Dual Panel1Umbai done tunto nei' anna napahandu'i Tomaraya Herodes ungkahha'i sangngaka-sangngaka to mampetahpa' yaho di Yerusalem.
2Sinnoanna umpesuoi Yakobus kakana Yohanes dibose'i bää'na, umpake pa'dang.
3Tahpana nainsang Tomaraya Herodes naoatee nakärä'i to Yahudi yato babena, ya' napatahhi' liung lambi' umpesuoi Petrus disahka anna malai dipatei toe'. Tempo donetoo sipatu pa'rame-rameang Roti Takeragi.
4Tahpana disahka Petrus napesuoing ditahungkung. Anna dibehoi pano di uhpa' baheang tantara, la sibala'-bala' mandakai. Mesa boi baheang uhpa' bung tantara. Pahtuyunna la dihohto' di hao di olona tau mai'di ke puhang Paska.
5Dahi ditähämmi inde Petrus yaling di tahungkung. Ampo' tontong lolo ingkänna to mampetahpa' napa'sambayangnging dai' di Puang Alataala.
6Yato benginna ke la nabahang Herodes ke mabayang pano di olona tau mai'di, ya' haheng ta Petrus napadialla'na derua tantara, anna dipungoi teyyena hante bahsi. Aha tuke'ne' senga'na ang mandaka di hao di olona baba tahungkung.
7Pihsananna tahpa ahang mesa malaeka'na Puang Alataala di behinna Petrus anna pansillo' umballoi yato tahungkung. Inde malaeka' untuhpa' kasihinna Petrus naheke anna naoaintee, "Penandaii kaleha!" Ya' tibuhke siarang yato hante di hao di teyyena Petrus.
8Ya' ma'karang yato malaeka' naoatee, "Pesalipio anna pesapatuo." Ya' tahpa nababe siarang. Ma'kara bumi naoatee, "Pekaya' kalambe'o anna untindo'ä'."
9Tahpa untindo' siarang yato malaeka' mensohong, ampo' dake' nainsang naoatee dahi si'da-si'da yato nababeing malaeka' aka' nasangake' menge mangngipi.
10Ya' ullehammi ongeanna to pandaka uhuna anna kaderuanna, ullambi'mi lalang tama di bohto mahoa' ang ditutu'i baba bahsi. Tahpa titungka' kalaena yato baba lambi' mala mensohong yaling mai di tahungkung. Tahpana ungngola bung lalang senga', ya' pa'da tomande'mine' yato malaeka'.
11Tahpa pa'kalehang pole' Petrus anna naoaitee, "Mane kuinsang pole' dinoa kuoatee Dehata unsuo malaeka'na la nalahpa'ä' di hao mai di pala' teyyena Tomaraya Herodes anna ingkänna pahtuyunna to Yahudi.
12Tahpana nainsang liung yato kaha-kaha Petrus, ya' tahhi'mi pano di dasanna Maria indona Yohanes ang disanga toe' ta Markus. Mai'di tau ma'himpung anna ma'sambayang yaling yato di dasang.
13Tahpana unde'de' baba hala, sulerang mesa sabua' bahine disanga Rode la umpengnginsangngi menna yato ang sule.
14Nainsanna naoatee Petrusmi sule aka' nahingngi kamahanna, ya' dakaleng hali untungka'i baba aka' kahsi. Lambi' lumumpa' tama umpainsangngi solana naoatee, "Ea', sule ta Petrus di hao di baba hala."
15Ya' sika naoantee, "Tahta'o!" Ampo' tontong ma'kara naoatee, "Ahana inang ta Petrus sule." Ampo' sika naoaintee, "Umbai malaeka' to pandakainnaetee' sule mepakahebai."
16Tontong loloke' Petrus unde'de' baba, ya' suleing mai'di solana natungka'i. Tahpana ungngita Petrus, ya' sika tungke'du' asammi anna pusa'i.
17Ungngängkä'mi teyyena Petrus napopampamahtang mane ma'tula'i naoatee, "Natehteä' Dehata mensohong yaling mai di tahungkung! Painsangngii Yakobus sibaha ingkänna solasohontaa' to mampetahpa' didiona inde kaha-kaha ang puha dahi." Puhanna ma'tula', ya' mensohommi le'ba' pano di ongeang senga'.
18Tahpana mebengngi' sika sikutana-tanaing yato tantara to pandaka yaling di tahungkung naoatee, "Aka disanga ang dahi pano yato di Petrus?"
19Ya' unsuong tau Tomaraya Herodes umpeäng Petrus ampo' dang aha nalambi'. Ya' yatong to pandaka dipahehsa simesa-mesa mane dipesuoii dipatei. Puhai yatoo mengkalaong di Yudea Herodes le'ba' pano di Kaisarea anna tohhoi di hao.
20Tempo donetoo keaha' liung Tomaraya Herodes pano di to Tirus anna to Sidon. Dolunna inde derua bohto si unghannuang tomaraya napangngalai andeang, ampo' danne' nabea dinoa. Dianto anna sika suleng mengngolo. Sika unse'de'mi Blastus pongkahana to pengkähäng yaling di dasanna tomaraya. Ya' diang mangkadoluangngi mengngolo pano di tomaraya umpeäng kasikapiaiang situhu' pampemalanna to Sidon anna to Tirus.
21Pihsananna lambi' yato allo ang puha sika natandai, ya' umpakeng kaya' katomarayaanna Herodes anna mohko'i yaho di ohko'ang katomarayaang umpa'tula'i yato tau.
22Lella' ma'tula', ya' sika kohang yato tau naoatee, "Inde kamahanna dehata, tadia kamahanna hupatau."
23Tahpa napahoai siang mesa korong malaeka'na Dehata aka' untahimbo pampudianna tau andana umpakäyyäng Puang Alataala, lambi' karoroang anna napobahai mate.
24Bahtakaranna Dehata tuhtuang tisembu' lambi' tuhtuang kehängngäng ang mampetahpa'.
25Tahpana sika umpapuha kähänganna inde Barnabas anna Saulus, dianto umpalambi' yato ang nabaha dai' di pebulle ada', ya' sika sumuleng yaho mai di Yerusalem umposola ta Yohanes bahtu' ang disanga toe' ta Markus.