Alkitab Mobile SABDA
[VER] : [ARALLE]     [PL]  [PB] 
 <<  Efesus 6 >> 

1Ingkämmua' to dipoänä', tuhu'ikoa' to baha'mu aka' dianto pembabe ang sihatang nababe tau ang mampetahpa'mi dai' di Dehata.

2La umpakeangka'koa' to baha'mu. Dianto atohanna Puang Alataala ang uhuna ang napasitonda pa'dandiang naoatee,

3"Anna malakoa' kehongko' anna mahendeng tuho yaling inde di lino."

4Ingkämmua' solasohongku to dipotobaha', daa ummaromi' umpamapalla änä'mu. Ampo' paturu manahpai umpake pepaturu anna pepakaenga' ang tiuki' yaling di Bahtakara Dehata.

5Ingkämmua' to diposabua', tuhu'i manahpakoa' pahentana pongkahamu yaling inde di lino. Dia tuke' pakeangka'i anna pa'käyyängngii. Pembabeing ingkänna pahentana sitonda unnä' inaha sihapang Kristus ang mampopengkähängkoa'.

6Daa supung ke naitakoa' anna la tuhu'-tuhu'angngo, aka' ungngoaa'te yaling di inahammu, "Anna malaä' napudi pongkahaku," ampo' aka' sabua'namokoa' Kristus dahi la untuhu'ikoa' pangngelo'na Puang Alataala sitonda sangkalebu inahammu.

7La umpembabe manahpaingkoa' kähängammu sihapang Dehata ang umpengkähängnging, tadia hupatau.

8Aka' ungnginsammia' ungngoatee ingkänna hupatau, moi sabua', noa tunne' ang tadia sabua', la nabea asang Dehata sahona situhu' pembabe mapia ang puha nababe.

9Anna ingkämmua' to dipopongkaha, la membabe mapia toukoa' dio ke ungngoloi bumokoa' sabua'mu. Anna daia' mala la si umpakahea'-hea', ampo' la ungkalehaia' ungngoatee, "Moi kalaeku moi sabua'ku aha mesa Pongkahaki' yaho di suruka ang dai mampasise'la-se'la."

10Katämpä'anna, la pahallukoa' matoho umpake kamatohoang ang sule yaho mai di Dehata yaling di kakuasaanna ang dai aha mallondo.

11Pakeia' yato ingkänna pangkahka' pa'tolla'ang di mendehatanna, yato ang puha nabeakoa' Puang Alataala. Aka' ponna ke diangnga' umpake, ya' la tontong lolokoa' matoho umbali pa'bulitu'na Pongkahana setang.

12Nasuhung la umpakea' yatoo aka' tadia hupatau ang tabali, ampo' umbaliingkea' ingkänna setang ang ma'kuasa yaling inde di lino kamalillingang bahtu' dioatee lino kakarakeang. Anna umbali toingkea'ne' kakuasaanna ingkänna dehata karake ang ungkuasai lino.

13Dianto anna la umpake asammia' yato ingkänna pangkahka'na Puang Alataala ma'tolla' anna malakoa' matoho umbali balimmu ke lambi'mi yato tempona kakarakeang. Lambi', ponna ke puhamokoa' ma'tolla', la tontong lolokangkoa' matoho anna matihta.

14Sadia lolokoa' ke'de' mangngempe anna pamatohoia' kapampetahpa'ammu pano di katahpa'ang ang sihapang salipi ang napantoke'i pangkahka'na to pa'tolla'. Anna pembabe marohokoa' anna malai yato kamarohoammu la sihapang kaya' pa'tolla'ang ang la umpake anna dao nalosa pangkahka'na balimmu.

15Pahallukoa' sadia lolo umpepainsangnging Kaheba Mapia ang la umpakapiai sumule kasikenteanna hupatau anna Puang Alataala, anna malai yato kasadiaammu la sihapang sapatu ang napake to pa'tolla' ke sadia bumi la mao ma'tolla'.

16Anna pake loloia' yato kapampetahpa'ammu dai' di Puang Alataala dianto pekalapaimmu, bahtu' sihapang untamu, aka' supung kapampetahpa'ammu ang la mala untihpa' anna umpi'dei batu sapingka'na Pongkahana setang ang sitonda api.

17Hannuangngia' kasalama'ammu sihapang songko' bahsi yaho di bää'mu, anna pakeia' yato Bahtakaranna Puang Alataala ang puha nabeakoa' Inaha Masero sihapang pa'dammu.

18Yaling di ingkänna yatoo, pa'sambayangkoa' anna umpalaui dai' di Puang Alataala anna naduluikoa'. Pa'sambayang lolokoa' situhu' pengkähänganna Inaha Maserona Puang Alataala. Madaka lolokoa' anna pa'sambayang lolo toingnga'ne' ingkänna petauanna Puang Alataala.

19Pa'sambayang toingkä' kodi' anna malai ke ma'tula' bumä' nabeaä' tula' Puang Alataala, lambi' bahaniä' umpepainsangnging Kaheba Mapia, yato ang tibuni lambi' dinoa.

20Dinoa mengeä' ditahungkung aka' umpepainsangngingkä' yato Kaheba Mapia, aka' pesuonaä' Puang Alataala. Dahi pa'sambayangngingkä' anna malaä' bahani ma'kara, aka' ahana inang la sihatang kubabe yatoo.

21La napainsangngikoa' ta Tikhikus, solasohontaa' ang tapakamaya, ingkänna siamo didiona kalaeku anna malaia' ungnginsang didiona kalaeku noa tunne' pengkähängangku. Inde ta Tikhikus dianto solaku mengkähäng ang tontong mendahi sabua'na Dehata.

22Kusuo mating dinoa aka' kuoatee anna malakoa' ungnginsang kahebaki' lambi' matohoa' inahammu.

23Ke la malai Puang Alataala Ambetaa' anna Puang Yesus Kristus Dehatanta la umpamesa inahanna ingkänna to mampetahpa' anna la tuhtuang umpakende' pa'kalemummu pano di solamu mesa anna mesa sibaha kapampetahpa'ammu pano di Puang Yesus Kristus.

24Ke la malai Puang Alataala la umbehe ingkänna tau ang dai aha naboli ma'kalemu pano di Dehatantaa' Puang Yesus Kristus.


  Share Facebook  |  Share Twitter

 <<  Efesus 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran