Alkitab Mobile SABDA
[VER] : [ABUN]     [PL]  [PB] 
 <<  Yohanes 8 >> 

1Wo Yefun Yesus mu mo banbo gato gum do Zaitun, mo banbo ne kwe zaitun mwa mó.

2Bi ik sidu, Yefun Yesus satu mo Yefun Allah bi nu de mo ros de mit. Yé mwa ma sum mone. Sane Yefun Yesus kem, ete An duno yé mwa mone.

3Yeguru gato duno ye Yahudi su bi sukduno-i si ye Farisi gwat nggon ge dik yo ma. Nggon ne ben siri. Sugane yé ku rek nggon ne, ete yé gwat nggon ne ma. Án syogat nggon ne ti mo yé mwa gwem.

4Yeguru si ye Farisi ne ki nai Yefun Yesus do, "Nggon ré ben siri, ete men ku rek mom.

5Musa bi sukduno-i duno men do, men am nggon gato ben siri sane su jok sor mom kwop wé sor. Su ré Nan nutbot nggon ré sa u ne?"

6Yeguru si ye Farisi ndo oror Yefun Yesus. Yeguru si ye Farisi meret os subere án ku os wa án ndak Yefun Yesus mo bi yekwesu gwem, subere yekwesu ne ben sukye yo nai Yefun. Sarewo Yefun Yesus ka, ete An krom suk mo bur su An sopkwa.

7Yeguru si ye Farisi ne ndogat Yefun Yesus saresa, Yefun ti ma nim ete ki nai án do, "Nin yé bok gare, dogato ben suk gato ibit yo mo nde yo, ye ne ete am nggon ré su jok nyim et."

8Or o Yefun Yesus ka mu bur, An krom suk yo mo bur o.

9Yé mwa mone jam Yefun Yesus bi sukdu-i ne, orete an kadik-kadik mu kadit nat ne. Dogato ka yenggras mu nyim, or o doyi ne mu sane sor, Yefun Yesus wadigan si nggon gane ti mone tó.

10Or o Yefun Yesus ti ma nim, ete An ndo mo nggon ne do, "Yé mwa gado ne mu mo u ne? Ye gato kiwa men am nan su jok mó tó bado?"

11Nggon ne ki do, "Yenggras, yo mo nde." Yefun Yesus ki do, "Sane yo, Ji yo syo sukye nai nan dom nde. Su ré yo, nan mu sor. Nan ben suk gato ibit o nde."]

12Yefun Yesus ki nai yé mwa mone o do, "Ji dakai anato tepsu sukru gato rer ku nje mo bur ré. Ye gato simo Ji it yo, an yo mu su ndendu o nde, wo rer ku ye ne anato an kem ndo."

13Sane ye Farisi duwer Yefun Yesus do, "Nan dakai ki sukdu subot Nan dakai sor re, sane men bariwa Nan bi sukdu-i, wo ye yi yo ki sukdu subot suk gato Nan ben ne sa, bere men nut do, sukdu ne sangge re."

14Yefun Yesus ki nai án do, "Kapre Ji ki sukdu rer subot Ji dakai, sukdu gato Ji ki ne sangge, we Ji jam pe gato Ji ma kadit ne si Ji jam pe gato Ji mu mone dom. Sarewo nin jam nde pe gato Ji ma kadit ne. Sane dom nin jam nde pe gato Ji mu mone.

15Nin ndobot nje yo, nin nai sukjimnut tepsu yetu nai bi sukjimnut-i, wo Ji yo nai Ji bi sukjimnut-i sane nde,

16Ji nai Ji bi sukjimnut-i tepsu Yefun Allah nai bi sukjimnut-i. Sane sukdu gato Ji ki ne sangge, we Ji wadigan ki sukdu ne nde re, wo Ji bi Ai gato syogat Ji ma more, An sisu Ji pe, anato Ji ki An bi sukdu-i ne.

17Mo nin bi sukduno, Musa krom do: sukdu gato yetu ge we dakai me su án gro ete ki tepsu yu it yo, sukdu ne sangge it anane.

18Sane Ye gato ki sukdu subot Ji ré anato Ji dakai. Ji bi Ai gato syogat Ji ma more, An dom ki sukdu subot Ji tepsu Ji ki ne. Ji si Ji bi Ai ki sukdu tepsu yu, sane sukdu ne sangge it."

19Sane ye Farisi ne ndo mo Yefun Yesus do, "Nan bi Ai mo u ne?" Yefun Yesus ki do, "Nin jam nde Ji re. Nin jam nde Ji bi Ai dom re. Nin jam Ji su sangge it yo, nin jam Ji bi Ai dom it anane."

20Yefun Yesus duno nje su sukduno ne mo Yefun Allah bi nu karowa pe gato ye grem peti wa yé bok sugum wa ye som Yefun Allah su mone. Sarewo yé yo but Yefun Yesus nde tó, we An gen syu tó. Kam gato Yefun Allah fro wa ye but An yo bor nde tó.

21Yefun Yesus ki nai ye Yahudi bi yepasye ne do, "Bere Ji mu kadit nin. Bere nin syeret Ji ware, nin yo ku Ji nde, wo bere nin kwop mo sukibit gato nin ben ne. Bere nin yo mu kom mo pe gato Ji mu mone nde."

22Sane yepasye ne ki nai yu do, "Ye gare gu An nggwa kwop bayok anato An ki do, 'Bere nin yo mu kom mo pe gato Ji mu mone nde.' "

23Orete Yefun Yesus ki nai án do, "Nin ma kadit bur ré. Ji ma kadit gu nim. Nin bi ke mo bur ré. Ji bi ke mo bur ré nde.

24Sane anato Ji ki nai nin do, bere nin kwop mo sukibit gato nin ben ne. Nin bariwa sukdu gato Ji ki subot Ji dakai do, 'Ji anato Ye gato gesyos, gato Yefun Allah syogat ma mo bur ré' yo, bere nin kwop mo sukibit gato nin ben ne re."

25Án ndo mo Yefun Yesus do, "Je u gei anato Nan ne?" Yefun Yesus ki nai án do, "Ji ki sukdu subot Ji dakai nai nin jam nap bok yo mó it.

26Bere Ji ki nin gum ibit mo suk mwa neya mone tó. Sarewo Ji yo ki kom mone nde, wo Ji ki sukdu gato Yefun Allah syogat Ji ki ne. Yefun Allah gato syogat Ji ma more, An ben An bi suk-i ri roi. Sane sukdu gato An tarubot Ji ne sor anato Ji frot nai yé mwa mo bur ré re."

27Yefun Yesus ki subot An bi Ai, Yefun Allah, sarewo ye Yahudi bi yepasye ne jam nde re.

28Sane Yefun Yesus ki nai án do, "Nin bes Yetu bi Pa to Ji ré kok mo kwesukwin yo, bere nin jam do, 'Ji anato Ye gato gesyos, gato Yefun Allah syogat ma mo bur ré.' Bere nin jam do, Ji dakai yo nai sukjimnut wa ben suk yo mo nde, wo Ji ki Ji bi sukdu-i tepsu suk gato Ji bi Ai duno Ji su ne sor.

29Ji bi Ai gato syogat Ji ma mo bur ré, An anato sisu Ji pe. An yo misyar Ji wadigan kem nde, we Ji ben suk tepsu An mit petok sor."

30Yefun Yesus ki sukdu mwa ne saresa, yé mwa mone nai sukjimnut wa án onyar kem mo Yefun Yesus it.

31Orete Yefun Yesus ki nai ye Yahudi gato onyar kem mo An do, "Nin benbot Ji bi sukduno-i petok it yo, nin anato tepsu Ji bi pakon gato sangge it anane.

32Sane yo, bere nin jam Yefun Allah bi sukduno-i gato sangge, ete sukduno gato sangge ne bere sombok nin subere nin gum pakwerut o nde."

33Ye Yahudi ne ki nai Yefun Yesus do, "Men bi amui mo Abraham. Ye yo jom men tepsu pakwerut yo mo nde. Sane Nan ki do, 'Sukduno ne sombok men subere men gum pakwerut o nde,' ne te, bi sukjimnut sa u ne?"

34Yefun Yesus ki nai án do, "Suk gato Ji ki ré suksangge anare, ye to ben sukibit yo, ye ne gum pakwerut wa sukibit gato an ben ne.

35Ye gato gum pakwerut yo sok pe mo an bi yenggras bi rus-i nde, wo yenggras ne dakai bi pa sa, sok mo yenggras bi rus-i to kapyo mato kapyo.

36Sane Ji, gato Yefun Allah bi Gan do sombok nin wé kadit sukibit gato jom nin yo, sangge it, nin gum pakwerut o nde. Nin gum sok pe mo Ji bi Ai bi rus-i it anane.

37Ji jam do, nin anato Abraham bi dat. Sarewo nin syeret os wa nin gu Ji kwop wé, we nin bariwa nin jammo Ji bi sukdu-i.

38Suk mwa gato Ji bi Ai kadum nai Ji ne, Ji ki nai nin jam, sarewo nin ben suk gato nin bi ai duno nin su ne."

39Ye Yahudi ne ki nai Yefun Yesus do, "Men bi ai anato Abraham." Yefun Yesus ki do, "Nin anato Abraham bi pa sisu sangge it yo, bere nin ben nin bi suk-i tepsu Abraham ben an bi suk-i ne.

40Ji anato ki sukdu gato sangge gato Yefun Allah tarubot Ji wa nin, sarewo nin meret os wa nin gu Ji kwop wé. Abraham yo ben an bi suk-i sane nde. Sane nin bi ai mo Abraham nde.

