Alkitab Mobile SABDA
[VER] : [ARALLE]     [PL]  [PB] 
 <<  Ibrani 8 >> 

1Dianto indee pungngu' tannunna karangku: Aha kita'a' mesa Handang Pongkahana Imang ang inang noa ang mohko'mi di tando kuananna Puang Alataala To Matande yaho di suruka.

2Yahontoo ungkähäng pengkähänganna yaling di Tambing Handang Masero yaling di Bansuli Masero. Inde bansuli dianto Bansuli Masero ang setonganna yaho di suruka, ang napake'de' Puang Alataala, tadia hupatau.

3Ang dioaintee handang pongkahana imang pahallu si umpopenombaing penombaanna petauanna Dehata sibaha penombaang ang senga'. Noa tunne' Handang Pongkahana Imang ang tahannuang pahallu toe' umpopenomba penombaang, dianto Kalaena.

4Naonge anna dinnei di lino Puang Yesus, ya' daine' mendahi imang aka' inang ahake' imang ang si umpopenomba penombaang ang situhu' atohang ada' Yahudi ang nauki' Nabi Musa.

5Sika mengkähäng yaling di mesa ongeang menomba ang mala dioatee sihapang "kalihayona supu" yato Bansuli Masero ang setonganna yaho di suruka. Aka' dolu Musa, naonge mengei umpasadia aka-aka ang la napake umbabe Bansuli Masero, ya' ma'tula'mi Puang Alataala naoaintee, "Kalehaii inde tula'ku: la pahalluo umpapia ingkänna aka-aka sinnoa siang yato kambara' ang kupaitaio done inde di tanete."

6Ampo' pengkähänganna Puang Yesus londo puha nei' andana pengkähänganna seimangang ang aha done di lino, aka' Dianto ang umpamatoto' pa'dandianna Puang Alataala pano di kita'. Anna inde pa'dandiang bakahu mahasa puha nei' andana yato ang masae, aka' mahasa puha nei' yato ang la talambi' situhu' yato ang nadandiing.

7Ke la sundummine' yato pa'dandiang ang uhuna, ya' dante' pahallu la aha pa'dandiang sala bou ang la mambala'i.

8Ampo' Kalaena Puang Alataala mangnginsang pahallu la nabala'i aka' kasalaanna petauanna, lambi' naoatee, "La aha tempona la kuonge umpapia pa'dandiang bakahu pano di ingkänna to Yahudi, noa peänä'anna Yehuda, noa toi to Israel ang senga'nake'.

9Inde pa'dandiang dai la sinnoa yato ang kupapia sibaha peneneanna dolu naonge kutehtei yaling mai di Bohto Mesir. Dai sika tontong untuhu'i yato pa'dandiangku, dahi kupengkebo'ing.

10Ampo' dianto indee pa'dandiang ang la kupapia sibaha petauangku to Israel di allo ang la sule: Atohangku la kupatama di pihki'naii, la kuuki' asang tama di inahanna. La mendahiä' Dehatannaii anna sika la mendahi petauangku.

11Anna dai la pahallu sika umpakuhu solana, datunne' la pahallu umpakuhu solasohonna, naoatee, 'Pahalluo ungnginsang Puang Alataala,' aka' inang sika la nainsangngä', moi ang saohko', moi ang käyyäng.

12Donetoo la kuampungngi kasalaannaii, anna ingkänna dosanna dang la kukalehai." Noantoo Bahtakara Dehata.

13Dahi, solasohong, ke natula'mi Puang Alataala mesa pa'dandiang bakahu, bahtuanna yato ang masae dang la kekuna, lambi' dang dipake aka' masaeng.


  Share Facebook  |  Share Twitter

 <<  Ibrani 8 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel