Alkitab Mobile SABDA
[VER] : [ABUN]     [PL]  [PB] 
 <<  Yohanes 15 >> 

1Yefun Yesus ki do, "Ji dakai anato tepsu kwe anggur gato sangge. Ji bi Ai anato mewa nggwe anggur ne.

2Ji bi Ai tot kwe anggur guk gato yo bo mo nde ne wé. Ji bi Ai me i-guk gato bo mó yo, An mbron i-nat napyo wé, subere i-guk ne ndo wa bo mwa o.

3Nin jammo Ji bi sukdu gato Ji duno nin su ne, anato nin onyar kwo ndo re. Nin tepsu i-guk gato Ji bi Ai mbron i-nat napyo wé re.

4Nin ut krat mo Ji, sane bere Ji dom ut krat mo nin re. Kweguk sombok kadit i-muk ete kweguk ne ti dor yo, bere i-bo mo nde. Sane dom, nin yo ut krat mo Ji nde yo, bere nin yo nggiwa ben suk gato ndo mo nde.

5Ji anato tepsu kwe anggur ke, nin anato tepsu i-guk ne. Ye gato ut krat mo Ji tepsu dik, ete Ji waii ut krat mo ye ne yo, bere ye ne ben suk mwa gato ndo tepsu kweguk be. Nin wadigan kem dor kadit Ji yo, bere nin yo nggiwa ben suk yo mo nde.

6Ye to yo ut krat mo Ji tepsu dik nde yo, ye ne tepsu kweguk gato yé tot, ete yé am wé. Bere kweguk ne gu, ete yé sum wa yé gre mo bot wé.

7Nin ut krat mo Ji tepsu dik, ete Ji bi sukdu dom kem pe mo nin mit yo, suk to nin iwa nin ndek mo Ji bi Ai, bere An syo nai nin sor.

8Nin do ben suk mwa gato ndo, tepsu bo mwa gato kom yo, nin tepsu Ji bi pakon gato sangge, ete bere yé bes Ji bi Ai gum kok sye wai o mone re.

9Tepsu Ji bi Ai bi sukjimnut sye kas subot Ji, Ji waii bi sukjimnut sye kas subot nin. Sane nin misyar Ji nde, wo nin napawa do, Ji bi sukjimnut sye kas subot nin, ete nin ben nin bi suk-i tepsu sukjimnut ne.

10Nin benbot Ji bi sukduno-i yo, bere Ji bi sukjimnut sye kas subot nin mone petok sor. Sane dom, Ji benbot Ji bi Ai bi sukduno-i, sane An bi sukjimnut sye kas subot Ji mone petok sor.

11Ji ki sukdu mwa ne nai nin jam sino subere nin mit iwa, tepsu Ji mit iwa ne. Bere nin mit iwa wai o re, kwa yo gwet mo nde.

12Ji bi sukduno-i anare: Nin bi sukjimnut sye kas subot yu tepsu Ji bi sukjimnut sye kas subot nin et.

13Ye gato bi sukjimnut sye kas subot an bi yesyim sisu ndo wai anato ye gato bi an nggwa kwop wa bi yesyim ne.

14Nin benbot suk gato Ji syogat nin ben ne yo, nin tepsu Ji bi yesyim anane.

15Su ré Ji yo kendo nin gum pakwerut o nde, we pakwerut yo jam suk gato an bi yenggras ben ne nde. Wo Ji kendo nin tepsu Ji bi yesyim, we suk mwa ne sino gato Ji jam kadit Ji bi Ai ne Ji frot nai nin jam or re.

16Nin anato bes Ji gum Yekwesu wa nin nde, wo Ji anato bes nin gum pakon wa Ji. Ji bes nin, orete Ji syogat nin mu ben suk mwa gato ndo, tepsu kwebo bor mo kweguk. Ji syogat nin ben sukndo gato tepsu kwebo gato bere yo ibit nde, wo bo gato kem pe sor. Nin ben sukndo gato kem pe, sane bere suk to nin ndek mo Ji bi Ai, ete nin ki Ji gum mó yo, bere Ji bi Ai syo nai nin re.

17Ji bi sukduno-i anare: Nin bi sukjimnut sye kas subot yu et."

18"Yé mo bur ré do bariket nin yo, nin napawa do, yé mo bur ré bariket Ji nyim wé re.

19Nin si yetu mo bur ré bi sukjimnut-i tepsu dik yo, bere yé jimnotku nin, we nin bi sukjimnut-i tepsu yetu ne. Sarewo Ji nai nin kadit yetu bi de-i sok mo Ji bi de-i, sane nin bi sukjimnut-i si yetu bi sukjimnut-i yo tepsu dik o nde, sane anato yé mo bur ré bariket nin.

20Nin napawa Ji bi sukdu-i gato Ji ki nai nin ne do, 'Pakwerut yo sye wai kadit bi yenggras gato kon an nde.' Ye deyo ben sukye nai Ji it yo, bere yé ne ben sukye nai nin dom. Ye deyo benbot Ji bi sukduno-i yo, bere ye ne benbot nin bi sukduno-i dom.

21Bere yé ben sukye nai nin mo gato nin sok mo Ji bi rus-i, we yé ne jam nde Yefun gato syogat Ji ma mo bur ré.

22Ji ma duno án anato án jam suk gato siri kadit Yefun mit, ondesor sa, Yefun yo syo sukye nai án mo sukibit gato án ben ne nde. Sarewo, sangge Ji ma duno án it, sane án yo ku os wa án rewa suk gato án ben siri ne o nde.

23Ye gato bariket Ji yo, ye ne bariket Ji bi Ai dom.

24Ji ma ben suk gato ben án sino yeket ne ondesa, Yefun yo syo sukye nai án mo gato án bariwa Ji ne nde. Sarewo,sangge Ji ma ben suk gato yetu yo nggiwa ben nde, án da me suk gato Ji ben ne ware, án bariket Ji tó, án bariket Ji si Ji bi Ai sino.

25Wo suk gato án ben bor ne tepsu suk gato yé krom mo ye Yahudi bi sukduno-i sare do, 'Kapre Ji yo ben suk yo ibit mo nde, yé dakai bariket Ji sor.'

26Bere Ji bi Yefun Allah Gen gato ós nin muket os ndo ne ma kadit Ji bi Ai . Bere Yefun Allah Gen bok nggwa mo nin. Bere Yefun Allah Gen duno nin su sukduno gato sangge subot Yefun Allah sor, kwa gato An kidar yo mo nde. Sane Yefun Allah Gen do ma kadit Ji bi Ai it yo, bere An ki rer subot Ji nai nin jam dom.

27Bere nin waii ki rer subot Ji nai ye yi jam dom, we kadit ketke Ji si nin ben suk tepsu dik sino.


  Share Facebook  |  Share Twitter

 <<  Yohanes 15 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran