? Te Abraham simo sunat nyim bado, Abraham simo sunat wari, ete Yefun ki nai an bado? Sare, Abraham yo simo sunat nde tó, Yefun Allah nai Abraham gum sok mo An bi rus-i nyim wé re.
11Orete Yefun Allah syogat Abraham subere an simo sunat. An simo sunat tepsu sukkran subere yé mwa jam do, Yefun Allah nut mo an do, an sa, tep wa sok mo Yefun Allah bi rus-i it. Sane Abraham onyar kem mo suk gato Yefun Allah ki ne nyim wé anato Yefun iwa nai an gum sok mo bi rus-i, wo Abraham simo sunat wari. Sane Abraham anato tepsu ye gato kadum os wa yé mwa gato onyar kem mo Yefun Allah, gato yo simo sunat nde. Kapre án yé mwa ne yo simo sunat nde, Yefun Allah ki mo án do, án sa, tep wa sok mo Yefun Allah bi rus-i it.
12Abraham dom, an tepsu ye gato kadum os wa yé mwa gato simo sunat. Abraham kadum os wa yé mwa gato simo sunat sor nde, wo an kadum os wa yé mwa gato onyar kem mo Yefun dom. Men bi amui Abraham yo simo sunat nde tó, an onyar kem mo Yefun suga nyim tuya re.
13Yefun Allah tom su Abraham si bi wis-i ne sino sare do, "Suk mwa gato mo bur ré bere sok mo nan si nan bi wis-i o re." Yefun Allah tom sukdu su Abraham mo gato an benbot ye Yahudi bi sukduno-i nde, wo Yefun Allah tom sukdu su Abraham mo gato Abraham onyar kem mo suk gato Yefun Allah ki ne, anato Yefun Allah ki do, Abraham sa, tep wa sok mo Yefun bi rus-i it.
14Sane yé do benbot ye Yahudi bi sukduno-i anato yé ku suk mwa gato Yefun tom ne it yo, bere yé onyar kem mo Yefun Allah wa suma ne? Yo ós nde, bere yé yo ku suk gato Yefun tom ne nde.
15Sarewo men do werwa men benbot ye Yahudi bi sukduno-i yo, bere men yo ku suk gato Yefun Allah tom ne nde, wo bere men ku Yefun Allah bi sukmaskwa mo suk gato men ben suk siri kadit sukduno ne sor re. Yé duno men su sukduno ne mó re, anato men ben suk siri kadit, wo sukduno ne yo mo nde yo, bere men jam nde re.
16Sane suk gato Yefun Allah tom ne kem su ye gato onyar kem mo An sor. Abraham bi wis-i sor re, bere ku suk ne, we án sino onyar kem mo Yefun Allah it. Abraham bi wis-i yo kamba wa ben suk yo wa ku suk gato Yefun Allah tom ne nde, wo Yefun Allah dakai bi sukjimnut sye kas subot án anato Yefun Allah syo suk gato Yefun tom su ne dakai yi nai án sor. Sane anato Abraham bi wis-i mwa ne sino jam do, sangge, bere án ku suk gato Yefun Allah tom su án ne it. Suk gato Yefun Allah tom ne, Yefun tom su Abraham bi pa-i gato ye Yahudi bi sukduno-i kem su ne sor nde, wo Yefun Allah tom su ye gato sok mo Abraham bi wis-i mo gato án onyar kem mo Yefun Allah sagato Abraham onyar kem mo Yefun ne. Abraham gare tepsu ye gato kadum os wa men yé mwa ne sino gato onyar kem mo Yefun Allah ne,
17tepsu ye krom mo Yefun Allah bi sukdu, Yefun Allah ki nai Abraham do, "Ji anato bes nan tepsu ye gato duk os su ketke wa yewis mwa gato kem mo bur ré or sino." Yefun Allah tom suk su Abraham anato ben sato Abraham tepsu men bi ai re. Abraham onyar kem mo suk gato Yefun Allah ki ne. Abraham jam do Yefun Allah anato nggiwa sun yekwop mbau satu, Yefun Allah nggiwa ut suk gato yo mo nde, Yefun Allah ki sukdu ne sor, bere suk ne bor re.
18Kapre ye nut do, suk gato Yefun Allah ki ne bere yo bor nde tó, Abraham kwabom kam mo Yefun, Abraham onyar kem pe mo Yefun sor, sane anato Abraham tepsu yeketke mo yewis mwa, tepsu ye krom Yefun Allah bi sukdu do, "Nan bi wis-i bere mwa wai o re."
19Abraham jam do, suk gato Yefun Allah tom ne bere bor re. Sugane Abraham me do, an ka yenggras rok it, an kaim sye tepsu karowa kom mo tahun wotin dik it. Sane an nut do, an kaim yo nggi tep wa ku pa o nde bayok. Sane dom, an bi nggon Sara nukwerit pe re. Sarewo Abraham onyar kem pe mo Yefun sor. An bi sukjimnut yo brek kadit suk gato Yefun tom ne wokgan yo dom nde.
20Abraham bi sukjimnut we subot suk gato Yefun tom ne nde, wo an onyar kem pe mo Yefun ne nggi wai kadit nyim ne o re, ete an bes Yefun Allah gum kok sye wai sor.
21An jam do, sangge, suk gato Yefun Allah tom ne, bere Yefun Allah anato nggiwa benbot mone tó, Abraham jamwa pe re.
22Sane anato Yefun Allah nut mo Abraham do, "Ye ré sa, an onyar kem mo suk gato Ji ki ne, sane an sa, tep wa sok mo Ji bi rus-i it."
23Sukdu gato ki do, "Yefun Allah nut mo Abraham do, ye ré sa, an onyar kem mo suk gato Ji ki ne," ye krom sukdu ne subot Abraham sor nde,
24wo ye krom sukdu ne subot men dom. Sane Yefun Allah me do, men onyar kem mo Yefun Allah gato sun men bi Yekwesu Yesus Kristus kadit sukkwop ne it yo, Yefun nut mo men do, men sa, tep wa sok mo An bi rus-i it.
25Yesus Kristus ré, Yefun Allah bi ma wa ye gu kwop win men mo sukibit gato men ben ne. Orete Yefun Allah sun An kadit sukkwop subere kak os wa Yefun Allah nai men gum sok mo An bi rus-i subere men si Yefun Allah kem ndo su yu it.