Alkitab Mobile SABDA
[VER] : [ABUN]     [PL]  [PB] 
 <<  Yohanes 3 >> 

1Yenggras dik yo, an gum do Nikodemus, an tepsu ye Yahudi bi yekwesu, an sok mo ye Farisi bi de-i.

2Noru dik yo an ma ku Yefun Yesus, ete an ki do, "Yeguru, men jam do Yefun Allah syogat Nan ma mo bur ré, we Yefun Allah do yo sisu Nan mo nde yo, Nan yo nggiwa ben suk gato kadum Yefun Allah bi suktinggi gato ben men yeket ne yo mo nde."

3Yefun Yesus ki do, "Suk gato Ji ki ré suksangge anare, ye kem su nan satu o yo, nan gum sok mo Yefun Allah bi rus-i it anane."

4Orete Nikodemus ki nai Yefun Yesus do, "Bei, men ka yenggras it, kapyo men bi im kem su men satu o e? Men sok satu mo men bi im ón, ete im kem su men satu o e?"

5Yefun Yesus ki do, "Suk gato Ji ki ré suksangge anare, men bi im kem su men yo, men sok mo men yetu bi rus-i it anane. Yefun Allah Gen kem su men o yo, men waii sok mo Yefun Allah bi rus-i o it anane.

6Yetu kem su men, men mbau mo bur ré sor re, wo Yefun Allah Gen kem su men yo, men da gesyos mbau to kapyo mato kapyo.

7Nin gen mo sukdu gato Ji ki ré nde: nin yetu tepsu pa gato ye kem su o et.

8Nofuf kas muya-muma. Men jam nofuf kas tok kwe, sane nofuf uk sa, men jam, wo men jam pe gato nofuf kas ma kadit ne nde re. Men jam pe gato nofuf kas mu mo ne dom nde. Sane dom, tepsu ye gato Yefun Allah Gen kem su ne, men jam nde suk gato Yefun Allah Gen ben anato An kem su ye ne."

9Nikodemus ndo mo Yefun Yesus do, "Yefun Allah Gen kem su nje sa u ne?"

10Yefun Yesus ki do, "Nan anato yeguru mo Israel, sane suma ben anato nan jam nde suk gare ne?

11Suk gato Ji ki ré suksangge anare, men ki subot suk gato men jam, men ki subot suk gato men dakai me su men gro nai nin jam, sarewo nin bariwa nin jammo men bi sukdu-i.

12Ji ki sukdu subot suk mwa mo bur ré nai nin jam ware, nin yo jam mo suk gato Ji ki ne nde. Sane Ji ki sukdu subot suk mwa mo gu nim ne yo, bere nin jambot Ji bi sukdu-i ne sa u ne? Bere yo mo nde!

13Yetu yo it mu mo gu nim yo mo nde. Wo Yetu bi Pa to Ji ré sa, Ji is kadit gu ma mo bur ré re.

14Bere ye bes Ji gum kok wa Ji ós nje tepsu Musa syut kwis dik yo gato ye ut su kuningan ne ti kok mo pe gato kwe yo mo nde. Sane kwis gu ye yo, ete an sokme kwis kuningan ne yo, an yo kwop nde.

15Sane dom yé bes Ji gum kok, subere ye gato onyar kem mo Ji yo, ye ne kem ndo to kapyo mato kapyo."

16Yefun Allah bi sukjimnut sye kas subot men yetu mo bur ré ndo nde anato An syo An bi Gan ge dik ne ma. An bi Gan ne ma wa kwop win men mo sukibit gato men ben ne, subere ye to onyar kem mo An bi Gan yo, bere ye ne yo ges mo bot gesyos nde, wo ye ne si Yefun Allah kem ndo to kapyo mato kapyo.

17We Yefun Allah yo bi An bi Gan ma mo bur ré wa syo sukye nai men mo bot gesyos nde, wo An bi An bi Gan ma mo bur ré wa An ós men yetu kem ndo to kapyo mato kapyo.

18Ye to onyar kem mo An bi Gan yo, ye ne yo ku sukye mo bot gesyos nde. Sarewo ye to yo onyar kem mo An bi Gan nde yo, ye ne gum sok mo ye gato bere ges mo bot gesyos it, we ye ne yo onyar kem mo Yefun Allah bi Gan ge dik ne nde.

19Yefun Allah nutbot or re. Ye yi yo iswen An mone o nde. Yefun Allah bi sukdu gato sangge ma mo bur ré re. An bi sukdu ne tepsu rer gato ku nje mo bur ré. Sarewo yetu iwa ndendu bi suk-i wai kadit rer bi suk-i, we yetu ben bi suk-i ibit wai o re.

20Ye to ben sukibit bariwa rer ku an. An bariwa an simo rer bi suk-i ne, we rer ku an it yo, sukibit gato an ben ne bere bor wa yé mwa jam.

21Wo ye to ben suk gato ndo yo, an iwa simo rer bi suk-i, subere rer ku an, ete yé mwa jam do suk mwa gato an ben ne, an ben tepsu Yefun Allah mit.

22Orete Yefun Yesus si An bi pakon mu mo bur Yudea. An si pakon ne kem nam gan mone. Yefun Yesus si bi pakon ras nje mo syur mone.

23Yohanes dom, ras nje mo syur, mo pe gato gum do Ainon, karowa Salim, we mo nat ne syur mwa. Yé mwa ma mo Yohanes wa an ras nje mo syur.

24Tomgane, yé yo sok Yohanes mo penjara nde tó.

25Yohanes bi pakon deyo duwer ye Yahudi ge dik yo subot ye Yahudi bi agama. Ye ne ki do, ye Yahudi yo de syur nde, án fowa sok ari, wo pakon ne bi sukjimnut-i tara re.

26Orete Yohanes bi pakon ne ma mo Yohanes, án ki nai Yohanes do, "Yeguru, nan napawa tomgato nyim, Yetu ge dik yo sisu nan mo Syur Yordan tak de nim. Nan ki sukdu subot An rer nai men jam re, wo su ré An dom ras nje mo syur, ete yé mwa ne sino mu kadit men mu mo An re."

27Yohanes ki do, "Suk yo o nde, Yefun Allah syo nje nai men, ondesa men ku nje yo mo nde.

28Nin dakai jam suk gato ji ki mó re, sane bere nin ki rer nai ye yi jam do, 'Ji anato Kristus nde. Yefun Allah yo syogat ji ma mo bur ré wa nai men yetu kadit sukye ete jowa yetu nde. Wo Yefun Allah syogat ji ma nyim, orete Kristus ma wari.'

29Tepsu gato men kra yo, nggon gato ma ne anato yebris ne bi nggon anane it. Yebris bi yesyim gato sisu an mone, yesyim ne jam nggon ne ma yo, an si bi yesyim ne sino mit iwa wai o re. Sane dom ji jam do, Kristus ma ne yo, ji dom mit iwa wai o re.

30Su ré, yé mwa bes An gum kok sye wai kadit nyim ne o re, wo ji ete ye yo bes ji gum kok saga nyim ne o nde anare.

31Ye gato ma kadit gu nim, An gum anato kok wai kadit yé mwa ne sino. Yetu gato ye bes gum kok mo bur ré yo, ye ne sok tó yé mwa mo bur ré sino. Ye ne ki subot suk mo bur ré sor re, wo Ye gato ma kadit gu, An gum kok sye wai o re.

32An ki rer subot suk gato An me mo gu nim ne re. An ki rer subot suk gato an jam re, wo yé yo onyar kem mo suk gato An ki ne nde.

33Sarewo ye gato onyar kem mo sukdu gato An ki ne yo, ye ne nai sukjimnut do, Yefun Allah sangge it.

34We, Ye gato Yefun Allah syogat ma mo bur ré, Yefun Allah syo Yefun Gen bok nggwa mo An, Yefun Gen bi suktinggi ne pe gato or mó yo mo nde . Sane Yefun Allah bi Gan ki Yefun Allah dakai bi sukdu-i ne rer wa men jam sor.

35Men bi Ai, Yefun Allah jimnotku An bi Gan, ete An syo suk mwa mo An bi Gan syim wa An bi Gan jom sino.

36Ye to onyar kem mo Yefun Allah bi Gan yo, ye ne mbau to kapyo mato kapyo, wo ye to misyar An bi Gan ne yo, bere ye ne yo kem ndo mo nde, wo ye ne ku sukye mo Yefun Allah bi sukmaskwa ne sor to kapyo mato kapyo."


  Share Facebook  |  Share Twitter

 <<  Yohanes 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran