Alkitab Mobile SABDA
[VER] : [ARALLE]     [PL]  [PB] 
 <<  2 Timotius 4 >> 

1Di olona Puang Alataala anna Kristus Yesus ang la unghohto' tau ang puhang mate anna ang tuhoke', anna aka' la sule ma'pahenta sinnoa mesa tomaraya, kupalau si'da-si'da anna malai umbabe indee:

2Pepakahebai pepakuhu ang tahpa', pahalluo umpatoka lolo kalaemu mampakuhu, moi dai aha ang mampehingngii, moi aha ang mampehingngii. Pamarohoi lalanna tau ang bengko', kambahoing ang umbabe kasalaang, pakaenga'i tau sitonda kasa'bara'ang anna malai sika membabe maroho.

3Aka' la aha tempona naongei hupatau dai umpehingngii pepakuhu ang tahpa'. Ampo' la sika untuhu'i toboe' pahtuyu karakena anna unghimpung mai'di to pampakuhu salao-laona anna malai sika umpehingngii supu ang la mampamasannang.

4La sika untimping talinganna di hao mai di katahpa'ang, ampo' la untungka'i talinganna pano di tohodolu kalosengang.

5Ampo' dio Timotius, pahallu la undakai manahpa kalaemu di ingkänna sia. Sa'bara'o ungngolai kamasuhsaang. Popepainsangnging Kaheba Mapia anna umpatilao mapiai pengkähängammu ang nabeao Puang Alataala.

6Ingkänna inde kupainsangngio aka' dang masae anna la dipateimä'. Katuhoangku kubeho dai' di Puang Alataala sinnoa penombaang.

7Tontongngä' tuhu'-tuhu'ang yaling di kapampetahpa'ang lambi' dinoa. Sinnoa ang puhamä' ma'silumba yaling di pa'silumbaang kamapiaang anna pataloä'.

8Dinoa la ullambi'mä' katuhoang sapano-panona aka' kamarohoang inaha ang nabeaä' Puang Yesus Kristus, To Panghohto' ang dai mampasisenga'-senga', ang la nabeaä' di allo kasuleanna. Anna tadia kodi' supu la nabea, ampo' ingkänna toe' tau ang unghannuang liu kasuleanna Puang Yesus Kristus tama di lino.

9Pengkalambi'-lambi'i baha' suleo

10aka' ta Demas le'ba'mi napelleiä' sau di Tesalonika untuhu'i linona. Ta Kreskes le'ba'mine' sau di Galatia anna ta Titus lupanone' di Dalmatia.

11Ta Lukasdang supu ang kusibahaing dinne. Humbui ta Markus anna maikoa' sibaha aka' dipahallu liu yaling di pengkähängangku.

12Puhante'ne' kusuo ta Tikhikus sau di Efesus.

13Ponna ke maimo, bahaingkä' yato ang si kupekumbäng ang kupatohho di Troas di dasanna ta Karpus. Baha toi yato suha'-suha'ku, londonang yato ang dipapia di lollo'.

14Ta Aleksander yato pande puha umbabe kakarakeang ang makayang pano di kodi'. Puang Alataala tuburanne' ang la mambala' yato samai pembabe karakena.

15Kahaoii inde tau aka' inang umpa'bali si'da-si'da pepakuhunta.

16Naonge uhunai umpebayaiä' kalaeku, dai aha moi poro la mesa tau ang mamposolaiä', sika le'ba' asang napelleiä'. Umbato ke dai nasalla Puang Alataala yato pembabenaii.

17Ampo' donetoo Puang Yesus tontong di behingku. Nabea loloä' kamatohoang nasuhung malaä' bahani umpopepainsangnging yato samai ihsinna Kaheba Mapia anna malai napehingngii ingkänna tau ang tadia to Yahudi. Anna nalahpa'ä' di hao mai di kakuasaanna to la mampateiä'.

18Dianto anna la nalahpa'mä' Puang Yesus di hao mai di ingkänna kakarakeang ang la manghoaä' lambi' napasalama'ä' anna naposolaä' dai' di suruka, dianto ang naonge Puang Alataala ma'pahenta sinnoa tomaraya. Dipamatanderang lambi' sapano-panona. Aming.

19Salama'ku mating di ta Priska sibaha ta Akwila anna sanghapunna ta Onesiforus.

20Ta Erastus tohho di Korintus anna ta Trofimus kupellei di Miletus lella' makorong.

21Pengkalambi'-lambi'i mai akinna uhangngallo. Salama'na are' ta Ebulus, ta Pudes, ta Linus, ta Klaudia anna ingkänna solasohonta.

22Ke la malai Puang Yesus umposolai sungnga'mu. Puang Alataalarang ang la mambeheingkea' para-para.


  Share Facebook  |  Share Twitter

 <<  2 Timotius 4 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran