Dual Panel1Sane, men ki sukdu sato suma subot sukibit gato men ben ne? Men ben sukibit mwa petok sor subere Yefun Allah bi sukjimnut sye kasbot men mwa wai o bado?
2Sane nde re. Ben sato men tepsu ye gato kwop, sukibit yo jom men o nde. Sane men ben sukibit gat pe o wa suma ne?
3Bere siri re. Nin dakai jam do, ye ras men mo syur bi sukjimnut do, men si Yesus Kristus anato tepsu dik mone it. Men do si Yesus Kristus tepsu dik it yo, bi sukjimnut do, men dom si Yesus Kristus kwop sino re.
4Sane ye ras men mo syur bi sukjimnut do, men si Kristus kwop sino re. Ben sato men kwop kadit sukibit gato men ben ne. Orete ben sato ye bi men mo makwe si Yesus Kristus sino dom re. Ye bi men mo makwe subere tepsu men bi Ai bi suktinggi gato sye wai ne sun Yesus Kristus kadit sukkwop, sane dom, bere Yefun Allah waii sun men. Ben sato men syesyar kadit syur tepsu yetu gato be, men kem mo bur ré, men ben men bi suk-i ne ndo, tara kadit nyim neya o re.
5Men si Yesus Kristus tepsu dik it. Sane men do si Kristus ben sato kwop it yo, bere Yefun Allah sun men kem ndo satu tepsu Yefun Allah sun Yesus Kristus, we men si Kristus tepsu dik it.
6Men jam do, men bi suk-i gato men ben suga nyim ne ben sato kwop si Yesus Kristus mo bi kwesukwin or wé kadit men re. Sane bere sukibit gato men ben nyim ne yo jom men o nde, men yo tepsu pakwerut wa ben sukibit ne o nde.
7Sukibit ne jom men o nde, we men tepsu ye gato kwop, men yo ben suk yo o nde it, sukibit yo jom men o nde.
8Men si Yesus Kristus do kwop sino it yo, men jam do, sangge, bere men si Yesus Kristus kem ndo sino dom,
9we men jam do, Yefun Allah sun Yesus Kristus kadit sukkwop it, An yo kwop o nde, suk gato gu men yetu kwop ne yo nggiwa gu Yesus Kristus kwop o nde re.
10Yesus Kristus kwop tepsu suktot mo sukibit gato men yetu ben ne. An kwop tepsu suktot mo sukibit mwa ne sino wam dik sor to kapyo mato kapyo. Su ré Yesus Kristus kem wa ben Yefun Allah bi suk-i sor.
11Sane men nutbot men dakai do, sukibit gato men ben nyim ne, or wé kadit men it. Ben sato men bi sukjimnut-i wa men ben sukibit kwop wé kadit men re. Sarewo su ré men kem wa men si Yesus Kristus sino ben Yefun Allah bi suk-i sor.
12Men bi men nggwa wa sukjimnut ibit jom men kaim budat tepsu pakwerut o nde subere men sibot os ibit ne o nde.
13Men bi men gro e, men syim e, men gwes e ne wa benbot sukjimnut ibit ne o nde. Men bi men nggwa wa ben sukdaret o nde, wo men bi men nggwa sino mo Yefun Allah sor. Men anato tepsu ye gato Yefun Allah nai wé kadit os sukkwop wa kem ndo satu. Sane men bi men nggwa sino mo Yefun Allah sor. Men bi men nggwa sino wa men ben suk gato tepsu Yefun Allah mit sor.
14Sane men bi men nggwa wa sukjimnut ibit jom men o nde, we su ré, men ku os wa men sombok wé kadit sukibit ne it, we men yo jammo ye Yahudi bi sukduno-i ne o nde. Sarewo su ré men simo os gato Yesus Kristus kak wa men ne sor. Yefun Allah fro os ne wa men, we An bi sukjimnut sye kas subot men dakai yi.
15Su ré men jammo ye Yahudi bi sukduno-i ne o nde, wo men simo os gato Yesus Kristus kak wa men. Sane bere sa u ne? Men ben sukibit dakai daret bado? Nde re, men ben sukibit o nde.
16Men jam do, men bi men nggwa mo yenggras ge dik yo, men jammo an, men gum kwerut wa an yo, bere men tepsu yenggras ne bi pakwerut it, bere men benbot suk mwa gato an ki ne sor. Men bi men nggwa wa men ben sukibit yo, men tepsu sukibit bi pakwerut it anane. Sane kom mo rut sukibit ne gwat sukkwop wa men. Wo men bi men nggwa wa men benbot Yefun Allah bi sukdu-i yo, men tepsu Yefun bi pakwerut it anane. Sane kom mo rut, men ku os wa men gum sok mo Yefun bi rus-i, ete men si Yefun Allah kem ndo mone.
17Suga nyim ne nin gum kwerut wa nin ben sukibit, ben sato sukibit jom nin re, wo su ré sa, nin jom sukduno gato ye duno nin su ne. Sukduno gato sangge ne, gato Yefun Allah grem kem su nin, nin jom, ete nin benbot sisu nin mit dik si nin onyar dik it. Sane men ki ndo mo Yefun Allah sor.
18Yefun Allah sombok nin wé kadit sukjimnut ibit gato jom nin ne, orete su ré nin gum kwerut wa ben suk gato tepsu Yefun Allah mit sor.
19Nin bi sukjimnut yo nggiwa but sukdu gato ji ki ré sisu ndo nde, sane anato ji gwat sukamno subot suk gato nin dakai jam re, subere nin but sukdu ré ndaf re. Suga nyim ne nin bi nin nggwa tepsu pakwerut wa nin ben suksiri si sukdaret ket nin í, ben sato sukibit jom nin re. Nin bi nin gro e, nin syim e, nin gwes e ne wa ben suksiri si sukibit ne su sane sane sor, kom mo rut sa, nin ben sukibit mwa wai o re. Sane su ré yo, nin bi nin gro e, nin syim e, nin gwes e ne, nin bi nin nggwa ne sino tepsu pakwerut wa benbot suk gato tepsu Yefun Allah mit ne sor. Sane bere kom mo rut, nin ben suk gato Yefun Allah dakai fro wa nin ben ne sor re.
20Suga nyim, sukjimnut ibit jom nin tepsu pakwerut ne sa, nin yo tepsu pakwerut wa nin ben suk tepsu Yefun Allah mit mo nde tó.
21Sugane nin ku suk gato ndo mo sukibit gato nin ben ne sato suma ne? Suk yo mo nde, wo sukibit mwa ne ben nin damen, orete kom mo rut, gwat nin mu mo bot gesyos sor.
22Sarewo su ré, Yefun Allah sombok nin wé kadit sukjimnut ibit gato jom nin ne it. Nin tepsu Yefun Allah bi pakwerut it. Mone nin ku suk gato ndo anato Yefun Allah nai nin wa nin ben Yefun Allah dakai bi suk-i sor, ete kom mo rut sa, bere nin kem ndo to kapyo mato kapyo.
23Sane men do jammo sukjimnut ibit yo, bere men ges mo bot gesyos mo koirut sor. Sarewo suk gato Yefun Allah syo yi nai men anato An syo men bi Yekwesu Yesus Kristus ma kak os ndo wa men kem ndo to kapyo mato kapyo.