Alkitab Mobile SABDA
[VER] : [ARALLE]     [PL]  [PB] 
 <<  Galatia 5 >> 

1Dinoa beba'mingkea' aka' nalahpa'mingkea' Kristus. Dahi la pahallua' untokei mahha' yato kabeba'ammu, daumpemalaa' la naposabua' sumule Atohanna Musa.

2Pehingngii manahpaia' inde tula'ku! Kalaeku Paulus mangngoatee: ponna ungngoaa'tee, "Pahalluang la ditille situhu' Atohanna Musa," ya' dianto disanga dai aha kunanna Kristus pano di kalaemua'.

3Anna kupakaleha buke' pano di tau ang malau la ditille kuoatee: yato tau pahallu la untuhu'i asang toe' ingkänna Atohanna Musa, tadia supu kapotilleang.

4Anna ingkämmua' ang pemala la napamaroho Puang Alataala ungngolai untuhu'i Atohanna Musa, ya' dianto disanga umbohtuikoa' kasikenteammu sibaha Kristus anna umpengkebo'ikoa' mana' pa'kalemunna Puang Alataala.

5Ampo' kami'-kami', aka' petehtena Inaha Masero anna kapampetahpa'angki' pano di Puang Yesus Kristus, lambi' kihannuang anna kipemitai sibaha sangkalebu inaha la napamarohoang Puang Alataala.

6Aka' ponna ke mesamingkea' sibaha Kristus Yesus, ya' moi tau ditille bahtu' daraka, setonganna sinnoa siang di hao di olona Puang Alataala. Aka' supung ang handang pahallu dianto kapampetahpa'anta pano di Puang Yesus. Anna yato kapampetahpa'anta la tandaang yaling di pa'kalemu pano di paranta hupatau.

7Dolu silumba-lumba kalekoa' umpembabeing kapampetahpa'ammu. Ampo' dinoa menna ang manghalang-halangngikoa' lambi' damokoa' untuhu'i yato pepaturu ang tahpa'?

8Maleso dioatee yato pepakuhunnaii dai sule yaho mai di Puang Alataala ang puha mantambaikoa' mendahi petauanna.

9Pepakuhunnaii sihapang bibi' roti aka' aha tula' naoatee, "Sampi'du' bibi' roti mala unsamba mai'di tahpung lambi' membea' ke la dipapiai roti.

10Moinnakato noa, ampo' aka' kasikenteanta Dehata lambi' kuhannuang kuoatee dasiakoa' la tontong umpehingngii yato tau ang la mampasähsä' lalangkoa'. Anna moi la menna ang la mampabulingnga' pihki'mu dai mala tala nalambi' tahungkunna Dehata.

11Oa' ingkämmu solasohongku, aha tau ang mangngoatee, "Paulus mepakuhu naoatee pahallu tau ditille." Ampo' ponna ke la tahpa' si'dai kupanoa, maleso anna dä' la nadahha yato to Yahudi. Ampo' suhunna anna keaha'i lambi' nadahhaä', aka' yato ang kupakuhuing, dianto kamateanna Puang Yesus Kristus yaho di kayu sitambeng.

12Ampo' ne mating tau ang noa ang si umpasähsä' lalangkoa', mapia puhane' ke dai la ditille supu, ampo' bilang la unsasa'i pihsang nei' lao pambahanna!

13Oa' ingkämmu solasohongku, halimokoa' natambai Puang Alataala la mendahi to beba'. Ampo' dai la malaa' umpake yato kabeba'ammu membabe ang situhu' sipa' dosanna hupatau. Ampo' diare', la sidulu-duluikoa' mesa anna mesa aka' pa'kalemummua'.

14Aka' ingkänna ihsinna Atohanna Musa tipungngu' tannung yaling di mesa pahenta naoatee, "Kalemuio parammu hupatau sinnoa ungkalemui kalaemu."

15Ampo' dakoa' mala siba'di-ba'di sinnoa olo'-olo' ang siande-ande. Aka' ponna sikalla-kalla lolokoa', ya' la dio siangnga' sikarake-rakei.

16Dahi indee tula'ku noa inde bahtuanna: ingkänna pembabemua' la umpembabeing situhu' pantehtena Inaha Masero. Aka' ponna ke untuhu'i lolongnga', ya' dangnga' la untuhu'i pampemalanna sipa' dosanna hupatau.

17Aka' pampemalanna sipa' dosanna hupatau umpa'bali pangngelo'na Inaha Maserona Puang Alataala. Anna pangngelo'na Inaha Masero umpa'bali sipa' dosanna hupatau. Dahi indee derua kaha-kaha sipa'bali yaling di inahanna hupatau lambi' dai la mala dipembabeing yato ang pemala la umbabe.

18Ampo' ponna umbehokoa' kalaemu napatehte Inaha Masero, ya' damokoa' la nakuasai Atohanna Musa.

19Pembabena hupatau ang untuhu'i sipa' dosanna landa' liu diita, noanna: ungngindä'-indä' pa'bannetauang, ma'pihki' karake, supung untuhu'i aka ang naoa inahanna,

20umpenombai kaha-kaha di lino, umpake ihsang-ihsang, sikahiri'-hiri', sikalla-kalla, sikasuehe-ehe, pa'keaha'ang, umpihki' supu kalaena, dai tuho malino sibaha sola bohtona, anna umpakende' kasisähä'-sähä'ang yaling di kamesaang.

21Noa toe' ma'sihi ate, menu' lambi' malango, liba'-liba' ke ahai kamahoa'ang, anna senga'nake' pembabe karake ang nababe. Pano di pembabe ang noa yatoo kupakaleha boukoa' dinoa sinnoa yato ang halimokoa' kutula'ing dolu kuoatee: Menna-menna si umbabe inde kaha-kaha, inang dai la mangngala taha yaling di Kapahentaanna Puang Alataala.

22Ampo' pengkähänna Inaha Masero yaling di kalaeta la ungkeboaing pembabe mapia noanna: pa'kalemu, kamasannangang, kamasahkeang, kasa'bara'ang, kamarota'ang, pembabe mapia, mala dipetahpa',

23kamalunä'ang inaha, ungkuasai kalae. Dai aha moi poro la mesa pahenta ang ullahang pembabe ang noa yatoo.

24Anna ingkänna petauanna Kristus Yesus sihapang puha tunne' dipatei yaho di kayu sitambeng sibaha, bahtuanna: dang nakuasai pangngelo' inahanna sibaha pampemala matoho ang sule di hao mai di sipa' dosanna.

25Dahi, aka' puhamingkea' nabea katuhoang bakahu Inaha Masero, lambi' yaling di ingkänna pembabeta la pahallu untuhu'i petehtena.

26Daingkea' kita' la mala malängkä' inaha, sipi'di'-pi'di' inaha anna ma'sihi ate pano di solata.


  Share Facebook  |  Share Twitter

 <<  Galatia 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran