Alkitab Mobile SABDA
[VER] : [ARALLE]     [PL]  [PB] 
 <<  1 Timotius 2 >> 

1Ang handang pahallu liu kupalau dianto ke la malai anna dipa'sambayangnging ingkänna tau, dipehumala'ing sibaha ma'kuhhu'sumanga' dai' di Dehata.

2Pahallu tapa'sambayangnging tomaraya, to ma'pahenta anna to ma'kuasa senga' anna malai tau tuho malino anna masahke untuhu'i pa'elo'na Puang Alataala sitonda pembabe ang la sihatang dipakeangka'.

3Noanto inde ang mapia anna umpamasannang Puang Alataala To pepasalama'ta,

4aka' inang pemala anna malai ingkänna tau ungnginsang katahpa'ang lambi' dipasalama'.

5Aka' mesa supu Dehatanna ingkänna hupatau anna mesa toi supu ang la mala umbahanang hupatau dai' di olona, diantoo Kristus Yesus ang mentolino.

6Dianto ang umbeho Kalaena unsulängngi hupatau. Di tempo ang napama'tantu kainsangammi dioate pemala Puang Alataala umpasalama' ingkänna hupatau.

7Dianto indee suhunna anna disuomä' pano di tau ang tadia to Yahudi anna malai sika kupainsangngi didiona Kaheba Mapia sibaha kupakuhu didiona kapampetahpa'ang ang si'danna. Ingkänna indee tahpa'etee'; dä' loseng.

8Kupemala anna malai ingkänna muane di umba-umba naonge yaling di jumaa' ma'sambayang sitonda kamaseroang, dai pa'keaha'ang bahtu' sibehta-behta.

9Kupemala toi anna malai ingkänna bahine yaling di jumaa' mampake biasa tomande' ang makanang, daine' mala ang masu'li', sinnoanna: umpake bulahang, mutiara, beluhä' ang kebelo-belo anna senga'nake' ang la mendahi supu pennenne'ang.

10Ampo' pahallu nei' mengkero mapia ang la mampamahasa diita, situhu' ang inang sihatang nababe bahine ang unsanga kalaena bansa' ma'sambayang dai' di Puang Alataala.

11Pahallu bahine mellaya' anna ma'pehingngi manahpa supu sibaha mahempo' inaha yaling di jumaa'.

12Dai kupabei la mampakuhu anna datoi la kupabei umpahenta muane. Pahallu la mahtang.

13Aka' ang handang dolu napadahi Puang Alataala dianto Adam, mane Hawai.

14Noa tung nei' tadia Adam ang nabulitu' Pongkahana setang, ampo' yato bahine, lambi' untehkai pahentana Puang Alataala.

15Ampo' moinnakato anna la masuhsa liui di tempona keänä', mala toi salama' ahsala' tontongngi mampetahpa', ungkalemui para-paranna hupatau, masero anna makanang di olona Puang Alataala.


  Share Facebook  |  Share Twitter

 <<  1 Timotius 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel