Alkitab Mobile SABDA
[VER] : [ARALLE]     [PL]  [PB] 
 <<  Efesus 1 >> 

1Pano di ingkänna petauanna Puang Alataala diting di Efesus ang tontong lolo mampetahpa' yaling di Kristus Yesus. Hao mai di kodi' Paulus, mesa touä' kodi' rasulna Kristus Yesus aka' pangngelo'na Puang Alataala.

2Kuhannuang ke la malai Puang Alataala Ambetaa' sibaha Puang Yesus Kristus Dehatanta la umbehekoa' anna namana'koa' kamasahkeang sibaha kamasannangang.

3Dipudi sanganna Puang Alataala, Ambena Dehatanta Puang Yesus Kristus. Puhang nabeaingkea' ingkänna pebehe mendehatanna yaho di suruka aka' sangkalebumingkea' Kristus.

4Aka' dake' aha dipadahi inde lino anna puhamingkea' napillei la mesa sibaha Puang Yesus Kristus anna malaingkea' mendahi petauanna ang masero, lambi' dang la aha kasalaanta. Aka' pa'kalemunna Puang Alataala,

5lambi' puha napama'tantu mengkalao dolu naangka'ingkea' mendahi änä' Kalaena ungngolai pengkähänganna Puang Yesus Kristus aka' ahana inang la nababe.

6Dipudi Puang Alataala aka' mana' pa'kalemunna ang matande, dianto nakalemui liuingkea' ungngolai pengkähänganna Änä'na ang napakamaya.

7Aka' titollo hahana Puang Yesus Kristus lambi' nalahpa'ingkea' Puang Alataala, bahtu' dioatee ingkänna dosanta naampungngi. Nababe yatoo aka' nakalemui si'da-si'daingkea',

8anna napapunnoi toingkea'ne' kamanähängang anna kakeaka'ang.

9Aka' pangngelo'na Puang Alataala lambi' napainsangngiingkea' pahtuyu membuninna. Yato pahtuyu puhang nabohtu la napasundung yaling di pengkähänganna Kristus.

10Ihsinna yato pahtuyunna dianto: ingkänna-ingkänna siamo, moi ang yaho di suruka anna moi ang yaling di lino, la napamesa yaling di Kapahentaanna Kristus. Kaha-kaha yatoo la napasundung Puang Alataala ke lambi'mi tempona.

11Ingkänna-ingkänna siamo nakähäng Puang Alataala situhu' pahtuyunna. Dianto anna mengkalaoke' dolu inang napilleimang situhu' pangngelo'na la mendahi petauanna aka' la sangkalebu tau yaling di Puang Yesus Kristus.

12Kami' to Yahudi ang handang uhuna hannu pano di Puang Yesus Kristus, napilleiang anna malaang umpudi Puang Alataala ang matande.

13Anna dioa' ang tadia to Yahudi dipamesa tumokoa' dio sibaha Puang Yesus Kristus naonge anna unghingngiia' yato kaheba katahpa'ang, bahtu' dioatee Kaheba Mapia ang mebaha pano di lalang kasalama'ang. Tahpana mampetahpa'mokoa' pano di Puang Yesus Kristus, ya' nabeamokoa' Puang Alataala Inaha Maserona ang puha nadandiingkoa'. Yato Inaha Masero ang nabeakoa', ya' mendahi tanda yaling di kalaemu lambi' diinsang dioatee mendahi tumokoa' dio petauanna Puang Alataala.

14Maleso toi dioatee dai mala tala tatahimbo asangnga' aka-aka ang puha nadandiingkea' Puang Alataala, aka' kita'a' petauanna nabeamingkea' Inaha Maserona ang la mamposolaiingkea' lambi' tempona la napabeba'ingkea' di hao mai di kakarakeang. Dahi la sihatangngingkea' umpudi Puang Alataala ang matande.

15Mengkalao donetoo anna kupelelei didiona kapampetahpa'ammua' pano di Puang Yesus Dehatanta anna pa'kalemummua' pano di ingkänna petauanna Puang Alataala,

16ya' ma'kuhhu'sumanga' lolomä' dai' di Puang Alataala aka' dioa'. Anna si kukalehai lolokoa' yaling di sambayangku ke ma'sambayang bumä',

17aka' kupalau anna malai Puang Alataala, Dehatanna Puang Yesus Kristus, bahtu' dioatee Ambetaa' To Handang Matande, la umbeakoa' inaha ang punno kakeaka'ang anna kapainsangang didiona Kalaena lambi' la ungkaleso manahpaa' menna setonganna Puang Alataala.

18Anna si kupalau tuke' dai' di Puang Alataala anna malai napamalesoingkoa' yaling di pihki'mu, lambi' la umpähäng manahpaa' yato pebehe ang unghannuang la nabeakoa', aka' natambaimokoa' mendahi petauanna. Anna la ungnginsang tuke'a' ungngoatee yato pebehe ahana inang napatokaing Puang Alataala pano di petauanna;

19anna la umpähäng toia' ungngoatee, dai aha ang nasinnoaing kakuasaanna Puang Alataala ang mengkähäng yaling di kalaeta, ingkännaingkea' to mampetahpa'. Yato kakuasaang ang mengkähäng yaling di kalaeta, dia tunto nei' ang napake

20naonge umpatuhoi sumule Kristus di hoi' mai di alla'na to mate, mane napaohko'i yaho di suruka di tando kuananna, dianto ongeang kakeangka'ang.

21Kamatandeanna Puang Yesus Kristus matande puha nei' andana kamatandeanna ingkänna to ma'pahenta, tomaraya anna ingkänna to ma'kuasa senga'. Anna noa toi kakuasaanna matande puha nei' andana ingkänna kakuasaang ang mala ditula', moi ang ahang dinoa, noa toi ang mane la aha di allo ang la sule.

22Puang Alataala umpapatalo Puang Yesus Kristus yaling di ingkänna siamo. Anna naängkä' la umpahenta ingkänna ang aha. Napanoa anna malai ungkalemui yato kakalebuanna to mampetahpa'.

23Kakalebuanna ingkänna to mampetahpa' sihapang bätäng kalaena Puang Yesus Kristus. Anna yato bätäng kalae sangkalebung sibaha bää' lambi' sundung, anna Puang Yesus Kristusmitoo ang umpasundungngi ingkänna siamo.


  Share Facebook  |  Share Twitter

 <<  Efesus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel