Alkitab Mobile SABDA
[VER] : [ABUN]     [PL]  [PB] 
 <<  Yakobus 5 >> 

1Ji bi nji, ji bi nyanggon, nin yé gato ku suk mwa, nin jammo sukdu gato ji krom ré et. Nin wo, nin nderku nin nggwa, we bere nin ku sukye ndo nde.

2Nin bi suk mwa ne mbu it. Nin bi san kundun git wak or re.

3Nin bi emas si perak, on git it. Bere Yefun syo sukye nai nin mo gato nin sum suk mwa wa nin dakai, nin sum sugum, emas si perak e ne. Karowa bur ré kru re, sarewo nin grem suk mwa ne wa nin dakai anato on git suk ne. Bere Yefun syo sukye tepsu bot git nin kaim dakai or mone.

4Nin yé gato ku suk mwa, nin yo syo sugum nai ye gato ben suk wa nin mo nin bi nggwe ne nde. Nin yo bi án bi kamba nde re. Su ré yé ne saiye ket nin gum mone. Yé mwa ne bi sukdu-i kom mo Yefun Allah gato nggi wai o re, Yefun jam sukdu ne it.

5Nin yé gato ku suk mwa, nin kem mo bur ré si suk mwa ne not re. Nin ben suk su suk mwa ne ket nin í ne sor. Ben sato nin kon nin nggwa su suk mwa ne tepsu ye kon suksi sane sor suksi ne kaim ndo. Su ré nin tepsu suksi gato kaim sye ndo, tep wa ye gu kwop or re.

6Nin yé gato ku suk mwa, nin syo sukye nai ye gato ben sukndo re. Nin gu ye gato ben sukndo kwop wé. Sarewo ye gane yo duwer nin mo suk yo mo nde.

7Sane, ji bi nji, ji bi nyanggon, nin eswa Yefun Yesus satu ma sor. Nin me mo ye gato ben nggwe ne do, an jan an bi sukjan mo nggwe, orete an eswa, an eswa sane sor sukjan gato ndo ne kom, ete kri. An eswa nogi dom, an eswa nogi tepsu aina gato nogi ma su, ete an bi sukjan kom sisu ndo.

8Sane nin dom, nin eswa men bi Yekwesu Yefun Yesus satu ma, Nin misyar Yefun nde, wo nin jom Yefun bi sukdu ne krat sor, we karowa An ma it.

9Ji bi nji, ji bi nyanggon, men kiket yu nde, men ki ye yi gum ibit nde, sawe bere Yefun Yesus waii ki men gum ibit. Karowa men bi Yekwesu Yefun Yesus ma wa ndobot men it anare.

10Ji bi nji, ji bi nyanggon, men nutbot suk gato yenabi ben ne. Án kadum os wa men mo sukye gato án ku ne. Án do ku sukye it yo, án eswa sane sor sukye ne or kadit án, án yo misyar Yefun Allah nde, wo án ki sukdu gato Yefun tarubot án petok sor.

11Nin dakai jam do, ye gato ku sukye, ete an yo misyar Yefun nde, wo an jom Yefun bi sukdu ne krat yo, ye gato ben sane, men nut do, bere Yefun syo suk mwa gato ndo nai an. Men jam sukdu subot Ayub, tomgatu an ben suk sane mó re. Men jam do Ayub eswa sukye gato an ku ne or kadit an, an yo misyar Yefun Allah nde. Kom mo rut sa, Yefun Allah syo suk mwa nai an or re, we Yefun Allah dakai jimnotku men yetu, Yefun ben An bi suk-i ndo su men dakai yi petok sor.

12Ji bi nji, ji bi nyanggon, sukdu ré sye wai kadit sukdu yi neya, sare do, men ki suk it yo, men syo men syim do, bur are, gu ana nim ne si suk yi neya dom nde. Men ki sane nde, wo suk gato men ki ne kwa we sor. Men bi sukjimnut subot suk yo do, sangge it yo, men ki do, "sangge" sor, wo men bi sukjimnut subot suk yo do, siri it yo, men ki do, "siri" sor. Men ki men bi sukdu-i sane subere Yefun Allah yo syo sukye nai men mone nde.

13Nin deyo ku sukye it yo, an ki napyo nai Yefun jam subere Yefun ós an mone et. Nin deyo mit at subot suk yo it yo, an kos an un Yefun sor.

14Nin deyo i it yo, an kendo yekwesu mo nu ari ma ki suk su Yefun wa an. Yekwesu ne es manik mo an, ete ki Yefun Yesus gum mone.

15Yekwesu ne do ki suk su Yefun su an mit dik si an onyar dik mone, ete yekwesu ne kwabom kam mo Yefun do, bere Yefun nggiwa ben suk gato an ndekwa ne yo, bere Yefun ben ye ne ge kadit suki ne, bere ye ne sun or re. Yefun yo maskwa ye ne mo sukibit gato ye ne ben ne o nde, Yefun yo nutbot o nde.

16Sane nin rek sukibit gato nin ben ne nai yu ete nin ki suk su Yefun wa yu subere Yefun ben nin ge kadit suki ne sor. Ye gato ben sukndo tepsu Yefun Allah mit, an do ki suk su Yefun it yo, Yefun Allah bere jam ete benbot suk gato an ndek ne.

17Elia anato yetu tepsu men, sarewo an ki suk su Yefun su an mit dik si an onyar dik, an kiwa Yefun ben nokro. Orge mo bur ne nogi yo mo nde sor kom mo tahun gri nap.

18Orete an ki suk su Yefun Allah ne o, an kiwa Yefun ben nogi, ete nogi satu, ete sugit kom ndo satu o re.

19Ji bi nji, ji bi nyanggon, nin deyo ges mo os ibit kadit Yefun bi os-i it yo, orete yetu ge dik yo ós wa kar an satu ma mo Yefun Allah bi os-i yo,

20nin napawa suk gato ji krom ré et. Ji krom sare do, ye to kar ye gato ges mo os ibit ne brek ma simo Yefun Allah bi os-i satu o it yo, bere ye ne ós ye gato ges mo os ibit ne subere an yo ges mo bot gesyos nde. Sane dom sukibit mwa gato an ben ne, Yefun Allah tot or kadit an re. Ndo mo nin sor, kadit Yakobus


  Share Facebook  |  Share Twitter

 <<  Yakobus 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel