Dual Panel1Malaikat ne ki bi sukdu ne or sa, ji jam suk yo ba sye tepsu yetu mwa yé mo gu saiye sare do, "Men un Yefun Allah et. Yefun ne sa, nggi, Yefun Allah sa, gum kok wai o re. An sa, nai men wé kadit sukye subere men kem ndo to kapyo mato kapyo.
2An ndobot nje mo bur ré sa, An ndobot An bi suk-i ne ri-roi sor, An syo sukye nai yetu mo bur ré tepsu sukibit gato yé ben ne. Yé mo kota gato ben suk sato nggon gato ben siri mwa ne, Yefun syo sukye nai re. Ben sato yé mo kota ne tik yé mwa mo bur ré mit anato yé mwa ne simo os ibit tepsu nggon gato ben siri mwa tik yé mit wa ben suksiri. Ben sato nggon ne gu Yefun Allah bi pakwerut kwop wé mone, sane Yefun Allah waii gu nggon ne wé win sukibit gato nggon ne ben re."
3Orete yetu mwa mo gu ne saiye wam dik yo o sare do, "Men un Yefun Allah et. Bot gato git kota ne bu it mu mo gu to kapyo mato kapyo."
4Yenggras ge musyu we sop at sisu suge at bare nggwa ete som Yefun Allah gato kem mo An bi kursi sye ne. Án sino ki do, "Sangge, men un Yefun Allah et."
5Orete yé jam ye yo ki sukdu mo Yefun Allah bi kursi sye ne sare do, "Men un Yefun Allah et. Men yé gato tepsu An bi pakwerut e, men yé gato gum wok e, gum sye e, yé mwa ne sino gato jammo An ne, men sino un Yefun Allah et."
6Orete ji jam suk yo ba syo-i ne tepsu yetu mwa yé ba. Yé mwa ne ba syo-i ne tepsu syur sye ú mo tú. Yé mwa ne ba syo-i ne tepsu nogu pu gato nggi ne. Yé mwa ne saiye sare do, "Men un Yefun Allah et. Yefun Allah gato jom men ne anato nggi wai o re, An jowa yé mwa ne sino.
7Men wi men ambre, men bes An gum kok et, we su kam ré yo, Domba Gan bi kam-i wa An kra it anare. Nggon gato Domba Gan kra ne fro nggwa it.
8Nggon ne ku san gato kwo ndo wa nggon it re." (San kwo ndo ne bi sukjimnut do, sukndo gato yé gato onyar kem mo Yefun Yesus mo bur ré ben tepsu Yefun mit ne.)
9Orete malaikat ne ki nai ji do, "Nan krom sukdu gato ji ki ré et: Ye gato ye kendo ma simo Domba Gan bi sukra gato ye konwa ne, ye ne sa, mit at wa." Orete malaikat ne ki o do, "Sukdu gato ji ki ne, Yefun Allah bi sukdu gato sangge anane."
10Ji jam sukdu ne sa, ji bare ji nggwa mo malaikat gwem wa ji bes malaikat ne gum kok, sarewo malaikat ki nai ji do, "Nan bes ji gum kok nde. Ji si nan tepsu yu, men ka we Yefun Allah bi pakwerut sino. Men ka we si nan bi nji mo Yefun bi rus-i, gato jom Yefun Yesus bi sukdu-i ne pe, men sino tepsu Yefun Allah bi pakwerut. Sane nan bes ji gum kok nde, wo nan bes Yefun Allah gum kok sor re." We sare, ye gato jom Yefun Yesus bi sukdu-i ne bere Yefun syo suktinggi nai ye ne, subere ye ne nggiwa kibot Yefun Allah bi suktaru-i rer nai ye yi jam.
11Orete ji sokme Yefun Allah bi nu mo gu kak sa, ji me kuda kwo ge dik yo ti mo ji gwem. Ye gato it mo kuda ne gum do, "Ri-roi si Sangge." Ye ne syo sukye nai yetu sisu ri-roi tepsu sukibit gato yetu ben ne sor. Ye ne ndobot suk gato yetu ben ne sisu sangge, sane anato An futma gu nje kwop win sukibit gato yé ben ne.
12Ye ne gro gan tepsu bot ru. An bom yekwesu bi topi mwa mo An su. Ye krom gum dik yo mo An kaim. Ye yi ne jam nde re, wo An dakai sa, jam gum ne re.
13An it san gato ye ras mo yetu dé. An gum do, "Yefun Allah bi Sukdu."
14Yefun Allah bi yesukmise mo gu boribot An. Yé mwa ne it mo kuda kwo ge bok yo, yé mwa ne it san gato kwo ndo.
15Nyom gato ot de we syesyar kadit An syokwet. Bere An ben sukye nai nje mo bur ré iwedewe su nyom ne. Bere An ben sukye nai nje su nggarmom muk sane sor yé mwa ne sino jammo An petok sor. An gwat os wa Yefun Allah gato nggi wai ne bi sukmaskwa bor mo bur ré. An ben yetu mwa dé sye, tepsu ye yakos anggur bo, bere i-rom ne syesyar re.
16Mo An bi san gato kewa An gwes muk ne, ye krom An gum sare do, "Yeraja ré gum kok wai kadit yeraja mwa neya o re. Yekwesu ré gum kok wai o kadit yekwesu mwa neya o re."
17Orete ji sokme malaikat ge dik yo o gato ti mo kam su. Malaikat ne saiye kendo ndam mwa gato ok mo gu nim ne sare do, "Nin ma, nin sum wa nin git sugit mo Yefun Allah bi pesta sino et.
18Nin ma git yekri ku sato ré, nin git yeraja ku e, yesukmise bi padosye ku e, yesukmise ku e, kuda ku e, ye gato it mo kuda ne ku e, yetu mwa ne sino ku e, ye gato gum pakwerut ku e, ye gato dakai ti mo an dakai ku e, ye gato gum sye ku e, ye gato gum wok ku e ne. Nin ma nin git yekri mwa ne sino ku et."
19Orete ji sokme suge doketke si yeraja mo bur ré si bi yesukmise-i sum wa futma ben sukndi su Ye gato it mo kuda kwo si bi yesukmise-i ne.
20Yefun but suge doketke ne si suge kedowe gato ye kendo do yenabi gato ben kidar nje. Yenabi ne kadum bi suktinggi, an ben suk gato ben nje yeket mo suge doketke ne gwem. (Yenabi ne ben suk gato ben nje yeket, an ben kidar yé mwa gato suge doketke syogat ye syat ja wa ne. Yenabi ne ben kidar yé mwa gato som suk gato ye ut ka sa suge doketke ne.) Suge doketke ne sisu yenabi gato kidar nje ne, an we ne mbau tó, ete Yefun am an we mu ngga mo bot sye gato tepsu em, gato ru sye basmi kwik su belerang.
21An we bi yeko ne yé gu yé mwa ne kwop su nyom gato syesyar kadit Ye gato it mo kuda kwo ne syokwet. Orete ndam mwa ne sino ma git yekri ne ku sor, ndam git gat sane sor, ndam on don su yekri ku ne.