Dual Panel1Orete ji sokme gu be si bur be. Gu gato rok sisu bur gato rok ne fres wé re. Sem fres dom re.
2Ji sokme Yefun Allah bi kota, Yerusalem be is kadit Yefun Allah mo gu ma bur. Kota ne fro sisu ndo re, tepsu nggon mbrau nggwa ne kur mek wa kra su bi ya.
3Orete yé jam Yefun Allah mo An bi kursi sye ne ki sye sare do, "Ré yo, Ji, Yefun Allah, ma kem sisu yetu it! Bere Ji ma sisu yetu kem mo nat dik sino re. Yetu ne tepsu Ji bi rus-i re. Ji dakai sisu Ji bi rus-i kem mo nat dik sino tepsu yetu bi Yekwesu ne o re.
4Bere Ji nggri yé gato wo ne gro rom wé re. Bere yé yo kwop o nde, yé yo nderku nggwa o nde, yé yo wo o nde, yé kaim yo yó e, dipa su sukye o nde. Suk bok ne bere bor o nde, we suk mwa gato nyim neya fres wé or re."
5Orete Yefun Allah gato kem mo An bi kursi sye ne ki do, "Su ré, Ji ben suk mwa ne sino be it!" An ki nai ji o do, "Sukdu gato Ji ki ré sangge, sukdu ne tep wa yé onyar kem pe mó, sane nan krom et!"
6Yefun ki o do, "Suk mwa ne Ji ben or it! Ji anato Yefun gato ut suk kadit ketke ete jom sane sor kom mo pe gato or mó. Bere Ji syo syur nai ye gato sosa kadit syur nggrup gato ben yetu mbau. Bere Ji syo syur ne ma wa án da, án yo bi suk yo wa nde.
7Yé gato nggi wai kadit bur ré bi suk-i, bere án ku suk mwa mo bur be ne kadit Ji. Bere Ji anato tepsu Yefun gato jom án, ete án anato tepsu Ji dakai bi pá-i.
8Sarewo ye gato ben an bi suk-i siri kadit Ji mit, bere Ji am mo bot gesyos. Ye gato bere Ji am mo bot gesyos anato ye gato ben bi suk-i sato ré: ye gato rewa Ji e, ye gato bariket Ji e, ye gato som sukdaret ete ben sukibit su e, ye gato gu ye yi kwop daret e, yebris si nggon gato ben siri su yu daret e, ye gato kwa syua e, kro ri, frum suk e ne, ye gato som sukdaret e, yé mwa ne sino gato kidar suk e ne. Yé mwa ne sino gato ben bi suk-i ibit sane yo, bere Ji am ngga mo bot sye gato tepsu em ete ru sye basmi kwik su belerang. Bot sye ne anato tepsu sukkwop kedowe."
9Malaikat ge dik yo ma kadit malaikat ge mufit gato jom mbem su sukye mufit wari ne ma ku ji ete ki do, "Nan ma, bere ji kadum nggon gato ye fro wa kra Domba Gan ne nai nan me et."
10Yefun Allah Gen pet mo ji, ete malaikat ne gwat ji mu kom mo banbo sye dik yo yu. Mone malaikat kadum Yefun Allah dakai bi kota Yerusalem gato is kadit Yefun Allah mo gu ma bur ne nai ji me.
11Yefun Allah kaim rer-rik mo kota ne. Kota ne rer-rik ndo yé, tepsu jok gato bi sugum sye rer-rik ne. Kota ne rer-rik sato jok gato ru kur si ru er ne, ete rer tepsu kaca.
12Kota ne bi ros sye gato ti syu kok. Ros syo ne musyu dik sop we mó. Malaikat musyu dik sop we mewa ros syo bok ne. Mo ros syo ne ye krom ye Israel wis musyu dik sop we ne gum mó.
13Ros syo gri yo mo kota tak de nim, gri yo o tak de ti, gri yo o tak de nden, gri yo o tak de ket.
14Ye ben ros syo mo jok sye musyu dik sop we yu. Mo jok bok ré ye krom Domba Gan bi yerasul ge musyu dik sop we ne gum mó.
15Malaikat gato ki suk su ji gwat suk yo ka sato kwepu emas wa an nat suk mo kota ne. An nat kota bi ros e, an nat kota bi ros syo e ne.
16Kota ne ré si syu tepsu yu. Malaikat ne nat kota su bi kwepu emas. Kota ne syu kom mo kilometer ribu we wotin at. An nat kota ne ré tepsu kota syu ne dom re. Malaikat ne nat kota ne ti syu kok tepsu kota ne syu dom.
17Malaikat nat kota bi ros ne. Ros ti syu kom mo meter musyu mumat. Malaikat nat suk su bi kwepu tepsu yetu nat suk su meter.
18Kota ne bi ros, ye nggo su jok gato ru kur si jok gato ru er. Kota ne ye nggo su emas, gato rer-rik tepsu kaca.
19Jok sye gato ye tat kota bi ros su ne, ye mbrau su jok gato bi sugum sye wisyo-wisyo. Jok doketke anato jok baiduri pandan gato ru kur si er. Jok kedowe jok nilam gato ru kur tepsu gu. Jok kedogri jok yakut gato bok-bok. Jok kedoat jok zamrud gato ru kur tepsu kwenat.
20Jok kedomumek jok baiduri sepah gato bok-bok ete er. Jok kedomumat jok delima. Jok kedomufit jok ratna cempaka gato ru kri. Jok kedomunggwo jok pirus gato kur si warna yi. Jok kedomusi jok topas gato kri. Jok kedomusyu jok krisopras gato kur tepsu kwenat. Jok kedomusyu dik sop dik jok lazuardi gato er. Jok kedomusyu dik sop we jok kecubung gato kur te.
21Ros syo mo kota ne musyu dik sop we. Yé kok mutiara bodik-bodik gato sye kewa ros syo ne dik-dik. Yefun sya emas gato ndo yé, rer tepsu kaca bot os sye mo kota mit ne.
22Ji yo me nu ke dik yo wa yé sum wa un Yefun mo kota ne nde, we men bi Yekwesu Yefun Allah gato nggi wai o re, An si Domba Gan ne, An we ne dakai sisu nje mone. Sane ye yo mitmo nu wa yé sum wa yé un Yefun mone nde.
23Yefun Allah dakai rer-rik-i si Domba Gan kaim rer-rik-i anato tepsu sukru mo kota ne. Sane yé mone yo mitmo kam si aina wa rer ku án nde.
24Kota ne bi sukru bere rer ku yewis mwa ne sino tep wa án mu ben án bi suk-i su. Yeraja mo buryo-buryo bere gwat án bi sukrok mwa ma mo kota ne.
25Kamdik-kamdik ros syo ne kak pe sor. Ye yo dom suk yo wa nde, we mone noru yo mo nde.
26Bere yewis mwa ne sino gwat án bi suk mwa gato ndo yé ma, bere án bi suk gato ndo wai bere yé gwat ma mone.
27Sarewo yé gato ben bi suk-i siri kadit Yefun mit ne, bere yé ne yo sok mo kota ne nde, wam dik yo dom nde. Yé gato som sukdaret e, kidar suk e ne yo sok mo kota ne nde. Sarewo yé gato ye krom gum mo Domba Gan bi Buku Yegesyos sor anato sok mo kota ne.