Alkitab Mobile SABDA
[VER] : [ARALLE]     [PL]  [PB] 
 <<  Ibrani 9 >> 

1Yaling di pa'dandianna Puang Alataala ang dolu pano di to Israel, aha atohang menomba anna aha toe' ongeang menomba ang nababe to lino.

2Ongeang menomba disangai "Bansuli Masero." Yaling aha derua tambing. Ang uhuna sihapang kale yaling di mesa dasang, disangai "Tambing Masero." Dianto naonge aha pampaongeang lampu sibaha meja ang si dipampaongei roti masero.

3Ang kaderuanna disangai "Tambing Handang Masero." Di alla'na yato derua tambing aha samping disapa'iing.

4Yaling di Tambing Handang Masero aha pantunuang penombaang, bulahang dibabe naongei si dipantunui kayu-kayu bomammi'. Aha toe' pahti ang kayu dipapia mane dilapi'i bulahang, disanga "Pahti Pa'dandiang." Yaling yatoo aha dehpa 'manna' ang puha dipatama di mesa paongeang bulahang, huntunna ta Harun ang mentahe'mi anna yato derua batu lohpä' ang dipangnguki'i yato Sampulo Atohanna Puang Alataala.

5Yaho di tutu'na Pahti Pa'dandiang aha derua kerub ang bulahang dibabe. Pani'na untu'dungngi ang disanga "Ohko'ang Pa'kalemunna Puang Alataala" yaho di tutu'na. Ampo' ingkänna indee dake' mala dipakaleso asang dinoa.

6Noanto umba noa diäto' dolu yaling yato di Bansuli Masero. Pihsananna allo-allo si mentamang imang biasa yato di tambing ang uhuna la mengkähäng yaling.

7Ampo' mesa supu ang la mala mentama di tambing kaderuanna, dianto handang pongkahana imang. Pihsang supu sahtaung si napentama anna dai mala mentama ke dai umbaha haha. Haha yatoo dianto hahana patuhoang ang natunu umbaya' dosa kalaena sibaha dosanna tau ang dai sika naangka'i.

8Ungngolai inde ada' napakuhuingkea' Inaha Masero naoatee dake' tibuhke lalang lutama di Tambing Handang Masero ponna ke tontongke' yato tambing ang uhuna di hao di olona.

9Ingkänna yatoo mesa bou pohapangang pano di kita' ang tuho dinoa. Bahtuanna daingkea' mala umpamasero inahanta di olona Puang Alataala aka' untunu patuhoang sibaha popenombaang senga'.

10Aka' ingkänna yato peada'ang ang noa unghoa supu bätäng puntinta, noanna pemali pano di enu' anna andeang, bahtu' atohang pano di mendeä' anna mambase. Anna supung la tontong lambi' tempona Puang Alataala mebea pa'dandiang bakahu.

11Ampo' suleng pole' Kristus sihapang Handang Pongkahana Imang ang mebahaing yato kamasahkeang ang ahang dinoa. Mentamang di Bansuli Masero ang aha yaho di suruka, ang mahasa anna masero puha andana yato ang napake'de' Nabi Musa dolu. Aka' yato ang napentamang dinoa Kristus tadia pampapianna hupatau, bahtuanna dai yaling mai inde di lino.

12Mentamang di Tambing Handang Masero tahhi' lambi' pano di olona Puang Alataala. Anna yato haha ang nabaha, tadiane' hahana beke bahtu' änä' saping, ampo' umbahane' haha Kalaena. Anna pihsanne' supu mentama, dai pahallu napa'sule-sulei, aka' ungngolai yato hahana ang nabaha, ya' nasulängngimingkea' di hao mai di dosanta lambi' sapano-panona.

13Situhu' Atohanna Nabi Musa, tau ang diangka' kekasalaang pahallu dipamasero ungngolai popenombaang. Natahpi' hahana beke bahtu' saping laki, mane napalolaii täi hapunna änä' saping ang puha ditunu. Puhai yatoo, ya' diangka'mi masero situhu' peada'ang mentolinona.

14Dahi, ponna yato hahana patuhoang mala umpamasero tau, ya' la'bi puhake'ne' hahana Kristus! Yaling yato di hahana mala napamaseroingkea' di hao mai di pembabe karaketa ang mebaha pano di kamateang, anna malai menombaingkea' dai' di Puang Alataala ang tuho. Aka' ungngolai Inaha Masero ang ma'kuasa sapano-panona, umbehong Kalaena Puang Yesus dai' di Puang Alataala mendahi popenombaang ang sundung umbaya' dosantaa'.

15Naonge anna tontongke' pa'dandiang ang uhuna, ya' natehkai hupatau yato atohang. Dianto Kristus anna matei unsulängngi hupatau di hao mai di pantehkainna anna mendahi to dialla' ang mebahaing mesa pa'dandiang ang bakahu di alla'na Puang Alataala anna hupatau. Napanoa anna malai ingkänna tau ang natambai Puang Alataala ullambi' mana'na ang lambi' sapano-panona ang nadandiing Puang Alataala pano.

16Ponna ke la ahai mana', ya' pahallu toe' aha buhtinna ang naoatee matente' yato tau ang mammana'.

17Aka' suha' mana' dake' kekuna ke tuhoke' yato tau ang mambabe; supung kekuna ke mateng yato tau.

18Noa tunne' yato pa'dandiang ang uhuna ang nabaha Nabi Musa napamatoto' toe' umpake hahana patuhoang ang dipopenomba. Noa indee lalanna:

19Puhanna napepainsanging Nabi Musa yato ingkänna pahenta ang aha tiuki' yaling di Atohang, ya' ungngalang hahana änä' saping anna hahana beke laki, mane napasihau-haui uhai. Pihsananna ungngalang lohpo hisop ang hali naba'ba' bulu domba ang namaleai, mane natomme'i naung yato di haha anna natahpi'ing yato suha' Atohang anna ingkänna tau.

20Lella' yato nababe naoantee, "Dianto indee haha ang umpamatoto' pa'dandianna Puang Alataala pano di dioa' ang pahallu la untuhu'i."

21Noa tung nei' Musa untahpi' Bansuli Masero sibaha ingkänna pangkahka' maserona umpake yato haha.

22Mala dioatee, situhu' Atohanna Musa, sai'di' tala dipamasero asang umpake haha. Ponna ke dai aha haha titollo, ya' dai mala la diampungngi dosa.

23Yato Bansuli Masero ang dolu di lino, sibaha ingkänna pangkahka'na, dianto pohapanganna supu ingkänna aka-aka ang aha yaho di suruka. Pahallu dipamasero umpake hahana patuhoang ang dipopenomba. Ampo' yatone' ingkänna aka-aka ang yaho di suruka pahallu aha popenombaang ang mahasa puha.

24Aka' Kristus dai mentama di Bansuli Masero ang napapia hupatau, ang napasihapang supu Bansuli Masero ang si'danna. Dai, ampo' mentamane' di suruka anna dinoa napa'tula'mingkea' di olona Puang Alataala.

25Yaling di peada'anna to Yahudi yato handang pongkahana imang si mentama yato di Tambing Handang Masero pihsang sahtaung umbaha hahana patuhoang. Ampo' Puang Yesus Kristus daine' napa'sule-sulei mentama umpopenomba Kalaena.

26Aka' ponna noa, ya' mengkalao di pampahandu'anna lino pemmai'ding ungngola kamadahhaang lambi' mate. Ampo' dinoa, yaling di tempo ang madungku'mi pano di Allo Pampahehsaang, umpalanda'mi Kalaena Kristus pihsang supu anna malai dosanna hupatau napa'dai aka' umbeho Kalaena dipatei.

27Puha napama'tantu Puang Alataala naoatee ingkänna tau pihsang supu mate mane napahehsai.

28Noa tunne' Kristus, pihsang supu mate mendahi popenombaang ang la umpa'dai dosanna tau mai'di. La sumule bou tama inde di lino, tadia aka' dosanta, ampo' anna malai umbaha kasalama'ang pano di tau ang mangngempei kasuleanna.


  Share Facebook  |  Share Twitter

 <<  Ibrani 9 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran