Dual Panel1Dahi aka' makarohheng liumang, ya' kibohtung la tohhoang kami' deruaang ta Silas di hao di Atena
2anna kisuoine' mating solasohonta, ta Timotius. Diantoo solaki' mengkähäng naposabua' Puang Alataala umpepainsangnging Kaheba Mapia didiona Kristus. Kisuo mating napellambi'ikoa' anna malai napakatoto'koa' anna napakaenga' lambi' tontong loloa' kapampetahpa'ammu pano di Kristus
3andana ahakoa' tuhtuang malamma kapampetahpa'ammu aka' inde mai kamadahhaang. Ungnginsang siangnga' ungngoatee inang puha napama'tantu Puang Alataala la nahoaingkea' yato kaha-kaha
4aka' si kitula' siamingkoa' yato anna sibahakingke kioatee la ullambi'ingkea'too kamadahhaang. Anna ungnginsammia' ungngoatee inang tasa'ding si'dang noa yato tula'ki'.
5Dianto anna kusuong ta Timotius mating aka' dai hapa' inahangku umpihki' didiona umbang noa kapampetahpa'ammua', aka' malaya'ä' nahoa arangkoa' pesändä'na Pongkahana setang lambi' labu' kaleng kähängki'.
6Ampo' mane lambi' sule ta Timotius natula'ingkang Kaheba Mapia didiona kapampetahpa'ammua' anna pa'kalemummua'. Natula' toi naoatee si ungkalehai loloang anna pemalakoa' la silambi'ingke, ya' noa sia tung kami'.
7Dianto anna ingkämmua' solasohongki', yaling di kamasuhsaang anna kamadahhaangki' kahsiang anna matoho inahangki' sumule aka' kiinsang kioatee tontong lolo kapampetahpa'ammua'.
8Ya' dinoa matohong sumule inahangki' aka' tontong loloa' kapampetahpa'ammu dai' di Dehata.
9Dai aha mallondoi pa'kuhhu'sumanga'angki' dai' di olona Puang Alataala aka' unsa'dingngang kapenau-nauang di hao di olona aka' kapampetahpa'ammua'.
10Allo bengi ma'sambayang loloang kipetatooi, kipalau umba ke malai silambi' bouingkea' anna kipaturu boukoa' yato ang la pahalluke' ungnginsang anna malai tuhtuang matoto' kapampetahpa'ammua'.
11Umbato ke malai Kalaena Ambeta Puang Alataala sibaha Dehatantaa' Puang Yesus la umpakahaoingkang ingkänna ang la mekalapai anna malaang mating kipellambi'ikoa'.
12Kihannuang Dehata la umpapunnoikoa' pa'kalemu anna tuhtuangkoa' sikalemui mesa anna mesa, noa toe' ma'kalemu pano di ingkänna tau senga' umba kipanoa kikalemuikoa'.
13Ke noai yatoo mala napakatoto' inahammua' Dehata lambi' dakoa' kekasalaang ampo' la maserokoa' di hao di olona Ambeta Puang Alataala ke suleng Dehatantaa' Puang Yesus sibaha ingkänna to maserona.