41Wo nin ben nin bi suk-i tepsu nin dakai bi ai-i ben ne." Yé ne ki do, "Men ré pa jan nde. Men bi ai ka dik sor, An anato Yefun Allah dakai."

42Orete Yefun Yesus ki nai yé ne do, "Yefun Allah anato nin bi Ai it yo, bere nin jimnotku Ji, we Ji ma kadit Yefun Allah re. Ji dakai nai sukjimnut wa Ji ma nde, wo Yefun Allah anato syogat Ji ma mo bur ré.

43Suma ben anato nin jam nde suk gato Ji ki ré ne? Nin brek nin dabe wé kadit Ji bi sukdu-i anato nin yo jam kom mo mit nde.

44Nin bi ai anato biris bi yekwesu. Nin iwa nin ben suk tepsu nin bi ai mit sor. Kadit ketke it, nin bi ai ne anato gu nje kwop. Nin bi ai bariwa suk gato sangge sino, we mo an mit suk gato sangge yo mo nde. Biris bi yekwesu ne do kidar suk yo, an ki an bi sukdu-i sagana anane, we an anato kidar suk nggi. Sukkidar mwa ne sino bi i-ke mo biris bi yekwesu re.

45Sarewo Ji ré, Ji ki suk gato sangge su nin anato nin bariwa Ji bi sukdu-i ne.

46Nin deyo me Ji ben sukibit mó bado? Nin ki nin bi sukdu-i ma et. Wo Ji do ki Ji bi sukdu-i ne sangge nai nin it yo, suma ben anato nin bariwa nin jammo Ji bi sukdu-i ne?

47Ye gato bi Ai mo Yefun Allah, bere ye ne jammo Yefun Allah bi sukdu-i re. Sarewo nin bi ai mo Yefun Allah nde, sane anato nin bariwa nin jammo Ji bi sukdu-i."

48Ye Yahudi mone ki nai Yefun Yesus do, "Nan anato ye Samaria gato semda ben ne, sangge fe!"

49Yefun Yesus ki do, "Semda yo ben Ji nde. Ji bes Ji bi Ai gum kok, sarewo nin kabor Ji gum.

50Ji dakai yo werwa bes Ji gum kok wa yé un Ji nde, wo Yefun Allah sor ete werwa bes Ji gum kok, ete An anato ndobot nje, suk gato An ki kwop mone it.

51Suk gato Ji ki ré suksangge anare, ye to jammo Ji bi sukduno-i ete benbot yo, ye ne yo kwop nde, wo bere an mbau to kapyo mato kapyo."

52Orete ye Yahudi mone ki nai Yefun Yesus do, "Su ré sa, men jam Nan it. Sangge, semda ben Nan anare it. Abraham kwop re, yenabi bok ne sino kwop or re. Sarewo Nan ki do, ye to jammo Nan bi sukduno-i yo, yo kwop nde.

53Abraham kwop re. Yenabi sino dom kwop re. Nan gare anato tepsu je u ne? Nan nut do, Nan gum kok sye wai kadit men bi ai Abraham bado?"

54Yefun Yesus ki do, "Ji dakai bes Ji gum kok sye wai yo, bere je u anato jammo Ji bi sukdu-i ne? Yo mo nde. Bere ye misyar or re. Sarewo Ji bi Ai anato bes Ji gum kok sye wai o re. Nin ki do, Ji bi Ai anato tepsu nin bi Yekwesu gato jom nin,

55wo nin jam An nde re. Sarewo Ji dakai sa, Ji jam An re. Ji do ki do Ji jam nde An yo, Ji kidar suk tepsu nin kidar suk ne. Wo Ji jam An re, Ji benbot An bi sukdu-i.

56Nin bi ai Abraham nutbot kam gato Ji ma kem mo bur ré sa, an mit iwa wai o re. Ben sato an me Ji ma mo bur ré, sane an mit iwa wai o re."

57Sane Ye Yahudi ki nai Yefun Yesus do, "Nan pa kamekre, Nan yo ka yenggras nde tó, ete Nan ki do, Nan ku Abraham mó re."

58Yefun Yesus ki nai yé ne do, "Suk gato Ji ki ré suksangge anare, Abraham bi im yo pe an nde tó, Ji mó re."

59Orete ye Yahudi maskwa Yefun Yesus mo An bi sukdu-i ne, we Yefun Yesus bes An gum kok tepsu Yefun Allah gato gesyos ne. Sane ye Yahudi nai jok wa yé am Yefun Yesus su. Sarewo Yefun Yesus gurik dik kadit yé ne, ete An mu kadit Yefun Allah bi nu re.


  Share Facebook  |  Share Twitter

 <<  Yohanes 8 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran