Dual Panel1Orete ji sokme malaikat ge dik yo o is kadit gu ne ma. Malaikat ré bi suktinggi sye wai. Ben sato an nggren tepsu sukru, ete an rer ku bur ré re.
2Malaikat ne saiye sare do, "Ibit it! Kota Babel gato ye bes gum kok ne ibit it. Yetu yo kem mone o nde. Su ré, kota ne tepsu nat fo gato malaikat ibit mwa kem mó sor. Kota ne ses su ndam gato ye Israel fowa git si ndam gato yé bariwa ne dom.
3Kota ne ibit, we yé mo kota ne kadum os siri nai yetu mo bur ré iwedewe sino, ete yé simo, tepsu ye syo nau nai nje, ete yé da sane sor yé yenau su. Kota ne bi suk-i tik yeraja mwa neya mo bur ré mit ete án sino ges mo os ibit, tepsu nggon gato mbrau nggwa wa tik yebris mit, ete yebris ne iwa ben suk siri su nggon ne. Ye gato so suk mo bur ré ku sugum mwa kadit sukibit mwa gato yé ben mo kota ne re."
4Orete ji jam ye yo ki sukdu ma kadit gu sare do, "Ji bi rus-i, nin mu kadit kota ne et. Nin syesyar wé kadit kota ne, subere nin waii ben suksiri sato án ben ne nde. Nin mu kadit, subere sukye gato yé ku mone, bere yo tok nin nde.
5Bere yé mone ku sukye, we suksiri gato yé ben ne mwa ndo nde. Yé tat suksiri ne bu sor kom mo gu re. Yefun Allah napawa sukibit mwa gato án ben ne re.
6Nin ben sukye su nje mo kota ne win sukye gato yé ne ben su nje et. Yé mo kota ne ben sukye nai nje wam dik it yo, nin waii ben sukye wam we satu nai án et, tepsu nin sye nau krat mo án bi mok ses wam we wa án da et, tepsu án fro wa ben sukye nai nin, nin ben sukye nai án wam we sor.
7Nin ben sukye nai án sor án dipa, ete án wo án nderku án dakai, nin ben sukye mwa nai án tepsu suk mwa gato án dakai nai wa án dakai, ete án bes án nggwa kok su ne. Yé mo kota ne dakai nut mo án dakai tepsu nggon pasye sare do, 'Ji ré sa, tepsu nggon pasye. Ji nggonna nde. Bere ji yo nderku nggwa wokgan yo dom nde.'
8Sane kam no dik sor, ete án ku sukye bok yo sato: yé kwop suki e, yé wo nderku nggwa e, yé ku sukonde sye e ne. Yefun Allah gato gum Yekwesu gato kok wai ne, bere An fro os wa syo sukye nai nje mo kota ne. Bere Yefun syo bot git kota ne si bi nje ne wé or re."
9Yeraja mo bur ré dogato da bro wa kota ne bi suk-i tepsu ye gato da bro wa ben suk siri su nggon. Yeraja mwa gato sibot nje mo kota ne bi os-i, ete nai suk mwa ket án í, bere yeraja ne sokme bot gato git kota ne bu it mu mo gu, bere yeraja mwa ne wo ete nderku nje mo kota ne.
10Yeraja nyu mo sukye gato nje ku mo kota ne. Sane yeraja ti ko kadit kota ne ete ki do, "Kamapa! Yé mo kota Babel gato ye bes gum kok ku sukye ndo nde anare! Kota gato gwat os nggi wa yetu mwa ne sino simo ne, su ré ku sukye kom mo jam dik sane sor, ibit or re."
11Bere yé mwa gato so suk mo bur ré wo dom, án nderku nje mo kota ne, we nje mo kota ne yo so suk gato án gwat mu mone o nde.
12Yé mo kota ne yo so suk mo án o nde. Suk sato emas e, perak e, jok gato bi sugum sye e, mutiara e ne, yé yo so mo án o nde. Suk sato san kwo gato gum do lenan e, san te gato bi sugum sye e, san gato yar njep gum do san sutera e, san er e ne, yé yo so mo án o nde. Suk sato kwe gato grik ndo sato kwe nggon nak e, suk gato yé ben su kwe gato bi sugum sye e, suk gato ye ben su gading e, tembaga e, besi e, pualam e ne, yé yo so mo án o nde.
13Suk sato kwe gato da wik e, es wo e, es kru e, es gato grik ndo gato ye kon sugit su e, suk gato grik ndo sato kwe da gato grik e, mur e, kemenyan e ne, yé yo so mo án o nde. Suk sato nau e, manik e, tepung e, gandum e, sapi e, domba e, kuda si bi kereta e, pakwerut e, yetu e ne, yé yo so mo án o nde.
14Ye gato gwat suk mu wa so ne ki nai nje mo kota ne do, "Suk mwa gato ndo, gato nin mit iwa ne, nin yo ku o nde. Suk mwa gato nin mbrau nin nggwa ndo su mo bur ré sisu nin bi suk mwa gato bi sugum sye ne, ges or kadit nin re, bere nin yo ku o nde."
15Yé gato gwat suk mu wa so mo nje mo kota ne, ete ku sugum mwa mone, bere ti ko kadit re. Bere yé ne nyu mo sukye gato nje mo kota ku ne. Bere án wo, án nderku nggwa,
16ete án ki do, "Kamapa! Yé mo kota Babel gato ye bes gum kok ku sukye ndo nde! Yé mone it san kwo ndo gato ye kendo gum do lenan. Án it san te si san er gato bi sugum sye. Yé mbrau án nggwa su emas e, jok gato bi sugum sye sisu mutiara.
17Sarewo kom mo jam dik sane sor, suk mwa ne ibit or re." Yesu mo kapal e, ye gato simo kapal e, ye gato gwat kapal ne si ye gato gwat bi suk su kapal mu wa so mo ye yi ne sino ti ko kadit kota ne.
18Án sino sokme bot gato git kota bu it mu mo gu ne, bere án saiye do, "Kota u anato gum kok sato kota ré ne?"
19Bere án wo, án nderku nggwa, án nutbot ndo nde sane sor án krer bofuf mo án su, ete án saiye do, "Kamapa! Yé mo kota Babel gato ye bes gum kok ku sukye ndo nde! Yé mwa gato bi kapal ma mo kota ne, ete ku suk mwa mo kota ne. Sarewo kom mo jam dik sane sor, kota ne ibit or re."
20Nin yé mwa ne sino gato kem mo gu ne, nin mit at, we Yefun syo sukye nai kota Babel, kota ne ibit it. Nin yé gato onyar kem mo Yefun Yesus e, nin yerasul e, nin yenabi e ne, nin sino mit at, we Yefun Allah syo sukye nai nje mo kota ne tepsu sukibit gato yé mone ben ket nin re.
21Orete malaikat ge dik yo gato nggi nai jok gato sye wai ete am mo sem mit. Ete malaikat ne ki do, "Kota Babel gato ye bes gum kok, bere Yefun Allah am nggi sato ji am jok sye ré. Sane bere kota ne yé yo ku o nde.
22Bere yé jam musik gato yé kamo mone o nde. Ye gato ba sukbadek e, kamo kecapi e, seruling e, trompet e ne, bere yé yo jam bi musik ba mo kota ne o nde. Ye gato ben suk mo kota ne, sato yé nggi nu e, ben suk mo os e, fro suk mo kota mit e ne, yé yo ku yé ne mo kota ne o nde. Bere ye yo jam suk nggra sagato yé krut gandum mone o nde.
23Sukru yo ru rer ku kota ne o nde. Yé yo konwa ete kamowa ye gato kra yu mone o nde. Suga nyim ne sa, yé mo kota ne gato so suk nai ye yi neya ye bes gum yepasye re. Sane dom, suga nyim ben sato yé mo kota ne kwa syua wa ben kidar nje mo buryo-buryo ges mo os ibit ne re."
24Yé mo kota Babel gu yenabi ge bok yo. Yé gu yé gato onyar kem mo Yefun Yesus ne kwop dom. Yé gu yetu ge bok yo sino mo bur ré mone. Yé mwa ne dé sye mo kota ne, sane Yefun Allah waii ben sukye nai nje mo kota ne win suk gato án ben ne.