Alkitab Mobile SABDA
[VER] : [ARALLE]     [PL]  [PB] 
 <<  Galatia 6 >> 

1Oa' ingkämmu solasohongku, ponna ullambi' solamu to mampetahpa' umbabe dosa, dioa' ang tuho situhu' petehtena Inaha Masero la umpakalehaa' anna malai sumule pano di lalang kamarohoang. Ampo' la umpakalehaa' sibaha kamalunä'ang inaha anna kasa'bara'ang. Anna la undakaikoa' kalaemu andana bilang diongnga' pemala membabe noa.

2Anna la sidulu-duluikoa' mesa anna mesa undurung kamasuhsaang. Aka' ponna umpanoaa', ya' untuhu'imokoa'to pahentana Kristus.

3Ponna aha tau ang unsanga-sanga kalaena anna setonganna dai sihatang, dianto disanga tau yatoo umbulitu' kalaena.

4Ingkänna tau pahallu umpihki' lolo umba noa pembabena. Aka' ponna mapia, ya' mala napomahasa inaha. Ampo' dai mangki' la napasiita umba noa pembabena anna pembabena tau senga'.

5Aka' ingkänna tau la pantang toboe' untangkung pembabe kalaena.

6Menna-menna untahimbong pepakuhunna Bahtakara Dehata la pahallu toe' ungkalehai yato tuangkuhunna, bahtu' dioatee la nabea sambaheang aka-akanna.

7Daumbulingnga'. Puang Alataala dai mala dipopangngino. Aka' aka ang dipamula, dia sia tunto nei' ang la dipupu boana.

8Noanna ke membabeingke untuhu'i sipa' dosanta, ya' boana yatoo la ullambi'ingke kamateang, anna ponna ke membabeingke situhu' pangngelo'na Inaha Masero, ya' boana yatoo la ullambi'ingke katuhoang ang lambi' sapano-panona aka' nabeaingkea' Inaha Masero.

9Dahi daummali'-mali'angngi umbabe kamapiaang. Aka' ponna ke umbabe lolomingke kamapiaang, ya' la aha tempo ang puha dipama'tantu la nalambi' toingkea'ne' boana lupunta.

10Dahi akinna ahake' tempo, ya' la pahallua' tapake yato tempo umbabe kamapiaang pano di paranta hupatau, la'bi-la'binna pano di solasohonta to mampetahpa'.

11Ita manahpaia' inde pangnguki'ku sikäyyäng, aka' kalaekung pole' ang mangnguki'.

12Yato ang pemala umpahsakoa' ditille mesa supu suhunna anna sika napanoai. Dianto aka' mahea' la nadahha to Yahudi, aka' keaha' ke dioaitee supung mala tau dipemarohoing ke umpetahpa'i tau Kristus ang puha mate yaho di kayu sitambeng.

13Anna yato tau ang noa moinnakato untuhu'i ada' didiona tille, ampo' dasiang untuhu'i asang ingkänna ihsinna Atohanna Musa. Ampo' napeäng lalanna anna ditillekoa' anna malai aha napolalang ungngangka'-angka' kalaena ke untuhu'ia' pepakuhunna.

14Ampo' di kodi'na koo tantu anna dai kuaku la ungngangka'-angka' kalaeku aka' kaha-kaha ang senga' sehalinna yato ang puha nababe Dehatanta Puang Yesus Kristus yaho di kayu sitambeng. Dianto ang la kupa'käyyängngi. Naonge dipatei Puang Yesus Kristus yaho di kayu sitambeng, sihapang mate touä' kodi' sibaha Puang Yesus Kristus lambi' dang la kupayaling di inaha yato ang si nakärä'i tau ang taungnginsang Puang Yesus Kristus; anna sika noa toi nei' damä' aha napayaling di inahannaii.

15Aka' ditilleraka tau bahtu' daraka, ya' dai maaka, aka' setonganna tontong sinnoa siang di olona Puang Alataala. Ang handang pahallu supung ke mendahing tau to bakahu ang senga'mi.

16Anna ingkänna tau ang untuhu'i inde pepakuhu la namana' Puang Alataala kamasannangang anna pa'kalemu. Ingkänna yato tau sipäto' disanga to Israel si'da-si'da bahtu' dioatee petauang ang napillei Puang Alataala.

17Mane ahai kuoatee: dang aha tau moi poro la mesa ang la mala umpamasuhsa bouä'. Aka' mai'ding bila' pano di kalaeku tandana to pentindo'naä' Puang Yesus.

18Oa' ingkämmu solasohongku, ke la malai Dehatanta Puang Yesus Kristus umbehekoa' para-para. Aming.


  Share Facebook  |  Share Twitter

 <<  Galatia 6 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran