Dual Panel1Yetu ge dik yo syo syu gwes dik yo gato ye nat suk su ne ma nai ji. Orete Yefun Allah syogat ji do, "Nan mu nat Ji bi nu ne et. Nan nat Ji bi meja gato ye grem suk wa ye som Ji su ne et. Nan newa yé gato som Ji mone dom et.
2Sarewo nan nat nu de nden bi halaman nde, nan misyar, we Ji fro nat ne wa yé gato jam nde Ji ma kem mó. Yé gato jam nde Ji, bere yé ne ben Yerusalem ibit, orete yé ne jom Ji dakai bi kota-i gato ndo ne sor kom mo aina musyu at sop we, gato tepsu kam ribu dik wotin we musyu mat.
3Mo kota ne Ji bes yetu ge we wa mu kibot Ji bi suktaru sane sor kom mo kam ribu dik wotin we musyu mat ne or. Ye we ne it san ibit anato yé jam do, ye we ne jimnotbot suktaru ne ndo nde."
4Ye we ne gato kibot Yefun bi suktaru ne, an we tepsu kwe zaitun ke we yo. Ye we ne tepsu suk gato ka sa dem sor wa ye dum sukru mó dom. Ye we ne ti mo Yefun Allah gato jom bur ré iwedewe gwem.
5Ye to ma wa gu ye we ne yo, bere bot syesyar kadit ye we syokwet ete git yé gato futma wa gu an we ne kwop. Sane yé gato ma wa gu ye we bere bot git kwop sor.
6Ye we ku suktinggi wa ye we syogat nogi nde yei sane sor ye we kibot Yefun Allah bi suktaru ne or wé et. Ye we ku suktinggi wa ye we ben syur tepsu yetu dé dom. Sane o, ye we ku suktinggi wa ben sukye ket kwayo-kwayo nai nje mo bur ré ket ye we ne í sor.
7Ye we kibot Yefun Allah bi suktaru ne or yo, bere suge krok gato sye ge dik yo it kadit kwoye sye mo bur desnak ete futma wa gu ye we ne. Suge ne bere nggi wai kadit ye we, ete gu ye we ne kwop re.
8Ye we mukri dakai kwop mo os mo kota sye mit ne, yé yo nai nde. Suga nyim, ye we bi Yekwesu, ye mban mo kwesukwin mo kota sye ne dom. Yé gwat sukamno, yé ki do, kota sye ne tepsu Sodom bado Mesir, we yé gato kem mo kota we ne bariket yé gato onyar kem mo Yefun tepsu yé gato kem mo kota sye ne bariket ye we ne si bi sukdu-i ne dom.
9Ye we mukri kwop mone sor. Yetu bere ma kadit buryo-buryo e, wisyo-wisyo e, yeyo-yeyo e, ayo-ayo e ne sino. Yetu mwa ne bere ma sokbot ye we mukri kom mo kam no gri nap. Yé mwa ne sino bariwa yé bi ye we mukri.
10Yé mwa ne sino mo bur ré iwedewe me ye we kwop yo, yé mit iwa ndo nde. Yenabi we gane ben sukye nai yetu mo bur ré kwop, sane anato yé konwa, we yé mwa ne mit iwa ye we kwop ne. Yé mwa ne mit iwa ye we kwop anato yé syo suk nai yu dom.
11Kam gri rek or, kam napyo o, ete Yefun Allah fuf mas ma ngga mo ye we ne, ete ye we mbau satu. Ye we sun, an we ti o mone, orete yé mwa gato sokme ye we nyu ndo nde.
12Orete yé jam yetu ge dik yo saiye mo gu. Ye ne ki nai ye we sare do, "Nin ka we ma more et!" Orete ye we it mu mo gu ngga mo nyotem mit saresa, ye gato bariket ye we sokme ye we it mu mo gu or re.
13Sugane it, sui juwai bur ndo nde sane sor nu mo kota ne napyo fot mbrur-mbrar or re. Kadit nu ke wotin dik, nu ke musyu dik e gwa bur re. Yetu ge ribu mufit kwop re. Yé gato mbau tó nyu ndo nde, án bes Yefun Allah mo gu ne gum kok wai o re.
14Sukye kwa gri gato ndam syap tu saiye su ne, kwa dowe sa, or re, wo bergan kwa dogri bor re.
15Malaikat kedomufit fuf bi trompet-i ba o sa, ji jam ye ki sukdu sye mo gu sare do, "Su ré sa, Yefun Allah gato jom men si Kristus gato Yefun Allah syogat ma wa kak os ndo wa yetu sok mo Yefun bi rus-i ne, ré ne Yefun Allah si Kristus jom bur ré it. Kadit kam ré sa, Yefun Allah si Kristus dakai jom yetu mo bur ré to kapyo mato kapyo it."
16Orete yenggras ge musyu we sop at gato kem mo bi kursi mo Yefun Allah gwem bare nggwa mo bur, ete som Yefun Allah.
17Yenggras ne ki do, "Yefun Allah o, men ki ndo mo Nan, men bi Yekwesu, Yefun Allah, Nan nggi wai o re. Nan sa, kadit ketke ne mó, su ré ne mó tó, men ki ndo mo Nan, we su ré Nan kadum Nan bi suktinggi nai men, Nan jowa men yetu mo bur ré it anare.
18Ye gato jam nde Nan mo buryo-buryo maskwa ndo nde, we Nan bi sukmaskwa bor it anare. Su kam ré, bi kam-i tepsu Nan ndobot yé mwa ne sino gato kwop mo suk gato án ben ne re. Nan bi pakwerut gato ki Nan bi suktaru ne, yenabi gane, Nan syo sukndo nai án mo suk gato án ben ne it anare. Yé gato onyar kem mo Yefun Yesus gato bes Nan gum kok ne dogato gum wok si dogato gum sye ne sino, Nan syo sukndo nai án it anare. Sarewo yé gato ben yetu mo bur ré ibit, Nan ben ibit it anare."
19Orete Yefun Allah bi nu mo gu ne kak, ete ji sokme sukduno rok bi peti mo nu mit ne. Peti ne tepsu peti gato Musa fro wa ye Yahudi bok sukduno rok mo mit ne. Mo peti mit ne ye grem sukduno rok gato Yefun Allah tom su ye Yahudi suga nyim tuya ne mó. Nu ne kak sa, nowarek e, nogu pu e, sukyo-sukyo pu e, sui juwai bur e, nogi sye su es gato krat sa jok, suk mwa ne bor sugane it.