Alkitab Mobile SABDA
[VER] : [ARALLE]     [PL]  [PB] 
 <<  1 Timotius 3 >> 

1Tula' indee tahpa' si'da-si'da dianto: Tau ang pemala mendahi pebulle ada' ang kähänganna undakai jumaa', dianto disanga pemala pengkähängang ang mapia.

2Dahi pahallu dai kekasalaang, noanna: mesa supu bahinena, nainsang undakai kalaena, matahhing inaha, keaka', untahimbo mapia to sulena, mala mampakuhu,

3dai ma'malango-lango, dai pa'keaha'ang ampo' malunä', dai mala ma'siba'di anna dai mailu di doi'.

4Pahallu nainsang ungngäto' manahpa sanghapunna anna umpaturu änä'na anna malai tuhu'-tuhu'ang sibaha keangka'.

5Aka' ponna ke dai ungnginsang ungngäto' hapunna, ya' umbanne' la napanoa ungngäto' jumaa'?

6Daine' mala tau ang mane tama Sahani mendahi pebulle ada' ang kähänganna undakai jumaa', aka' umbai la malängkä' inaha lambi' manaho sinnoa ang dahi pano di Pongkahana setang naonge malängkä' inahai di olona Puang Alataala dolu.

7Ampo' pahallu tau ang mapia sanganna di alla'na hupatau, moi ang dai Sahani, andana nasangai: 'to karake' ang la mala napampolalangngi Pongkahana setang umpetaha-tahai to Sahani.

8Noa tunne' pano di tau ang pemala mendahi pebulle ada' ang kähänganna undului jumaa'. Pahallu mapia sanganna aka' pembabena noanna: tadia to kalasi, dai ma'malango-lango, dai ungkailui maho doi'.

9Pahallu bahahsi inahanna anna mampetahpa' si'da-si'da pano di pepakuhu ang tahpa' ang puha napalanda' Puang Alataala.

10Pahallu dipahehsa dolu mane malai dipille mendahi to undului jumaa' ke malesong dai kekasalaang.

11Pihsananna bahinena to undului jumaa' pahallu toi mapia sanganna aka' pembabena noanna: dai kekara-kara bu'bu', nainsang undakai kalaena, anna mala dipetahpa' yaling di ingkänna siamo.

12Anna yato to undului jumaa' pahallu toi mesa supu bahinena anna nainsang ungngäto' mapia sanghapunna.

13Ingkänna ang umpembabe si'da-si'daing kähänganna yaling di jumaa' la mapia sanganna anna la tuhtuang bahani untula' kapampetahpa'ang yaling di Kristus Yesus.

14Pahtuyungku la mating siamä' kupellambi'io, ampo' moinnakato noa, mapia puhane' ke kupapebahaingko inde suha' dolu.

15Dahi monna ke dä' baha' lambi', ya' la ungnginsammi umba noa ke tuhoi tau ma'solasohong yaling di jumaa'na Puang Alataala ang tontong aha. Aka' jumaa'rang ang umpamatoto'i anna undakai katahpa'ang didiona Puang Alataala, sinnoa ahhi anna busung.

16Inang mahasanna pepakuhu ang la mebahanang untuhu'i pa'elo'na Puang Alataala. Dolu dai kainsangang, ampo' dinoa napalanda'mi Puang Alataala. Aka' pepakuhu ang tapetahpa' dianto: Puang Yesus Kristus ang menghupatau, ang napakaleso Inaha Masero naoate Dianto ang tahpa', ang nasa'bii malaeka'. Dipopepainsangnging kahebana di umba-umba naonge yaling di lino, lambi' napetahpa' mai'di tau. Anna tiängkä' dai' di suruka yaling di kamatandeang.


  Share Facebook  |  Share Twitter

 <<  1 Timotius 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran