Dual Panel1Ponna ke ahai kaha-kaha ang pahallu dipahehsa, ya' akana la umbahae dio pano di to pambohtu kaha-kaha ang dai mampetahpa' pano di Puang Yesus? Akana daia' umbaha pano di solamu to mampetahpa' ang la mala mambohtu?
2Darakaa' dio ungnginsang, solasohong, la sule tempona ang la taongeia', kita' ang napasenga' Puang Alataala mendahi petauanna, la umpahehsa ihsinna lino. Dahi ke la umpahehsakoa' ihsinna lino dako', ya' inang la malakoa' umbohtu kaha-kahanna solamu dinoa.
3Daia' ungnginsang, kita' to mampetahpa' la umpahehsa malaeka'. Dahi inang la malakoa' umbohtu kaha-kahanna solamu yaling inde di lino.
4Ponna ke ahai kasibehta-behtaang di alla'-alla'mu, ya' aka boi anna umpadiolonai to pambohtu kaha-kaha ang tadia santosahaninta, ang dai aha kakuasaanna yaling di jumaa'?
5Nasuhung anna ma'tula'ä' noa indee anna malakoa' masili. Darakae' aha moi poro mesa di alla'-alla'mu ang la mala umbohtu kaha-kahanna solamu yaling di jumaa'?
6Dahi akana bilang ahae' nei' to mampetahpa' ang unsalla solana to mampetahpa' di hao di olona tau ang dai mampetahpa'?
7Dinoa daia' pahallu tapihki' yato tau ang umbaha kaha-kahanna pano di tau di aneang. Moi ke la ahai kaha-kaha di alla'-alla'mu, ya' ahana inang sundummi mepakasilinna. Anna tandaammi dioatee dakoa' membabe ang sihatang to pentindo'na Puang Yesus. Ponna ke ahai ang mambulitu'koa' bahtu' unghukiangkoa', ya' pabeii napanoa. Daa umbahai pano di to pambohtu kaha-kaha; dotanne' nabulitu'koa'.
8Ampo' bilang diorea' dio ang unghukiang anna umbulitu'koa' moi solamu to mampetahpa'.
9Darakaa' dio ungnginsang, solasohong, ungngoatee tau ang si membabe tasampa' dai la mentama di Kapahentaanna Puang Alataala? Daumpabei kalaemua' nabulitu' setang. Aka' tau ang si membabe tasampa', tau ang umpenombai tau-tau, tau ang si ungngindä'-indä' pa'bannetauang, noa tunne' muane ang umpobahine sammuanena anna bahine ang umpomuane sambahinena,
10to paboko, to so'bäng karake, to pa'malango-lango, tau ang si untändo solana, to pa'bulitu', ingkänna tau ang noa dai la mendahi petauanna Puang Alataala yaling di Kapahentaanna.
11Naonge dolui ahakoa' ang sinnoa inde mai tau, ampo' dinoa dosammu puhang nabasei Puang Alataala sibaha naangka'koa' maroho di olona lambi' mendahimokoa' petauanna. Napanoa Puang Alataala aka' kasikenteammua' sibaha Puang Yesus Kristus ungngolai kakuasaanna Inaha Maserona.
12Aha ang si mangngoatee, "Aka' nalahpa'ingkea' di hao mai di tahungkunna dosanta, ya' malaingkea' umbabe moi aka." Moinnakato anna tahpa'i yatoo, ampo' kutimba' kuoatee: Ponna ke tababe moi aka, ya' la aha ang tababe ang dai la mahasa pano di kalaeta. Bahtu' dioatee: Mala kubabe ang kuelo'i, ampo' dai kuaku la naposabua'ä' yato ang kubabe.
13Si ungngoaa'tee, "Aha andeang ang la mala dipatama di kompeng; aha kompeng ang la dipampatamai andeang," lambi' si umpihki' ungngoatee, "Mala tababe moi aka, aka' di allo-allo ang la sule la napa'dai asang ingkänna yatoo Puang Alataala." Unsanga si'darakaa' dio ungngoatee dai maaka yato ang tababe yaling di bätäng kalaeta? Unsangarakaa'to Puang Alataala nabeakoa' bätäng kalae anna malai umpake membabe ang tasampa' sibaha bahine ang tadia bahinemu? Napapia Dehata bätäng kalaeta anna malaingkea' umpasundung pangngelo'na, aka' dianto Kalaena ang napapiaing.
14Anna inde bätäng kalaeta la napatuho sumule Puang Alataala ungngolai kakuasaanna, sinnoa puha umpatuho sumule Dehatanta.
15Darakaa' dio ungnginsang, solasohong, ungngoatee bätäng kalaemua' dianto baheang bätäng kalaena Kristus? Dahi la mahasaraka ke tapakei inde bätäng kalaeta, ang naampui Kristus, yaling membabe ang tasampa' sibaha mesa pahsundala'? Inang dai!
16Darakaa' dio ungnginsang ungngoatee tau ang sibaha pahsundala' mendahi mesa sibaha? Aka' aha tiuki' yaling di Suha' Masero naoatee, "To sipobahine mendahi mesa."
17Ampo' tau ang sikente Dehata mendahi mesa inaha sibaha.
18Pakahaoi pembabe tasampa', solasohong! Aka' dai aha dosa senga' ang ungkarakei katuhoanta ang noa inde pembabe tasampa'. Aka' ke ungngindä'-indä'o pa'bannetauang, ya' dianto yato dosa pano di bätäng kalaemu.
19Darakaa' dio ungnginsang, solasohong, ungngoatee bätäng kalaemu dianto mesa dasanna Inaha Masero ang tohho yaling di inahammu? Inde Inaha Masero, Kalaena Puang Alataala mambeakoa'. Dakoa' ungngampui katuhoang kalaemu,
20ampo' naallikoa' Puang Alataala masuli'. Dianto anna pahallukoa' umbabe ang sihatang yaling di bätäng kalaemu ang la umpakeangka' Puang Alataala.