Dual Panel1Inang puha natula' Inaha Masero la aha sangngaka-sangngaka tau umbahoi pepakuhu ang tahpa' di allo ang la sule. La sika untuhu'i puhane' to pampasähsä' lalang anna untindo'i pepakuhunna setang.
2Pepakuhu ang noa napopepainsangnging to kalasi ang si ma'loseng-loseng lolo, nasuhung inahanna dang nainsang umpasisenga' ang mapia anna ang tahuhu.
3Si ullahang tau kabeng; si ullahang tau ungngande andeang ang dipemalii, moinnakato anna napadahii Puang Alataala anna malai naande anna nakuhhu'sumanga'i tau ang mampetahpa' anna ungnginsang katahpa'ang.
4Aka' ingkänna ang napadahi Puang Alataala mapia asang. Dai aha poro la mesa ang la dipemalii ke ditahimboi sibaha ma'kuhhu'sumanga',
5aka' ingkänna yatoo puha napamasero Bahtakara Dehata anna sambayang.
6Ponna ke umpopepakuhui inde pano di pa'solasohongang yaling di kapampetahpa'ang, ya' mendahimotoo sabua'na Kristus Yesus ang mapia anna la umpamatoho inahammu umpake Bahtakara Dehata anna pepakuhu mapia ang inang masaeng untuhu'i sinnoa andeang ang umpamatoho kalae.
7Daumpehingngii tohodolu kalosengang ang dai mebahanang dai' di Puang Alataala, ampo' pellaya'o untuhu'i pa'elo'na Puang Alataala.
8Aka' umpamatoho kalae sämpäi' supu kunanna, ampo' untuhu'i pa'elo'na Puang Alataala kekuna lambi' sapano-panona.
9Ang mane kutula' indee tahpa' si'da-si'da.
10Tahannuang dai' di Puang Alataala To Tontong Aha, ang mambuhkei lalang anna malai umpasalama' ingkänna hupatau, ampo' supung to mampetahpa'. Aka' tapetahpa' indee, dahi pahallu tapengkalambi'-lambi'i mengkähäng si'da-si'da.
11Popepakuhui anna unsuoi ingkänna tau natuhu'i.
12Daumpehingngii ke ahai tau ang mangngita-ita naungngo aka' mahäti'o, ampo' ang handang pahallu umbabe dianto la umpatandaangnging pohapangang mapia yaling di pa'tula'mu, pembabemu, pa'kalemummu, kapampetahpa'ammu anna kamaseroammu.
13Lella' ungngempei kasuleangku, pamabata liuing Suha' Masero pano di tau, umpakuhu anna umpamaleso lambi' nainsang bahtuanna.
14Pakekuna loloi samai behe ang nabeao Puang Alataala naonge lella'o nasahpa pebulle ada' tanda nalanti'o sibaha naonge nabokungngio tula' sangngaka-sangngaka nabi.
15Tuhtuang allo tuhtuang pembabe manahpaing ingkänna yatoo anna malai tandaang naita hupatau.
16Dakaii katuhoammu anna undakai toine' pepakuhummu. Pahallu la umpanoa lolo yatoo anna malai dai dio supu la salama', ampo' ingkänna toe' tau ang mampehingngiio sitonda mampetahpa' dai' di Puang Yesus.