Alkitab Mobile SABDA
[VER] : [ARALLE]     [PL]  [PB] 
 <<  2 Korintus 8 >> 

1Oa' solasohong, pemalaang anna malaia' ungnginsang aka ang dahi di ingkänna jumaa' done di Makedonia napobua' kamarota'anna Puang Alataala.

2Masuhsa si'da-si'da kamadahhaang anna kapemase-maseang ang sika nasa'ding. Ampo' moinnakato noa yatoo, ya' mahasa liu inahannaii lambi' mai'di doi' sika nahimpung ang la napake undului solana.

3Kusa'bii kuoatee yato pentandonaii situhu' kapabelaanna, bahtu' la la'bike'. Anna dai aha tau ang mampahsa, ampo' inang mengkalao toboe' yaling di unnä' inahanna.

4Napalau toe' la kipabei sika unghimpung doi'na ang la napake undului to pemase-mase di lau' di Yerusalem.

5Yato pentandonaii la'bi andana ang kipemitai. Tadia doi' supu ang nabea ampo' sika umbeho dolu inahanna dai' di Puang Alataala untuhu'i pa'elo'na. Noa tunne' natuhu'iang aka' pa'elo'na Puang Alataala.

6Dahi, mane kisuo ta Titus sumule mating anna malakoa' nadului yaling inde di pengkähängang mapia, aka' inang ta Titus ang handang dolu manduluikoa' unghimpung yato doi' ang la umpapebaha sau di Yerusalem.

7Oa' solasohong, untondongkoa' tau senga' di ingkänna siamo: dai aha mantondong kapampetahpa'ammua', ungnginsangnga' pepaturu ang tahpa' anna umba noa umpaturu tau senga'. Mai'di ang umbabe yaling undului tau senga' anna ma'kalemu si'da-si'dakoa' pano di kami'. Dianto anna kupalaui la umpellondoikoa' tau senga' yaling inde di pengkähängang mapia, dianto umbea doi' pano di to pemase-mase.

8Tadia pahenta ang kutula'ingkoa'. Supung kupainsangngikoa' umba noa pa'kalemunna to Makedonia yaling umbea doi'na ang la medului, anna mala toi kuita umbane' noa pa'kalemummu pano di tau senga'.

9Ungnginsangnga' umba noa pa'kalemunna Dehatanta Puang Yesus Kristus pano di kita'. Tandana malemu, ya' moinnakato anna matande si'da-si'dai, ampo' napellei yato kamatandeanna anna malaingkea' nakalemui. Noa tunne' mendahi to pemase-mase anna malaingkea' untahimbo katomakakaang.

10Di kodi'na kodi' mahasa ke umpepuhaii yato ang umpahandu' taung ang puha, dianto ungkalemui jumaa' senga'. Aka' dioa' ang handang dolu umpahtuyu anna umpahandu' inde pengkähängang.

11Dahi dinoa pengkabela-belaiia' umpapuha yatoo, sinnoa naonge mane umpahandu'i. Pebeaing dia siamo ang mala umpebeaing, situhu' aka ang aha.

12Aka' ponna mampebeaingkea' mengkalao di inahanta anna situhu' yato ang aha di kita', ya' masannang Puang Alataala untahimbo yato pentandota. Dai napalau la'bi andana kapabelaanta.

13Dai kupanoa indee anna matingngiia' durungammu lambi' kakuhangangkoa' anna kehongko'ine' tau senga'. Ampo' nasuhung kupanoa indee anna malai la sinnoa-noa katuhoammua'.

14Dinoa, aka' mai'di buke' aka-akammu, ya' sihatang ke unduluikoa' solamu ang kalala' di lau' di Yerusalem. Dako'-dako'ke' ke kalala' toukoa' dio, ya' malamokoa' sika nadului. Dahi ke tuhoi tau sikarota'i noa yatoo, ya' ingkänna tau dai aha la kakuhangang.

15Sinnoa ang tiuki' yaling di Suha' Masero dolu naoatee, "Yato tau ang mai'di nahimpung, dai la bosa' aka-akanna. Anna yato tau ang sai'di' nahimpung, ya' dai la kakuhangang."

16Kuhhu' sumanga' dai' di Puang Alataala aka' mengkähäng yaling di inahanna ta Titus lambi' pemala la naduluikoa', napensinnoaiä'.

17Tahpana kisuo ta Titus la mao mating, ya' naaku si'dae' aka' inang pemala liue' la naduluikoa'.

18La kisuo mesa solasohonta mating nasibahaing ta Titus. Inde tau napudi ingkänna jumaa' aka' pengkähänganna umbaha Kaheba Mapia.

19Dia tuke', hali napillei ingkänna jumaa' dinne anna malai naposolaiang lusau di Yerusalem umbaha yato pentandomu pano di santosahaninta ang menge masuhsa. Aka' nasuhung anna la maoang anna malai dipamatande sanganna Dehata anna la nainsang solasohonta di lau' naoatee, "Aha si'dae' inahanna mekalemui."

20Kidakai liu anna dai la aha tau ang mansallaang yaling inde di kaha-kaha umbaha yato mai'di doi' pentandonaii.

21Dianto anna kipihki' lohpo'mi menna ang la mamposolaiang anna malai maleso dioatee maroho pahtuyungki', noa di olona Dehata, noa di olona hupatau.

22Dahi ta Titus sibaha yato solasohong ang mane hali kutula' anna ahake' mesa tau senga' ang la kisuo mating. Pemmai'ding kisa'bii pengkerona inde solasohonta lambi' kiinsang kioatee bansa' yaling di ma'kahupa-hupa pengkähängang. Ya' dinoa pemala liukoa' nadului aka' napetahpa'koa'.

23Didionane' yato ta Titus ang la kusuo mating naduluikoa', dianto solaku yaling di pengkähängang. Pihsanannane' yato to deruai ang la mamposolai, dianto ang napillei jumaa' dinne ungngäto' katihimpunganna yato doi'. Pengkerona si umpamatande sanganna Kristus.

24Dahi kupalau ke la malaia' untahimbo mapia anna ungkalemui. Ponna ke umpanoaia', ya' la nainsang ingkänna jumaa' naoatee to pa'kalemu si'dakoa' anna tahpa' yato ang si kipokale'de didiona kamapiaammua'.


  Share Facebook  |  Share Twitter

 <<  2 Korintus 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel